ಮಡಿಕೇರಿ: ಕೊಡಗಿನ ಹಲವು ಮೂಲಸೌಕರ್ಯ ಯೋಜನೆಗಳು ಹಲವು ವರ್ಷಗಳಿಂದ ಅಪೂರ್ಣಗೊಂಡಿದ್ದು, ಈ ಅಪೂರ್ಣ ಕಾಮಗಾರಿಗಳಲ್ಲಿ ಸಂಬಂಧಪಟ್ಟ ಇಲಾಖೆಗಳ ಅಧಿಕಾರಿಗಳ ನಿರಾಸಕ್ತಿ ಎದ್ದು ಕಾಣುತ್ತಿದೆ. 

ಮಳೆಗಾಲದಲ್ಲಿ ನಿವಾಸಿಗಳಿಗೆ ಅಪಾಯವನ್ನುಂಟುಮಾಡುವಂತಹ ಒಂದು ಯೋಜನೆ ಮಡಿಕೇರಿ ಜಿಲ್ಲಾಡಳಿತ ಕಚೇರಿಯ ಹಿಂಭಾಗದ ತಡೆಗೋಡೆ ಹಲವು ವರ್ಷಗಳೇ ಕಳೆದರೂ ಮುಗಿದಿಲ್ಲ. 2020 ರಿಂದ, ಯೋಜನೆ ಆರಂಭವಾಗಿದ್ದು, ಇನ್ನೂ ಪೂರ್ಣಗೊಂಡಿಲ್ಲ.

2019ರ ಮಳೆಗಾಲದಲ್ಲಿ ಮಡಿಕೇರಿ ಡಿಸಿ ಕಚೇರಿ ಹಿಂಭಾಗದಲ್ಲಿ ಸಣ್ಣಪುಟ್ಟ ಭೂಕುಸಿತ ಸಂಭವಿಸಿತ್ತು. ಆದಾಗ್ಯೂ, ದುರ್ಬಲವಾದ ಮಣ್ಣನ್ನು ಬಲಪಡಿಸಲು ಮತ್ತು ರಿಟೈನಿಂಗ್ ವಾಲ್ ನಿರ್ಮಿಸಲು ಮತ್ತಷ್ಟು ಅಗೆಯಲಾಯಿತು. 2020 ರಲ್ಲಿ, ಜರ್ಮನ್ ತಂತ್ರಜ್ಞಾನವನ್ನು ಬಳಸಿಕೊಂಡು ತಡೆಗೋಡೆ ನಿರ್ಮಾಣಕ್ಕೆ ಹಣ ಮಂಜೂರು ಮಾಡಲಾಗಿದೆ.

7.53 ಕೋಟಿ ರೂ.ಗೆ ಮಂಜೂರಾದ ಈ ಕಾಮಗಾರಿಯನ್ನು ಅಯ್ಯಪ್ಪ ಕನ್ಸ್ಟ್ರಕ್ಷನ್ ಕಂಪನಿ ಗುತ್ತಿಗೆ ಪಡೆದಿದ್ದು, 11 ತಿಂಗಳಲ್ಲಿ ಪೂರ್ಣಗೊಳಿಸಬೇಕಿತ್ತು. ಆದರೆ, ಭೂಕುಸಿತ ಪೀಡಿತ ಪ್ರದೇಶವನ್ನು ಬಲಪಡಿಸಲು ಅಳವಡಿಸಿದ ಫಲಕಗಳು ಕುಸಿಯುವ ಹಂತದಲ್ಲಿದ್ದು, ಕಳಪೆ-ಗುಣಮಟ್ಟದ ಕಾಮಗಾರಿ ಎಂಬುದು ಪೂರ್ಣಗೊಳ್ಳುವ ಮುನ್ನವೇ ಬಹಿರಂಗವಾಗಿದೆ. 

ಇದನ್ನೂ ಓದಿ: ಮರ-ಗಿಡಕ್ಕೆ ಸಂಪ್ರದಾಯಬದ್ಧವಾಗಿ ಮದುವೆ; ಗ್ರಾಮಸ್ಥರು ಹಾಗೆ ಮಾಡಿದ್ದು ಯಾಕೆ?​

ಇದರ ಬೆನ್ನಲ್ಲೇ ಕಾಮಗಾರಿಯಲ್ಲಿ ಭ್ರಷ್ಟಾಚಾರ ನಡೆದಿದೆ ಎಂದು ಆರೋಪಿಸಿ 2023ರಲ್ಲಿ ಲೋಕಾಯುಕ್ತ ದೂರು ದಾಖಲಾಗಿದ್ದು, ಎಂಜಿನಿಯರ್‌ಗಳಲ್ಲಿ ಒಬ್ಬರಾದ ಕೆಎಲ್ ದೇವರಾಜ್ ಅವರನ್ನು ಅಮಾನತುಗೊಳಲಾಗಿದೆ. ಹೀಗಾಗಿ ತಡೆಗೋಡೆಯನ್ನು ಸಂಪೂರ್ಣವಾಗಿ ತೆಗೆದು ಮರು ಕಾಮಗಾರಿ ನಡೆಸುವಂತೆ ಸಂಬಂಧಪಟ್ಟ ಗುತ್ತಿಗೆದಾರರಿಗೆ ಆದೇಶ ನೀಡಲಾಗಿದೆ. 

ಕಾಮಗಾರಿಗೆ ಹೆಚ್ಚುವರಿ ಹಣ ಬಿಡುಗಡೆಯಾಗಿಲ್ಲ ಎಂದು ಪಿಡಬ್ಲ್ಯುಡಿ ಎಇಇ ಸಿದ್ದೇಗೌಡ ಅವರು ಖಚಿತಪಡಿಸಿದ್ದು, ಗುತ್ತಿಗೆದಾರರು ಸ್ವಂತ ಹಣ ಬಳಸಿ ಪೂರ್ಣಗೊಳಿಸಬೇಕು. ಆದರೆ, ಯೋಜನೆಯ ಕಾರ್ಯಕ್ಕೆ ಯಾವುದೇ ಗಡುವು ನೀಡದಿರುವುದು ಮತ್ತು ಅಧಿಕಾರಿಗಳು ಆಸಕ್ತಿ ವಹಿಸದಿರುವುದು ಈ ವರ್ಷವೂ ಯೋಜನೆ ಪೂರ್ಣಗೊಳ್ಳುವುದು ಅನುಮಾನ ಎನ್ನಲಾಗುತ್ತಿದೆ.