ಕೊಪ್ಪಳ/ಬೆಂಗಳೂರು: ಉತ್ತರ ಕರ್ನಾಟಕದ ಕೆಲವು ಭಾಗಗಳಲ್ಲಿ ಶಿಶುಗಳನ್ನು ಎಸೆಯುವ ಪದ್ಧತಿ ಇನ್ನೂ ಮುಂದುವರಿದಿದೆ. ಆದರೆ ಇದು ಅನಿಷ್ಟ ಪದ್ಧತಿಗಳಾಗಿದ್ದು ಇಂಥವುಗಳನ್ನು ನಿಷೇಧಿಸಬೇಕೆಂದು ಸಾಮಾಜಿಕ ಕಾರ್ಯಕರ್ತರು ಒತ್ತಾಯಿಸಿದ್ದಾರೆ.

ಕೊಪ್ಪಳ ಜಿಲ್ಲೆಯ ಕನಕಗಿರಿ ತಾಲ್ಲೂಕಿನ ಘಡಿವಾಡಿಕಿ ಗ್ರಾಮದಲ್ಲಿ ಸೋಮವಾರ ಇಂತಹ ಘಟನೆ ನಡೆದಿದೆ. ಕೆಲವು ಹಳ್ಳಿಗಳಲ್ಲಿ ಇದು ಬಹಳ ಹಿಂದಿನಿಂದಲೂ ನಡೆದು ಬಂದಿರುವ ಸಂಪ್ರದಾಯವಾಗಿದ್ದರೂ, ಆರೋಗ್ಯ ತಜ್ಞರು ಇಂತಹ ಪದ್ಧತಿಗಳನ್ನು ಮರುಪರಿಶೀಲಿಸಬೇಕು ಎಂದು ಒತ್ತಿ ಹೇಳಿದ್ದಾರೆ. ಮಕ್ಕಳಿಗೆ ಆಗುವ ಸಂಭಾವ್ಯ ಹಾನಿಯನ್ನು ಅವರು ಒತ್ತಿಹೇಳುತ್ತಾರೆ.

ಘಡಿವಾಡಿಕಿಯಲ್ಲಿ ಮಹಾಲಕ್ಷ್ಮಿ ದೇವಿಯ ವಾರ್ಷಿಕ ಜಾತ್ರೆಯ ಸಮಯದಲ್ಲಿ, ರಥದ ಮೇಲೆ ಕುಳಿತಿರುವ ಪುರೋಹಿತರು ಶಿಶುಗಳನ್ನು ಕೆಳಗೆ ಎಸೆಯುತ್ತಾರೆ. ಆಗ ಗ್ರಾಮಸ್ಥರು ಕಂಬಳಿಗಳನ್ನು ಹಿಡಿದು ಶಿಶುಗಳನ್ನು ರಕ್ಷಿಸುತ್ತಾರೆ. ದೇವಿಯ ಆಶೀರ್ವಾದ ಪಡೆಯಲು ಈ ಆಚರಣೆಯನ್ನು ಪ್ರತಿ ವರ್ಷ ನಡೆಸಲಾಗುತ್ತದೆ ಎಂಬ ನಂಬಿಕೆ ಇಲ್ಲಿನ ಜನರದ್ದು.

ಹಿಂದೆ, ಪುರೋಹಿತರು ಮಕ್ಕಳನ್ನು 20 ಅಡಿ ಎತ್ತರದಿಂದ ಎಸೆಯುತ್ತಿದ್ದರು, ಆದರೆ ಈಗ ಅವರು ಅದನ್ನು 6 ಅಡಿ ಎತ್ತರದಿಂದ ಮಾಡುತ್ತಾರೆ. ಎರಡು ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಮಕ್ಕಳಿಗೆ ಈ ಪದ್ಧತಿ ಒಳ್ಳೆಯದಲ್ಲ ಎಂದು ತಜ್ಞರು ಹೇಳುತ್ತಾರೆ. ಇದು ನವಜಾತ ಶಿಶುಗಳಿಗೆ ಆರೋಗ್ಯ ಮತ್ತು ಅದೃಷ್ಟವನ್ನು ತರುತ್ತದೆ ಎಂದು ಗ್ರಾಮಸ್ಥರು ನಂಬುತ್ತಾರೆ.

ಘಡಿವಾಡಿಕಿ ವಾರ್ಷಿಕ ಜಾತ್ರೆಯು ಕರ್ನಾಟಕ ಮತ್ತು ನೆರೆಯ ರಾಜ್ಯಗಳ ಭಕ್ತರನ್ನು ಆಕರ್ಷಿಸುತ್ತದೆ. ಬಾಗಲಕೋಟೆ ಜಿಲ್ಲೆಯ ನಾಗರಾಲ್ ಗ್ರಾಮ ಮತ್ತು ಉತ್ತರ ಕರ್ನಾಟಕದ ಇತರ ಕೆಲವು ಹಳ್ಳಿಗಳಲ್ಲಿ ಸುಮಾರು ಹತ್ತು ವರ್ಷಗಳ ಹಿಂದೆ ಶಿಶು ಎಸೆಯುವ ಆಚರಣೆಯನ್ನು ಕಾರ್ಯಕರ್ತರು ವಿರೋಧಿಸಿದ್ದರು. ಈ ಪ್ರದೇಶದ ಅನೇಕ ಸ್ಥಳಗಳಲ್ಲಿ ಈ ಆಚರಣೆ ನಡೆಯುತ್ತಿದೆ ಎಂದು ಅವರು ಹೇಳುತ್ತಾರೆ, ಆದರೆ ಯಾರೂ ಅದನ್ನು ತಡೆಯಲು ಪ್ರಯತ್ನಿಸುವುದಿಲ್ಲ.

ಉತ್ತರ ಕರ್ನಾಟಕದ ಎಲ್ಲಾ ಜಿಲ್ಲಾಡಳಿತಗಳು ಈ ಆಚರಣೆಯ ಬಗ್ಗೆ ನಿಗಾ ಇರಿಸಿ ಅದನ್ನು ಕೊನೆಗೊಳಿಸಬೇಕೆಂದು ಕಾರ್ಯಕರ್ತರು ಒತ್ತಾಯಿಸಿದ್ದಾರೆ. ಅಧಿಕಾರಿಗಳು ಇದನ್ನು ತಡೆಯಲು ಪ್ರಯತ್ನಿಸಿದರೂ, ಭಕ್ತರು ಅದರಲ್ಲಿ ಪಾಲ್ಗೊಳ್ಳುತ್ತಲೇ ಇದ್ದಾರೆ.

ಕನಕಗಿರಿ ಬಳಿಯ ಗ್ರಾಮಸ್ಥರಾದ ಶರಣಪ್ಪ ಹುಯಿಲ್ಗೋಳ್, ಮಕ್ಕಳಿಗೆ ಏನಾಗುತ್ತದೆಯೋ ಎಂದು ನಮಗೆ ಭಯವಾಗಿದೆ. ಗಾಳಿಯಲ್ಲಿ ಎಸೆಯಲ್ಪಟ್ಟಾಗ ಮಕ್ಕಳು ಭಯಭೀತರಾಗುತ್ತಾರೆ ಮತ್ತು ಅಳುತ್ತಾರೆ. ಕಳೆದ ಮೂರು ದಶಕಗಳಲ್ಲಿ ಬಾಗಲಕೋಟೆ, ಕೊಪ್ಪಳ ಮತ್ತು ಬಳ್ಳಾರಿ ಜಿಲ್ಲೆಗಳಲ್ಲಿ ಇಂತಹ ಆಚರಣೆಗಳನ್ನು ನಾವು ನೋಡಿದ್ದೇವೆ. ಈಗ ಕೊಪ್ಪಳ ಗ್ರಾಮದಲ್ಲಿ, ಪುರೋಹಿತರು ಶಿಶುಗಳನ್ನು ಕಡಿಮೆ ಎತ್ತರದಿಂದ ಮತ್ತು ಎಚ್ಚರಿಕೆಯಿಂದ ಎಸೆಯುತ್ತಾರೆ, ಆದರೆ ಈ ಆಚರಣೆ ಒಳ್ಳೆಯದಲ್ಲ, ನಿಷೇಧಿಸಬೇಕು ಎನ್ನುತ್ತಾರೆ.

ಕೊಪ್ಪಳ ಜಿಲ್ಲಾಡಳಿತದ ಅಧಿಕಾರಿಯೊಬ್ಬರು, ನಮಗೆ ಈ ಆಚರಣೆ ಬಗ್ಗೆ ತಿಳಿದಿಲ್ಲ. ಪರಿಶೀಲಿಸಿ ಅದಕ್ಕೆ ಅನುಗುಣವಾಗಿ ಕಾರ್ಯನಿರ್ವಹಿಸುತ್ತೇವೆ ಎಂದರು.

ಗಂಭೀರ ಮೆದುಳಿನ ಕಾಯಿಲೆ

ಈ ಆಚರಣೆಯು ಅದೃಷ್ಟ ಮತ್ತು ಉತ್ತಮ ಆರೋಗ್ಯವನ್ನು ತರುತ್ತದೆ ಎಂದು ಹಳ್ಳಿಗಳಲ್ಲಿ ನಂಬಲಾಗಿದ್ದರೂ, ವೈದ್ಯರು ಇದು ಜೀವಕ್ಕೆ ಅಪಾಯಕಾರಿ ಎನ್ನುತ್ತಾರೆ. ಆಸ್ಟರ್ ಸಿಎಂಐ ಆಸ್ಪತ್ರೆಯ ನವಜಾತ ಶಿಶುಶಾಸ್ತ್ರ ಮತ್ತು ಮಕ್ಕಳ ವೈದ್ಯರ ಹಿರಿಯ ಸಲಹೆಗಾರ್ತಿ ಡಾ. ಪರಿಮಳ ವಿ ತಿರುಮಲೇಶ್, ಶಿಶುಗಳನ್ನು ಎಸೆಯುವುದು ಮೆದುಳಿನ ಬೆಳವಣಿಗೆ ಮತ್ತು ಒಟ್ಟಾರೆ ಆರೋಗ್ಯದ ಮೇಲೆ ಗಂಭೀರ ಪರಿಣಾಮಗಳನ್ನು ಬೀರುತ್ತದೆ ಎನ್ನುತ್ತಾರೆ.

ಶಿಶುವಿನ ಮೆದುಳು ಸೂಕ್ಷ್ಮವಾಗಿದ್ದು, ಮೃದು ಅಂಗಾಂಶಗಳು ಇನ್ನೂ ಬೆಳವಣಿಗೆ ಹಂತದಲ್ಲಿರುವುದರಿಂದ ಕುತ್ತಿಗೆಯ ಸ್ನಾಯುಗಳು ದುರ್ಬಲವಾಗಿರುತ್ತವೆ, ಇದರಿಂದಾಗಿ ಪುಟ್ಟ ಮಕ್ಕಳನ್ನು ಎಸೆದಾಗ ಮೆದುಳಿಗೆ ಹಾನಿಯಾಗಬಹುದು. ವೇಗವಾಗಿ ಹಿಂದಕ್ಕೆ ಮತ್ತು ಮುಂದಕ್ಕೆ ಚಲನೆಯಿಂದಾಗಿ ಆಂತರಿಕ ರಕ್ತಸ್ರಾವ, ನರ ಹಾನಿ ಮತ್ತು ಊತಕ್ಕೆ ಕಾರಣವಾಗಬಹುದು.

ಯಾವುದೇ ಗೋಚರ ಗಾಯಗಳಿಲ್ಲದಿದ್ದರೂ ಸಹ, ಮೆದುಳಿನ ಅಂಗಾಂಶಗಳಲ್ಲಿನ ನ್ಯೂನತೆ ಮಗು ಬೆಳೆದಂತೆ ಅರಿವಿನ ಸಾಮರ್ಥ್ಯಗಳು, ಕೌಶಲ್ಯಗಳು ಮತ್ತು ಕಲಿಕೆಯ ಮೇಲೆ ಪರಿಣಾಮ ಬೀರುತ್ತದೆ ಎಂದು ವಿವರಿಸಿದರು. ಎಸೆಯುವುದು ಅಥವಾ ಅಂತಹ ಯಾವುದೇ ಹಠಾತ್ ಚಲನೆಯು ಆಘಾತಗಳ ಅಪಾಯವನ್ನು ಹೆಚ್ಚಿಸುತ್ತದೆ ಎಂದು ವೈದ್ಯರು ಒತ್ತಿ ಹೇಳುತ್ತಾರೆ, ಇದು ಸ್ಮರಣಶಕ್ತಿ, ಸಮನ್ವಯ ಮತ್ತು ಮೆದುಳಿನ ಕಾರ್ಯನಿರ್ವಹಣೆಯ ಮೇಲೆ ಪರಿಣಾಮ ಬೀರುತ್ತದೆ.

ಶಿಶುವಿನ ನರ ಸಂಪರ್ಕಗಳು ಇನ್ನೂ ರೂಪುಗೊಳ್ಳುತ್ತಿರುವುದರಿಂದ, ಯಾವುದೇ ಹಠಾತ್ ಆಘಾತವು ಬೆಳವಣಿಗೆಯನ್ನು ಅಡ್ಡಿಪಡಿಸಬಹುದು, ಇದು ಕಲಿಕೆಯ ತೊಂದರೆಗಳು ಮತ್ತು ಏಕಾಗ್ರತೆ ಮೇಲೆ ಪರಿಣಾಮವನ್ನುಂಟುಮಾಡಬಹುದು. ಮೆದುಳಿನ ಗಾಯಗಳ ಜೊತೆಗೆ, ಈ ಚಲನೆಗಳು ಶಿಶುವಿನ ಬೆನ್ನುಮೂಳೆಯನ್ನು ಸಹ ಒತ್ತಡಕ್ಕೆ ಒಳಪಡಿಸಬಹುದು, ಇದು ಬೆನ್ನುಮೂಳೆಯ ಹಾನಿಯ ಅಪಾಯವನ್ನು ಹೆಚ್ಚಿಸುತ್ತದೆ. ತೀವ್ರತರವಾದ ಸಂದರ್ಭಗಳಲ್ಲಿ, ಎಸೆಯುವಿಕೆಯಿಂದ ಉಂಟಾಗುವ ಆಘಾತವು ಉಸಿರಾಟದ ಸಮಸ್ಯೆಗಳನ್ನು ಉಂಟುಮಾಡಬಹುದು ಎಂದು ವೈದ್ಯರು ಹೇಳುತ್ತಾರೆ.