ಬೆಂಗಳೂರು: ಅಲ್ಪಸಂಖ್ಯಾತ, ಹಿಂದುಳಿದ ಮತ್ತು ದಲಿತ ವರ್ಗಗಳ ನಾಯಕರೆಂದೇ ಪ್ರಸಿದ್ದವಾಗಿರುವ ಸಿಎಂ ಸಿದ್ದರಾಮಯ್ಯ ಬಜೆಟ್‌ ಮಂಡನೆಯಲ್ಲಿಯೂ ಅಹಿಂತ ಮಂತ್ರವನ್ನು ಜಪಿಸಿದ್ದಾರೆ.

2026–27ರ ಬಜೆಟ್‌ನಲ್ಲಿ ರಾಜ್ಯದ ಅಹಿಂದ ವರ್ಗಗಳ ಕಲ್ಯಾಣಕ್ಕಾಗಿ ಸಿದ್ದರಾಮಯ್ಯ ಅವರು 44,632 ಕೋಟಿ ರೂ. ಅನುದಾನ ಮೀಸಲಿಟ್ಟಿದ್ದಾರೆ.

ಪ್ರಸಕ್ತ ಸಾಲಿನ ರಾಜ್ಯ ಬಜೆಟ್‌ನಲ್ಲಿ ಸಮಾಜ ಕಲ್ಯಾಣ, ಪರಿಶಿಷ್ಟ ಪಂಗಡಗಳ ಕಲ್ಯಾಣ, ಹಿಂದುಳಿದ ವರ್ಗಗಳ ಕಲ್ಯಾಣ ಮತ್ತು ಅಲ್ಪಸಂಖ್ಯಾತರ ಕಲ್ಯಾಣ ಇಲಾಖೆಗಳಲ್ಲಿ ಶಿಕ್ಷಣ, ಜೀವನೋಪಾಯ ಮತ್ತು ಸಾಂಸ್ಥಿಕ ಸುಧಾರಣೆಗಳನ್ನು ಒಳಗೊಂಡಂತೆ ಭರ್ಜರಿ ಘೋಷಣೆಗಳನ್ನು ಮಾಡಲಾಗಿದೆ.

ವಿದ್ಯಾರ್ಥಿಗಳಿಗೆ ವಸತಿ ಮತ್ತು ಶಾಲೆಗಳು

• ನಾಲ್ಕು ಇಲಾಖೆಗಳಡಿ 187 ಹೊಸ ಪೋಸ್ಟ್ ಮ್ಯಾಟ್ರಿಕ್ ವಸತಿ ನಿಲಯಗಳನ್ನು ಆರಂಭಿಸಲಾಗುತ್ತದೆ.

• ರಾಜ್ಯದ 6,562 ವಸತಿ ನಿಲಯಗಳಲ್ಲಿ ವಾಸಿಸುವ 8.50 ಲಕ್ಷ ವಿದ್ಯಾರ್ಥಿಗಳ ನಿರ್ವಹಣಾ ವ್ಯವಸ್ಥೆಯನ್ನು ಸುಧಾರಿಸಲು ಉನ್ನತ ಮಟ್ಟದ ಸಮಿತಿ ರಚನೆ.

• ವಸತಿ ನಿಲಯಗಳ ನಿರ್ವಹಣಾ ವೆಚ್ಚ ಹೆಚ್ಚಿಸಲು ರೂ.56 ಕೋಟಿ ಹೆಚ್ಚುವರಿ ಅನುದಾನ ಹಾಗೂ ಮೂಲಸೌಕರ್ಯ ಅಭಿವೃದ್ಧಿಗೆ ರೂ.25 ಕೋಟಿ ಮೀಸಲಿಡಲಾಗಿದೆ.

• ರಾಜ್ಯದ ವಿವಿಧ ಹೋಬಳಿಗಳಲ್ಲಿ 40 ಹೊಸ ವಸತಿ ಶಾಲೆಗಳು ಆರಂಭವಾಗಲಿದ್ದು, 31 ಶಾಲೆಗಳನ್ನು ಪಿಯು ಕಾಲೇಜು ಮಟ್ಟಕ್ಕೆ ಮೇಲ್ದರ್ಜೆಗೇರಿಸಲಾಗುತ್ತದೆ. ಜೊತೆಗೆ ಕರ್ನಾಟಕ ವಸತಿ ಶಿಕ್ಷಣ ಸಂಸ್ಥೆಗಳ ಸೊಸೈಟಿ (KREIS) ಅಡಿಯಲ್ಲಿ 660 ಕೋಟಿ ರೂ. ವೆಚ್ಚದಲ್ಲಿ ಮೂವತ್ತು ಹೊಸ ಶಾಲೆಗಳನ್ನು ನಿರ್ಮಿಸಲಾಗುವುದು. ಈ ವಸತಿ ಶಾಲೆಗಳಲ್ಲಿ 50 ಕೋಟಿ ರೂ. ವೆಚ್ಚದಲ್ಲಿ ಶೈಕ್ಷಣಿಕ ಮೂಲಸೌಕರ್ಯ ಮತ್ತು ಇತರ ಮೂಲಭೂತ ಸೌಕರ್ಯಗಳನ್ನು ಒದಗಿಸಲಾಗುವುದು.

• ನಾಲ್ಕು KREIS ಶಾಲೆಗಳನ್ನು NEET, JEE ಮತ್ತು K-CET ತರಬೇತಿ ಕೇಂದ್ರಗಳಾಗಿ ಅಭಿವೃದ್ಧಿಪಡಿಸಲಾಗುತ್ತದೆ.

• ಕಲಬುರಗಿ, ವಿಜಯಪುರ, ಬೆಳಗಾವಿ ಮತ್ತು ಕೋಲಾರದಲ್ಲಿ ಅಂಬೇಡ್ಕರ್ ಅವರ ಹೆಸರಿನ ನಾಲ್ಕು CBSE ವಸತಿ ಶಾಲೆಗಳನ್ನು ಸ್ಥಾಪಿಸಲಾಗುವುದು.

ಹೊಸ ಸಂಸ್ಥೆಗಳು

• ಅರಣ್ಯ ಪ್ರದೇಶಗಳ ಬಳಿ ವಾಸಿಸುವ ಇರುಳ, ಸೋಲಿಗ, ಜೆನುಕುರುಬ, ಕಡುಕುರುಬ, ಕುಡಿಯ ಮತ್ತು ಸಿದ್ದಿ ಸೇರಿದಂತೆ ವಿವಿಧ ಜನಜಾತಿಗಳ ಅಭಿವೃದ್ಧಿಗಾಗಿ ಕರ್ನಾಟಕ ಆದಿವಾಸಿ ಅಭಿವೃದ್ಧಿ ನಿಗಮ ಸ್ಥಾಪಿಸಲಾಗುತ್ತದೆ.

• ಇದಲ್ಲದೆ, ಪರಿಶಿಷ್ಟ ಜನಾಂಗಗಳ ಸಮಸ್ಯೆಗಳನ್ನು ಪರಿಹರಿಸಲು ಪ್ರತ್ಯೇಕ ಎಸ್‌ಟಿ ಆಯೋಗ ರಚಿಸಲಾಗುತ್ತದೆ. ಸಾಮಾಜಿಕ ಕಲ್ಯಾಣ ಇಲಾಖೆಯಡಿ ಬೌದ್ಧ ಅಭಿವೃದ್ಧಿ ನಿಗಮ ಸ್ಥಾಪನೆಯನ್ನೂ ಬಜೆಟ್ ನಲ್ಲಿ ಘೋಷಿಸಲಾಗಿದೆ.

• ಜೈನ, ಬೌದ್ಧ ಮತ್ತು ಸಿಖ್ ಸಮುದಾಯಗಳ ಸಮಗ್ರ ಅಭಿವೃದ್ಧಿಗೆ ರೂ.100 ಕೋಟಿ ಅನುದಾನ ಮೀಸಲಿಡಲಾಗಿದೆ.

ಉದ್ಯೋಗ ಮತ್ತು ಸ್ವಯಂ ಉದ್ಯೋಗ ಯೋಜನೆ

• ಗಂಗಾ ಕಲ್ಯಾಣ ಯೋಜನೆಯಡಿ ಬೋರ್‌ವೆಲ್ ವಿದ್ಯುತ್ ಸಂಪರ್ಕಕ್ಕೆ ನೀಡುವ ಸಹಾಯಧನವನ್ನು ರೂ.75,000ರಿಂದ ರೂ.1.50 ಲಕ್ಷಕ್ಕೆ ಹೆಚ್ಚಿಸಲಾಗಿದೆ.

• ಮಡಿವಾಳ ಸಮುದಾಯದವರಿಗಾಗಿ ಬೆಂಗಳೂರು ಮತ್ತು ಮೈಸೂರು ನಗರಗಳಲ್ಲಿ ಆಧುನಿಕ ಧೋಬಿಘಾಟ್‌ಗಳಲ್ಲಿ ಲಾಂಡ್ರಿ ಕೇಂದ್ರಗಳನ್ನು ಸ್ಥಾಪಿಸಲಾಗುತ್ತದೆ. ಇದಕ್ಕಾಗಿ ರೂ.5 ಲಕ್ಷವರೆಗೆ ಶೇ.4ರಷ್ಟು ಬಡ್ಡಿದರದಲ್ಲಿ ಸಾಲ ನೀಡಲಾಗುತ್ತದೆ.

• ಸವಿತಾ ಸಮುದಾಯದವರಿಗೆ ಸಲೂನ್ ಆರಂಭಿಸಲು ರೂ.10 ಲಕ್ಷವರೆಗೆ ಶೇ.4ರಷ್ಟು ಬಡ್ಡಿದರದಲ್ಲಿ ಸಾಲ ನೀಡಲಾಗುತ್ತದೆ. ನಿರುದ್ಯೋಗಿ ಎಸ್‌ಟಿ ಮತ್ತು ಅಲ್ಪಸಂಖ್ಯಾತ ಯುವಕರಿಗೆ ಶೇ.75 ಸಹಾಯಧನದಲ್ಲಿ ಫಾಸ್ಟ್ ಫುಡ್ ಟ್ರಕ್ ಟ್ರೈಲರ್ ಮತ್ತು ಮೊಬೈಲ್ ಕಿಚನ್ ಕಿಯೋಸ್ಕ್‌ಗಳು ನೀಡಲಾಗುತ್ತವೆ.

ಅಲ್ಪಸಂಖ್ಯಾತರ ಕಲ್ಯಾಣ

• 2026–27ರಲ್ಲಿ 25 ಹೊಸ ಸಂತ ಶಿಶುನಾಳ ಶರೀಫ್ ವಸತಿ ಶಾಲೆಗಳು ಆರಂಭಿಸಲಾಗುತ್ತವೆ. ಜೊತೆಗೆ ಹುಬ್ಬಳ್ಳಿ ಮತ್ತು ಕಲಬುರಗಿ ನಗರಗಳಲ್ಲಿ ಹಜ್ ಭವನಗಳನ್ನು ನಿರ್ಮಿಸಲಾಗುತ್ತದೆ.

• ಅಲ್ಪಸಂಖ್ಯಾತ ಸಮುದಾಯದ 5,000 ಪ್ರತಿಭಾವಂತ ವಿದ್ಯಾರ್ಥಿಗಳಿಗೆ ಲ್ಯಾಪ್‌ಟಾಪ್ ಖರೀದಿಗೆ ತಲಾ ರೂ.50,000 ಸಹಾಯಧನ ನೀಡಲಾಗುತ್ತದೆ.

ಇತರೆ ಘೋಷಣೆಗಳು

• ಎಸ್‌ಸಿ ಮತ್ತು ಎಸ್‌ಟಿ ಮಹಿಳೆಯರಿಗಾಗಿ ಆರು ನಗರಗಳಲ್ಲಿ 10 ಕಾರ್ಯನಿರತ ಮಹಿಳಾ ವಸತಿ ನಿಲಯಗಳು ನಿರ್ಮಿಸಲಾಗುತ್ತದೆ. ವಾಲ್ಮಿಕಿ ಅವರ ಹೆಸರಿನಲ್ಲಿ ಬೆಂಗಳೂರುದಲ್ಲಿ ರೂ.50 ಕೋಟಿ ವೆಚ್ಚದಲ್ಲಿ ‘ಶ್ರೀ ಮಹರ್ಷಿ ವಾಲ್ಮೀಕಿ ಆಡಳಿತ ಸೌಧ’ ನಿರ್ಮಿಸಲಾಗುತ್ತದೆ.

• ಇದಲ್ಲದೆ ಕಲ್ಯಾಣ ನಿಗಮಗಳಿಗೆ ರೂ.1,500 ಕೋಟಿ ಅನುದಾನ ನೀಡಲಾಗಿದ್ದು, ನಾಲ್ಕು ಇಲಾಖೆಗಳಲ್ಲಿನ 2,500 ಖಾಲಿ ಹುದ್ದೆಗಳನ್ನು ಭರ್ತಿ ಮಾಡುವುದಾಗಿ ಸರ್ಕಾರ ಘೋಷಿಸಿದೆ.