ನವದೆಹಲಿ: "ಕೋಪಗೊಳ್ಳುವುದಕ್ಕೆ ಹಲವಾರು ಕಾರಣಗಳಿರುತ್ತವೆ, ಈ ಪೈಕಿ ಕಡಿಮೆ ನಿದ್ದೆ ಮಾಡುವುದೂ ಸಹ ಒಂದು ಅಂದರೆ ನೀವು ನಂಬಲೇಬೇಕು" ಹೀಗಂತ ಅಮೆರಿಕದ ರಾಜ್ಯ ವಿಶ್ವವಿದ್ಯಾನಿಲಯ ಸಂಶೋಧನೆ ಹೇಳುತ್ತಿದೆ. 

ಎಕ್ಸ್ಪರಿಮೆಂಟಲ್ ಸೈಕಾಲಜಿ: ಜನರಲ್ ಜರ್ನಲ್ ನಲ್ಲಿ ಸಂಶೋಧನಾ ವರದಿ ಪ್ರಕಟವಾಗಿದ್ದು, ಕಡಿಮೆ ನಿದ್ದೆ ಮಾಡುವುದೂ ಸಹ  ಕೋಪಗೊಳ್ಳುವುದಕ್ಕೆ ಕಾರಣ ಎಂದು ಹೇಳಿದೆ. ಇದರ ಹೊರತಾಗಿಯೂ ಅನೇಕ ಅಧ್ಯಯನ ವರದಿಗಳು ನಿದ್ದೆ ಹಾಗೂ ಕೋಪಕ್ಕೆ ಸಂಬಂಧವಿದೆ ಎಂದು ಹೇಳಿವೆ, ಆದರೆ ಕೋಪಗೊಳ್ಳುವುದಕ್ಕೆ ಕಡಿಮೆ ನಿದ್ದೆ ಕಾರಣವೋ ಅಥವಾ, ನಿದ್ದೆ ಹಾಳಾಗುವುದಕ್ಕೆ ಕೋಪ ಕಾರಣವೋ ಎಂಬ ಬಗ್ಗೆ ಪ್ರಶ್ನೆಗಳು ಹಾಗೆಯೇ ಉಳಿದಿವೆ ಎಂದು ಪ್ರೊಫೆಸರ್ ಝ್ಲಾಟನ್ ಕಿರಿಸನ್ ಹೇಳಿದ್ದಾರೆ. 

ದಣಿದ ಸಂದರ್ಭದಲ್ಲಿ ಕಿರಿಕಿರಿಯ ಪರಿಸ್ಥಿತಿಗಳಲ್ಲಿ ಓರ್ವ ವ್ಯಕ್ತಿಯ ಹೊಂದಾಣಿಕೆ ಸಾಮರ್ಥ್ಯದ ಬಗ್ಗೆ ತಿಳಿದುಕೊಳುವುದಕ್ಕೆ ಈ ಸಂಶೋಧನೆ ಸಹಕಾರಿ ಎಂದು ಪ್ರೊಫೆಸರ್ ಗಳು ಹೇಳಿದ್ದಾರೆ.  ಅಧ್ಯಯನದ ಭಾಗವಾಗಿದ್ದವರಲ್ಲಿ ಕೆಲವರಿಗೆ ನಿದ್ದೆಗೆ ನಿರ್ಬಂಧ ವಿಧಿಸಲಾಗುತ್ತಿತ್ತು. ಈ ವೇಳೆ ಅವರ ಅವರ ಕೋಪವೂ ಹೆಚ್ಚಾಗುತ್ತಿತ್ತು. ಇದನ್ನೇ ಕಿರಿಕಿರಿ ಪರಿಸ್ಥಿತಿಗಳಲ್ಲಿ ಓರ್ವ ವ್ಯಕ್ತಿಯ ಹೊಂದಾಣಿಕೆ ಸಾಮಾರ್ಥ್ಯದೊಂದಿಗೆ ಹೋಲಿಕೆ ಮಾಡಲಾಯಿತು. ಮತ್ತೊಂದು ಗುಂಪಿಗೆ ಸಾಮಾನ್ಯವಾಗಿ ನಿದ್ದೆ ಮಾಡಲು ಅವಕಾಶ ನೀಡಲಾಗಿತ್ತು.  ಆದರೆ ನಿದ್ದೆ ಕಡಿಮೆಯಾದವರಲ್ಲಿ ಹೆಚ್ಚು ಬದಲಾವಣೆ ಕಂಡುಬಂದಿತ್ತು ಎಂದು ಝ್ಲಾಟನ್ ಕಿರಿಸನ್ ತಿಳಿಸಿದ್ದಾರೆ.