ನವದೆಹಲಿ: ಮಾಹಿತಿ ಹಕ್ಕು ಕಾಯ್ದೆ(ಆರ್‌ಟಿಐ)ಯನ್ವಯ ಸಲ್ಲಿಸಲಾದ ಅರ್ಜಿಗೆ ಉತ್ತರಿಸುವಾಗ ನಿರ್ದಿಷ್ಟ ನಮೂನೆಯನ್ನೇ ಬಳಸಬೇಕಾದ ಅಗತ್ಯವಿಲ್ಲ. ಆದರೆ ಕೇಂದ್ರ ಸಾರ್ವಜನಿಕ ಮಾಹಿತಿ ಅಧಿಕಾರಿಗಳು ಅರ್ಜಿಗೆ ಉತ್ತರ ನೀಡುವಾಗ ಕಡ್ಡಾಯವಾಗಿ ಇ-ಮೇಲೆ ವಿಳಾಸ ಮತ್ತು ದೂರವಾಣಿ ಸಂಖ್ಯೆಯನ್ನು ನಮೂದಿಸಬೇಕು.

ಹೀಗೆಂದು ಸರ್ಕಾರ ನೇಮಕ ಮಾಡಿರುವ ಮೂವರು ಸದಸ್ಯರ ಸಮಿತಿ ಹೇಳಿದೆ. ಆರ್‌ಟಿಐ ಉತ್ತರಗಳಿಗೆ ಹೊಸ ನಮೂನೆ ಬಳಸುವ ವಿಚಾರದಲ್ಲಿ ಶಿಫಾರಸು ಮಾಡಲೆಂದು ಸರ್ಕಾರವು ಈ ಸಮಿತಿಯನ್ನು ರಚಿಸಿತ್ತು.

ಈ ಬಗ್ಗೆ ಸಲಹೆ ನೀಡುರವ ಸಮಿತಿಯು, ಆರ್‌ಟಿಐ ಅರ್ಜಿಗಾಗಲೀ, ಉತ್ತರಕ್ಕಾಗಲೀ ನಿಗದಿತ ನಮೂನೆಯೇ ಬಳಸಬೇಕೆಂದು ಕಡ್ಡಾಯಗೊಳಿಸಬೇಕಿಲ್ಲ. ಆರ್‌ಟಿಐ ಕಾಯ್ದೆಯಲ್ಲಿ ಅಂತಹ ನಿಬಂಧನೆಗಳೂ ಇಲ್ಲ ಎಂದಿದೆ. ಆದರೆ, ಕೇಂದ್ರ ಸಾರ್ವಜನಿಕ ಮಾಹಿತಿ ಅಧಿಕಾರಿಗಳು(ಸಿಪಿಐಒ) ಪಾಲಿಸಬೇಕಾದ ಕೆಲವು ಕಡ್ಡಾಯ ನಿಯಮಗಳನ್ನು ಸಮಿತಿ ಉಲ್ಲೇಖಿಸಿದೆ.

ಸಮಿತಿ ಸಲಹೆಗಳೇನು?

• ಅರ್ಜಿಗಳಿಗೆ ಉತ್ತರಿಸುವಾಗ ಅದರಲ್ಲಿ ಮಾಹಿತಿ ಅಧಿಕಾರಿಯ ಹೆಸರು, ಹುದ್ದೆ, ಅಧಿಕೃತ ದೂರವಾಣಿ ಸಂಖ್ಯೆ, ಇಮೇಲ್ ಐಡಿಯನ್ನು ಸ್ಪಷ್ಟವಾಗಿ ಬರೆದಿರಬೇಕು.
• ಮಾಹಿತಿ ನೀಡಲು ನಿರಾಕರಿಸುವುದಿದ್ದರೆ, ಆರ್‌ಟಿಐ ಕಾಯ್ದೆಯ ಸೆಕ್ಷನ್ ಅನ್ನು ಉಲ್ಲೇಖಿಸುವ ಮೂಲಕ ಅರ್ಜಿ ತಿರಸ್ಕೃತಗೊಳ್ಳಲು ಕಾರಣವೇನು ಎಂಬುದನ್ನು ತಿಳಿಸಬೇಕು.
• ಒಂದು ವೇಳೆ ಅರ್ಜಿಯನ್ನು ಬೇರೆ ಪ್ರಾಧಿಕಾರಕ್ಕೆ ಕಳುಹಿಸಿದ್ದರೆ ಅದರ ವಿವರವನ್ನೂ ನೀಡಬೇಕು.
• ಅರ್ಜಿದಾರನು ಯಾವುದಾದರೂ ದಾಖಲೆಗಳನ್ನು ಕೇಳಿದ್ದರೆ, ಅವುಗಳಿಗೆ ಸಿಪಿಐಒ ತನ್ನ ಹೆಸರಿರುವ ಮುದ್ರೆ ಒತ್ತಬೇಕು. ಜತೆಗೆ, ದಾಖಲೆಗಳನ್ನು ಲಗತ್ತಿಸಲಾಗಿದೆ ಎಂದು ಬರೆಯಬೇಕು.