ನವದೆಹಲಿ: ಹಮಾರಾ ಬಜಾಜ್ ಜಾಹೀರಾತು ಯಾರಿಂದಾದರೂ ಮರೆಯಲು ಸಾಧ್ಯವೇ?

80-90ರ ದಶಕದಲ್ಲಿ ಮನೆಗೊಂದರಂತೆ ಕಾಣಿಸಿಕೊಳ್ಳುತ್ತಿದ್ದ ಬಜಾಜ್ ಸ್ಕೂಟರುಗಳು ಆಟೋಮೊಬೈಲ್ ಜಗತ್ತಿನಲ್ಲಿ ನಡೆದ ಫೋರ್ ಸ್ಟ್ರೋಕ್ ಎಂಜಿನ್ ವಾಹನಗಳ ಅಬ್ಬರಕ್ಕೆ ತತ್ತರಿಸಿ ನೇಪಥ್ಯಕ್ಕೆ ಸರಿದು ಹೋಗಿದ್ದವು. ಆದರೆ ಆ ದಿನಗಳು ಮತ್ತೆ ಮರುಕಳಿಸುವ ಸೂಚನೆ ಕಂಡುಬರುತ್ತಿವೆ.

ವೆಸ್ಪಾ ಸ್ಕೂಟರ್ ಮಾರುಕಟ್ಟೆಗೆ ಬಂದು ಯಶಸ್ವಿಯಾದ ಬೆನ್ನಲ್ಲಿ ಈಗ ಬಜಾಬ್ ಚೇತಕ್ ಹೊಸರೂಪದಲ್ಲಿ ರಸ್ತೆಗಿಳಿಯುವ ಸಾಧ್ಯತೆ ಕಾಣಿಸುತ್ತಿದೆ. ಬಜಾಜ್ ಆಟೋಮೊಬೈಲ್ಸ್ ಕಂಪನಿ ತನ್ನ ಅತ್ಯಂತ ಜನಪ್ರಿಯ ಬ್ರಾಂಡ್ ಚೇತಕ್ ಹೆಸರನ್ನು ಮರು ನೋಂದಣಿ ಮಾಡಿಕೊಂಡಿರುವುದು ಆ ಗತವೈಭವವನ್ನು ಮತ್ತೆ ನೆನಪಿಸಿಕೊಳ್ಳುವಂತೆ ಮಾಡಿದೆ.

ಆದರೆ ಕಂಪನಿ ಚೇತಕ್ ಸ್ಕೂಟರ್‍ಗಳನ್ನು ಮತ್ತೆ ಉತ್ಪಾದಿಸುವ ಬಗ್ಗೆ ಖಚಿತ ಉತ್ತರ ನೀಡಿಲ್ಲ. ಸದ್ಯ ಚೇತಕ್ ಹೆಸರನ್ನು ಉಳಿಸಿಕೊಳ್ಳುವುದಕ್ಕೋಸ್ಕರ ಮರು ನೋಂದಣಿ ಮಾಡಿರುವುದಾಗಿ ಹೇಳಿರುವ ಬಜಾಜ್, ಮುಂದಿನ ನಡೆ ಬಗ್ಗೆ ಕಾದು ನೋಡಿ ಎಂದಷ್ಟೇ ಹೇಳಿದೆ.