ಲೂಧಿಯಾನ: ಸ್ವಾತಂತ್ರ್ಯ ದಿನಾಚರಣೆಗೆ ಇನ್ನು 3 ದಿನಗಳು ಬಾಕಿ ಇದ್ದು, ಪಂಜಾಬ್ ನ ಲೂಧಿಯಾನದಲ್ಲಿ 265 ಜೀವಂತ ಕಾರ್ಟ್ರಿಜ್ ಗಳು(ಸಿಡಿಮದ್ದು) ಪತ್ತೆಯಾಗಿವೆ.

ಲೂಧಿಯಾನದ ಕೆ.ವಿ.ಎಂ ಶಾಲೆಯ ಪ್ರದೇಶದಲ್ಲಿ ಕಾರ್ಟ್ರಿಜ್ ಗಳು ಕಂಡುಬಂದಿರುವುದು ಆತಂಕಕ್ಕೆ ಕಾರಣವಾಗಿದೆ. ಶಾಲಾ ವಾಹನದ ಸಿಬ್ಬಂದಿಗಳು ವಿದ್ಯಾರ್ಥಿಗಳನ್ನು ಕರೆತರಬೇಕಾದರೆ ಸಿಡಿಮದ್ದುಗಳನ್ನು ಶಾಲಾ ಆವರಣದಲ್ಲಿ ಗಮನಸಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಎಕೆ-47 ನ ವಿವಿಧ ಮಾದರಿಯ ರೈಫಿಲ್ ಗಳಿಗೆ ಬಳಸಬಹುದಾದ ಕಾರ್ಟ್ರಿಜ್ ಗಳನ್ನು ವಶಪಡಿಸಿಕೊಳ್ಳಲಾಗಿದೆ. ಈ ಬಗ್ಗೆ ತನಿಖೆ ನಡೆಸಲಾಗುತ್ತಿದೆ ಎಂದು ಲೂಧಿಯಾನದ ಎಸ್.ಹೆಚ್.ಒ ಗುರ್ಪ್ರೀತ್ ಸಿಂಗ್ ಮಾಧ್ಯಮಗಳಿಗೆ ತಿಳಿಸಿದ್ದಾರೆ. ಸ್ವಾತಂತ್ರ್ಯ ದಿನಾಚರಣೆಗೆ ಕೆಲವು ದಿನಗಳ ಮುನ್ನ ಸಿಡಿಮದ್ದುಗಳು ಪತ್ತೆಯಾಗಿರುವುದು ಶಾಲೆಯಲ್ಲಿ ಆತಂಕ ಮೂಡಿಸಿದೆ.