ನವದೆಹಲಿ: ದೆಹಲಿ ಶಾಸಕರ ಸಂಬಳ ಹೆಚ್ಚಳ ಮಾಡಿದಾಗ ಅದು ಪ್ರಧಾನಿ ನರೇಂದ್ರ ಮೋದಿಯವರ ಸಂಬಳದಿಂದಲೂ ಅಧಿಕವಾಗುವುದಾದರೆ, ಪ್ರಧಾನಿಯರ ಸಂಬಳವನ್ನು ಹೆಚ್ಚಳ ಮಾಡಿಸಬೇಕು ಎಂದು ದೆಹಲಿ ಮುಖ್ಯಮಂತ್ರಿ ಅರವಿಂದ ಕೇಜ್ರಿವಾಲ್ ಹೇಳಿದ್ದಾರೆ.

ದೆಹಲಿ ಶಾಸಕರ ಸಂಬಳವನ್ನು ನಾಲ್ಕು ಪಟ್ಟು ಹೆಚ್ಚಿಸುವ ದೆಹಲಿ ಸರ್ಕಾರದ ನಿರ್ಧಾರಕ್ಕೆ ಹಲವಾರು ಟೀಕೆಗಳು ವ್ಯಕ್ತವಾಗಿದ್ದವು. ಈ ಟೀಕೆಗಳಿಗೆ ಉತ್ತರಿಸಿದ ಕೇಜ್ರಿವಾಲ್ ಶಾಸಕರ ಸಂಬಳ ಪ್ರಧಾನಿಗಿಂತ ಅಧಿಕವಾಗಿದ್ದರೆ, ಪ್ರಧಾನಿ ಸಂಬಳ  ಹೆಚ್ಚಳ ಮಾಡಲಿ ಎಂದಿದ್ದಾರೆ. 

67 ಎಎಪಿ ಶಾಸಕರಿರುವ 70 ಸದಸ್ಯರ ದೆಹಲಿ ವಿಧಾನಸಭೆಯಲ್ಲಿ ಶಾಸಕರ ಮತ್ತು ಸಚಿವರ ಸಂಬಳ ವರ್ಧನೆಗೆ ಸಂಬಂಧಿಸಿದ ಮಸೂದೆಗೆ ಗುರುವಾರ ಅಂಗೀಕಾರ ಲಭಿಸಿತ್ತು. ಈ ಮಸೂದೆ ಪ್ರಕಾರ ರು. 12,000 ಸಂಬಳ ಪಡೆಯುತ್ತಿದ್ದ ಶಾಸಕರ ಸಂಬಳ ರು. 50,000 ಆಗಿ ಹೆಚ್ಚಳವಾಗಲಿದೆ. ಅಂದರೆ ವಾರ್ಷಿಕ ವರಮಾನ ರು. 88,000 ಇದ್ದದ್ದು ರು. 2.1 ಲಕ್ಷ ಆಗಲಿದೆ. 

ಆದಾಗ್ಯೂ, ಭ್ರಷ್ಟಾಚಾರವನ್ನು ಕಡಿಮೆಗೊಳಿಸುವುದಕ್ಕಾಗಿ ಶಾಸಕರ ಸಂಬಳ ಹೆಚ್ಚಳ ಮಾಡಲಾಗುತ್ತಿದೆ. ಆದರೆ ಭ್ರಷ್ಟಾಚಾರದಲ್ಲಿ ಯಾರಾದರೂ ತೊಡಗಿಕೊಂಡಿದ್ದರೆ ಅವರನ್ನು ಸುಮ್ಮನೆ ಬಿಡುವುದಿಲ್ಲ ಎಂದು ಕೇಜ್ರಿವಾಲ್ ಹೇಳಿದ್ದಾರೆ.

ತಿಂಗಳಿಗೆ 1 ಲಕ್ಷ ರು. ಸಂಬಳ ಹೇಗಿದೆ?  ಪ್ರಧಾನಿ ಮೋದಿಯವರ ಸಂಬಳ ಇದಕ್ಕಿಂತ ಕಡಿಮೆಯಾಗಿದ್ದರೆ, ಅವರ ಸಂಬಳವನ್ನು ಹೆಚ್ಜಳ ಮಾಡಬೇಕು. ಪ್ರಧಾನಿಯವರ ಸಂಬಳ ಹೆಚ್ಚಿಸುವಂತೆ ನಾವೆಲ್ಲರೂ ಒತ್ತಾಯಿಸುವೆವು ಎಂದು ದೆಹಲಿ ವಿಧಾನಸಭೆಯಲ್ಲಿ ಮಾತನಾಡಿದ ಕೇಜ್ರಿವಾಲ್ ಹೇಳಿದ್ದಾರೆ.