ಪೇಶಾವರ: ಇದೇ ಜನವರಿ 30 ರಂದು ಪಾಕಿಸ್ತಾನದ ಕರಾಚಿಯ ಮಸೀದಿಯೊಂದರ ಮೇಲೆ ನಡೆದ ಬಾಂಬ್ ಸ್ಫೋಟ ಪ್ರಕರಣ ಮಾಸುವ ಮುನ್ನವೇ ಇದೀಗ ಪೇಶಾವರದಲ್ಲಿ ಬಾಂಬ್ ಸ್ಫೋಟ ಸಂಭವಿಸಿದ್ದು, ಘಟನೆಯಲ್ಲಿ ಕನಿಷ್ಠ 19 ಮಂದಿ ಸಾವನ್ನಪ್ಪಿದ್ದಾರೆ.
ಪೇಶಾವರ ಹೈಯಾತಬಾದ್‌ನ ಇಮಾಮಿಯ ಮಸೀದಿ ಇಮಾಮ್ಬರ್ಗಾ ಬಳಿ ಸರಣಿ ಸ್ಫೋಟ ಸಂಭಸಿದೆ. ಅಲ್ಲದೆ ಮಸೀದಿ ಬಳಿ ಉಗ್ರರು ಗುಂಡಿನ ದಾಳಿ ನಡೆಸುತ್ತಿದ್ದು, ಘಟನೆಯಲ್ಲಿ ಸ್ಥಳದಲ್ಲೇ ಹತ್ತೊಂಬತ್ತು ಮಂದಿ ಮೃತಪಟ್ಟಿದ್ದು, 60 ಮಂದಿ ಗಂಭೀರವಾಗಿ ಗಾಯಗೊಂಡಿದ್ದಾರೆ.
ಪ್ರತ್ಯಕ್ಷದರ್ಶಿಗಳ ಪ್ರಕಾರ, ಶುಕ್ರವಾರವಾದ ಇಂದು ಮುಸ್ಲಿಂ ಬಾಂಧವರು ಸಮೂಹ ಪ್ರಾರ್ಥನೆಗಾಗಿ ಮಸೀದಿ ಬಳಿ ಸೇರಿದ್ದರು. ಈ ವೇಳೆ ಮೂರು ಬಾಂಬ್ ಸ್ಫೋಟಗಳು ಸಂಭವಿಸಿದೆ ಎಂದು ಪಾಕ್ ಪತ್ರಿಕೆಯೊಂದು ಸುದ್ದಿ ಮಾಡಿದೆ.
ಕಳೆದ ಜನವರಿ 30 ರಂದು ಕರಾಚಿಯ ಶಿಕಾರಪುರದ ಶಿಯಾ ಮಸೀದಿಯಲ್ಲಿ ನಡೆದ ಬಾಂಬ್ ಸ್ಫೋಟದಲ್ಲಿ 49 ಅಮಾಯಕರು ಬಲಿಯಾಗಿದ್ದರು.