ವಾಷಿಂಗ್ಟನ್: ನಮ್ಮ ಯುದ್ಧ ಇಸ್ಲಾಂ ಧರ್ಮದ ವಿರುದ್ಧವಲ್ಲ, ಅದನ್ನು ದುರುಪಯೋಗ ಪಡಿಸಿಕೊಳ್ಳುತ್ತಿರುವವರ ವಿರುದ್ಧ ಎಂದು ಅಮೆರಿಕದ ಅಧ್ಯಕ್ಷ ಬರಾಕ್ ಒಬಾಮ ಸ್ಪಷ್ಟನೆ ನೀಡಿದ್ದಾರೆ.
ಇರಾಕ್ ಮತ್ತು ಸಿರಿಯಾದಲ್ಲಿರುವ ಇಸ್ಲಾಮಿಕ್ ಭಯೋತ್ಪಾದಕರನ್ನು ಹತ್ತಿಕ್ಕಲು ಅಮೆರಿಕ ಸಮರ ಸಾರಿದ್ದು, ಈ ಸಂಬಂಧ ಮಾತನಾಡಿದ ಬರಾಕ್ ಒಬಾಮ, ನಮ್ಮ ಯುದ್ಧ ಇಸ್ಲಾಂ ಧರ್ಮದ ವಿರುದ್ದವಲ್ಲ. ಆದರೆ, ಅದರ ಹೆಸರಲ್ಲಿ ಅನೇಕ ನಾಗರಿಕರನ್ನು ಹತ್ಯೆಗೈಯುತ್ತಿರುವ ಭಯೋತ್ಪಾದಕರ ವಿರುದ್ಧ. ಈ ಭಯೋತ್ಪಾದಕರನ್ನು ಹತ್ತಿಕ್ಕದೇ ಬಿಡುವುದಿಲ್ಲ ಎಂದು ಹೇಳಿದ್ದಾರೆ.
ಇಸ್ಲಾಂ ಸಿದ್ಧಾಂತವನ್ನು ಬಿಟ್ಟು ಬಂದಂತಹ ಅನೇಕ ಮುಸ್ಲಿಮರು ಇದ್ದಾರೆ. ಆದರೆ, ಅವರ ಬಗ್ಗೆ ಉಗ್ರರು ಈವರೆಗೆ ಧನಿಯೆತ್ತಿಲ್ಲ. ದೇವರ ಹೆಸರಲ್ಲಿ ಕ್ರೈಸ್ತ, ಜುಡೈಸಿಂ, ಬೌದ್ಧ, ಅಥವಾ ಹಿಂದೂ ಧರ್ಮದ ಅಮಾಯಕರನ್ನು ಕೊಲ್ಲುವವರು ಇಸ್ಲಾಮ್ ಧರ್ಮವನ್ನು ಪ್ರತಿನಿಧಿಸಲ್ಲ ಎಂದು ತಮ್ಮ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.
ಭಯೋತ್ಪಾದನೆ ಮತ್ತು ಗಲಭೆಗೆ ಯಾವುದೇ ಧರ್ಮ ಹೊಣೆಯಲ್ಲ, ಅದಕ್ಕೆ ಜನರೇ ಹೊಣೆ, ತಮ್ಮ ಕೆಲಸದ ಸಾಧನೆಗೆ ಧರ್ಮವನ್ನು ದುರುಪಯೋಗ ಪಡಿಸಿಕೊಳ್ಳುತ್ತಿದ್ದಾರೆ ಎಂದ ಅವರು, ಭಯೋತ್ಪಾದಕರನ್ನು ಹತ್ತಿಕ್ಕಲು ನೆರೆ ದೇಶಗಳ ಸಹಕಾರ ಅಗತ್ಯ. ಎಲ್ಲರೂ ಒಗ್ಗೂಡಿ ಉಗ್ರರನ್ನು ಸದೆಬಡಿಯೋಣ ಎಂದು ಅವರು ಹೇಳಿದ್ದಾರೆ.