ಮುಂಬೈ: ಸೆಕ್ಯುರಿಟಿ ಗಾರ್ಡ್ ಚಹಾದಲ್ಲಿ ಮತ್ತು ಬರಿಸುವ ಪದಾರ್ಥ ಬೆರೆಸಿ ಸಿಬ್ಬಂದಿಗಳನ್ನು ಪ್ರಜ್ಞೆ ತಪ್ಪಿಸಿ 2 ಕೋಟಿ ರು. ದೋಚಿಕೊಂಡು ಪರಾರಿಯಾಗಿದ್ದಾನೆ.

ಎಟಿಎಂಗಳಿಗೆ ಹಣ ತುಂಬುವ ಸಲುವಾಗಿ ಹಣ ತೆಗೆದುಕೊಂಡು ಹೋಗುತ್ತಿದ್ದ ಸಿಬ್ಬಂದಿಗಳಿಗೆ ವಾಹನದಲ್ಲಿ ಭದ್ರತೆಗಾಗಿ ನಿಯೋಜಿತನಾಗಿದ್ದ ಗಾರ್ಡ್ ಚಹಾ ಕುಡಿಯುವ ನೆಪದಲ್ಲಿ ವಾಹನ ನಿಲ್ಲಿಸಿ, ತಾನು ತಂದ ಚಹಾಕ್ಕೆ ಮತ್ತು ಬರಿಸುವ ಪದಾರ್ಥ ಬೆರೆಸಿ ಸಿಬ್ಬಂದಿಗಳಿಗೆ ನೀಡಿದ್ದನು.

ಮುಂಬೈನ ವಿಲೇ ಪಾರ್ಲೆ ಬಳಿಯ ಎಕ್ಸ್ ಪ್ರೆಸ್ ಹೈವೇ ಯಲ್ಲಿ ಶುಕ್ರವಾರ ಹಾಡಹಗಲೇ ಈ ಘಟನೆ ನಡೆದಿದ್ದು, ಹಣ ಸಾಗಿಸುತ್ತಿದ್ದ ವಾಹನದಲ್ಲಿ ಮುಖ್ಯ ಆರೋಪಿ ಸೆಕ್ಯುರಿಟಿ ಗಾರ್ಡ್ ಸಾದರ್ ಆಲಂ ಸೇರಿದಂತೆ ನಾಲ್ವರಿದ್ದರು. ಆರೋಪಿ ಗಾರ್ಡ್ ಮೊದಲೇ ರೂಪಿಸಿದ ಸಂಚಿನಂತೆ ನಿಗದಿತ ಸ್ಥಳದಲ್ಲಿ ಚಹಾ ಕುಡಿಯುವ ನೆಪ ಹೇಳಿ ವಾಹನ ನಿಲ್ಲಿಸಿದ್ದಾನೆ. ಬಳಿಕ ತಾನೇ ತೆರಳಿ ವಾಹನದಲ್ಲಿದ್ದ ಮೂವರಿಗೆ ಮತ್ತಿನ ಪದಾರ್ಥ ಬೆರೆಸಿದ್ದ ಚಹಾ ತಂದು ನೀಡಿದ್ದಾನೆ.

ಇದನ್ನು ಕುಡಿಯುತ್ತಿದ್ದಂತೆಯೇ ವಾಹನದ ಚಾಲಕ ಸೇರಿ ಮತ್ತಿಬ್ಬರು ಪ್ರಜ್ಞಾಶೂನ್ಯರಾಗಿದ್ದು, ಇವರುಗಳಿದ್ದ ವಾಹನವನ್ನು ಕಾರಿನಲ್ಲಿ ಹಿಂಬಾಲಿಸಿಕೊಂಡೇ ಬರುತ್ತಿದ್ದ ಸೆಕ್ಯುರಿಟಿ ಗಾರ್ಡ್ ಸಾದರ್ ಆಲಂನ ಸಹಚರರು ವಾಹನದಲ್ಲಿದ್ದ ಸುಮಾರು 2 ಕೋಟಿ ರೂ. ಹಣವನ್ನು ತೆಗೆದುಕೊಂಡು ಆತನೊಂದಿಗೆ ಪರಾರಿಯಾಗಿದ್ದಾರೆ. ಈ ಕುರಿತು ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ಆರೋಪಿಗಳ ಪತ್ತೆಗಾಗಿ ನಾಕಾಬಂದಿ ಏರ್ಪಡಿಸಿದ್ದರೂ ಯಾವುದೇ ಪ್ರಯೋಜನವಾಗಿಲ್ಲ.