ವಾಷಿಂಗ್ಟನ್: ಭೂಗತ ದೊರೆ ದಾವೂದ್ ಇಬ್ರಾಹಿಂ ಆಯ್ತು, ಈಗ ಆತನ ಸಹೋದರ ಶೇಖ್ ಅನೀಸ್ ಇಬ್ರಾಹಿಂ ಹಾಗೂ ಅವನ ಬಂಟ ಅಜೀಜ್ ಮೂಸಾ ಬಿಲಾಖಿಯಾ ವಿರುದ್ಧವೂ ಶುಕ್ರವಾರ ಅಮೆರಿಕ ನಿರ್ಬಂಧ ಹೇರಿದೆ. ಅಮೆರಿಕ ಅಧ್ಯಕ್ಷ ಬರಾಕ್ ಒಬಾಮ ಅವರ ಭಾರತ ಭೇಟಿಗೆ 10 ದಿನವಷ್ಟೇ ಬಾಕಿ ಇದೆ ಎನ್ನುವಾಗ ಈ ನಿರ್ಧಾರ ಹೊರಬಿದ್ದಿದೆ.
ದಾವೂದ್‌ನ 'ಡಿ' ಕಂಪನಿ ಪರ ಮಾದಕ ವಸ್ತು ಸಾಗಣೆ, ಸುಲಿಗೆ, ಸುಪಾರಿ ಹತ್ಯೆ ಮತ್ತು ಅಕ್ರಮ ಹಣ ಸಾಗಣೆಯಂಥ ಅಪರಾಧ ಕೃತ್ಯಗಳಲ್ಲಿ ಅನೀಸ್‌ನೂ ಪಾಲುದಾರ. 1993ರ ಮುಂಬೈ ಬಾಂಬ್ ಸ್ಫೋಟ ಪ್ರಕರಣದಲ್ಲೂ ಈತ ಆರೋಪಿ.
ಇನ್ನು ಬಿಲಾಖಿಯಾ ಕೂಡ ಅನೀಸ್ ಹಾಗೂ ದಾವೂದ್‌ನ ಬಂಟ. 'ಡಿ' ಕಂಪನಿಯ ಸೂಚನೆಯಂತೆ ಮಾದಕ ವಸ್ತು ಸಾಗಣೆ, ಕೊಲೆ, ಭಯೋತ್ಪಾದನೆಯಂಥ ಚಟುವಟಿಕೆಗಳನ್ನು ಈತ ನಡೆಸುತ್ತಾನೆ. ಬಿಲಾಖಿಯಾ 1993ರ ಮುಂಬೈ ಸ್ಫೋಟದ ಸಮಯದಿಂದಲೂ ದಾವೂದ್‌ನ ಜತೆಗಿದ್ದಾನೆ. ಈತನ ವಿರುದ್ಧವೂ ಭಾರತದಲ್ಲಿ ಹಲವು ಪ್ರಕರಣಗಳು ದಾಖಲಾಗಿವೆ.