ಮಥುರಾ: ಬಾಂಗ್ಲಾದೇಶ ಹಾಗೂ ಪಾಕಿಸ್ತಾನ ಸಹ ಹಿಂದೂ ರಾಷ್ಟ್ರಗಳು ಎಂದು ತಾನು ನಂಬುವುದಾಗಿ ರಾಷ್ಟ್ರೀಯ ಸ್ವಯಂ ಸೇವಕ ಸಂಘ(ಆರ್ ಎಸ್ಎಸ್) ದ ಮುಖ್ಯಸ್ಥ ಮೋಹನ್ ಭಾಗವತ್ ಅವರು ಹೇಳಿರುವುದಾಗಿ ಇಂಡಿಯಾ  ಟುಡೇ ವರದಿ ಮಾಡಿದೆ.

ಇಂಡಿಯಾ ಟುಡೇ ವರದಿ ಪ್ರಕಾರ, ಮಥುರಾದ ಶ್ರೀಜಿ ಬಾಬಾ ಸರಸ್ವತಿ ಶಿಶು ಮಂದಿರದಲ್ಲಿನ ಸಂಘದ ತರಬೇತಿ ಶಿಬಿರದಲ್ಲಿ ಮಾತನಾಡಿದ ಭಾಗವತ್, ಭಾರತದ ಭೂಖಂಡ ಹಿಂದೂ ದೇಶವಾಗಿದೆ. ಹಾಗಾಗಿ ಬಾಂಗ್ಲಾ, ಪಾಕಿಸ್ತಾನಗಳಲ್ಲಿ ವಾಸಿಸುವ ಜನರು ಕೂಡಾ ಹಿಂದೂ ದೇಶದ ಭಾಗವಾಗಿದ್ದಾರೆ ಎಂದು ಹೇಳಿದ್ದಾರೆ.

ಭಾರತ ಹಿಂದೂ ರಾಷ್ಟ್ರ ಎಂಬುದರಲ್ಲಿ ಯಾವುದೇ ಅನುಮಾನ ಇಲ್ಲ. ಏನೇ ಆಗಲಿ ನಾವು ಈ ನಂಬಿಕೆಯನ್ನು ಹುಸಿಗೊಳಿಸಲು ಬಿಡುವುದಿಲ್ಲ ಎಂದು ಭಾಗವತ್ ವಿಶ್ವಾಸವ್ಯಕ್ತಪಡಿಸಿದ್ದಾರೆ.

ಜಗತ್ತಿನ ವಿವಿಧೆಡೆ ಜನರು ಆಯಾ ದೇಶಗಳ ನಾಗರಿಕರಾಗಿ ವಾಸಿಸುತ್ತಿದ್ದಿರಬಹುದು. ಆದರೆ ಅವರ ರಾಷ್ಟ್ರೀಯತೆ ಹಿಂದೂವಾಗಿದ್ದು, ಜನರು ಅದನ್ನು ನಿರ್ಲಕ್ಷಿಸುತ್ತಿದ್ದಾರೆ. ತಮ್ಮನ್ನು ತಾವು ಮುಸ್ಲಿಮ್, ಕ್ರಿಶ್ಚಿಯನ್ ಅಂತ ಹೇಳಿಕೊಳ್ಳುತ್ತಾರೆ. ಈ ಭರತ ಖಂಡದ ಪುರಾತನ ಹೆಸರು ಹಿಂದೂಸ್ತಾನ್ ಆಗಿತ್ತು ಎಂದರು.