ನವದೆಹಲಿ: 57 ದಿನಗಳ ನಿಗೂಢ ಪ್ರವಾಸದಿಂದ ವಾಪಸಾಗಾಯ್ತು, ನರೇಂದ್ರ ಮೋದಿ ಸರ್ಕಾರದ ವಿರುದ್ಧ ಗುಡುಗಿದ್ದಾಯ್ತು, ರೈತರ ಜತೆ ಪಾದಯಾತ್ರೆ ನಡೆಸಿದ್ದೂ ಆಯ್ತು, ಇದೀಗ ಕಾಂಗ್ರೆಸ್ ಉಪಾಧ್ಯಕ್ಷ ರಾಹುಲ್ ಗಾಂಧಿ ಅವರ ಪಟ್ಟಾಭಿಷೇಕಕ್ಕೆ ಬೇಕಾದ ಎಲ್ಲ ಸಿದಟಛಿತೆಗಳು ಆರಂಭಗೊಂಡಿವೆ.

ಇದೇ 6 ರಂದು ಕಾಂಗ್ರೆಸ್ ವರಿಷ್ಠೆ ಸೋನಿಯಾ, ತಮ್ಮ ನಿವಾಸದಲ್ಲಿ ಪಕ್ಷದ ಪದಾಧಿಕಾರಿಗಳಿಗೆ ಔತಣಕೂಟ ಆಯೋಜಿಸಿದ್ದಾರೆ. ಭೂಸ್ವಾಧೀನ ಮಸೂದೆ ಕುರಿತಂತೆ ಕೇಂದ್ರದ ವಿರುದ್ಧ ಯಾವ ರೀತಿ ಹೋರಾಟ ನಡೆಸಬೇಕೆಂಬ ಬಗ್ಗೆ ರೂಪುರೇಷೆ ತಯಾರಿಸುವ ಸಲುವಾಗಿ ಈ ಔತಣಕೂಟ ಆಯೋಜಿಸಲಾಗುತ್ತಿದೆ ಎಂದು ಹೇಳಲಾಗುತ್ತಿದ್ದರೂ, ಹಿಂದಿನ ಸತ್ಯ ಬೇರೆಯೇ ಇದೆ ಎನ್ನಲಾಗುತ್ತಿದೆ. ಪ್ರವಾಸದಿಂದ ವಾಪಸಾದ ರಾಹುಲ್ ಪೂರ್ಣ ಬದಲಾಗಿದ್ದಾರೆ, ಅವರಲ್ಲಿ ಹೊಸ ಹುರುಪು ಬಂದಿದೆ. ಪಕ್ಷಾಧ್ಯಕ್ಷ ಸ್ಥಾನ ನೀಡಲಿದು ಸೂಕ್ತ ಸಮಯವಲ್ಲವೇ ಎಂಬ ಬಗ್ಗೆ ಸೋನಿಯಾ, ಪಕ್ಷದ ಪದಾಧಿಕಾರಿಗಳ ಜತೆ ಚರ್ಚಿಸಲಿದ್ದಾರೆಂದೂ ಹೇಳಲಾಗಿದೆ.

ಎಲ್ಲಕ್ಕಿಂತ ಹೆಚ್ಚಾಗಿ, ರಾಹುಲ್ ಹಿಂಬಾಲಕರು, ಫುಲ್ ಮಾರ್ಕ್ಸ್ ಕೊಟ್ಟಿದ್ದಾರೆ. ಹೀಗಾಗಿ ಅವರಿಗೆ ಅಧ್ಯಕ್ಷ ಪಟ್ಟ ಕಟ್ಟುವ ಕಾಲ ಬಂದಿದೆ ಎಂದು ಹೇಳುವುದು ಈ ಸಭೆಯ ಅಜೆಂಡಾ ಎಂಬುದು ಪಕ್ಷದೊಳಗಿನ ಒಳಮಾತು. ಎಲ್ಲಕ್ಕಿಂತ ಹೆಚ್ಚಾಗಿ, ಲೋಕಸಭೆ ಮತ್ತು ರಾಜ್ಯಸಭೆ ಸಂಸದರ ಜತೆ ಸೋನಿಯಾ 5 ರಂದೇ ಮಾತುಕತೆ ನಡೆಸಲಿದ್ದಾರೆ.

ಈ ಎಲ್ಲಾ ಬೆಳವಣಿಗೆಗಳಾದ ಮೇಲೆ ಈ ವರ್ಷಾಂತ್ಯಕ್ಕೆ ಅಥವಾ ಅದಕ್ಕೂ ಮುನ್ನವೇ ರಾಹುಲ್ ಗಾಂಧಿ ಅವರಿಗೆ ಪಕ್ಷದ ಅಧ್ಯಕ್ಷ ಸ್ಥಾನ ನೀಡುವ ಸಂಭವವಿದೆ.