ನವದೆಹಲಿ: ಭಾರತೀಯ ರಿಸರ್ವ್ ಬ್ಯಾಂಕ್ ಸವರ ನ್ ಗೋಲ್ಡ್ ಬಾಂಡ್‍ನ ಸಾರ್ವಜನಿಕ ವಿತರಣೆ ದರ ಪ್ರತಿ ಗ್ರಾಂಗೆ ರು.2,684 ನಿಗದಿಪಡಿಸಿದೆ. ನವೆಂಬರ್ 5ರಿಂದ 20ರವರೆಗೂ ಬಾಂಡ್‍ಗಳಿಗಾಗಿ ಅರ್ಜಿಗಳನ್ನು ಸ್ವೀಕರಿಸಲಾಗುವುದು.
ಭೌತಿಕವಾಗಿ ಚಿನ್ನ ಖರೀದಿಸುವುದಕ್ಕೆ ಪರ್ಯಾಯವಾಗಿ ಕೇಂದ್ರ ಸರ್ಕಾರ ಸವರನ್ ಗೋಲ್ಡ್ ಬಾಂಡ್ ಸ್ಕೀಂ ಪರಿಚಯಿಸಿದೆ. ಈ ಯೋಜನೆಯಡಿ ಶೇ.2.75 ಬಡ್ಡಿದರ ನೀಡಲಾಗುವುದು. ವ್ಯಕ್ತಿಯೊಬ್ಬರು ಕನಿಷ್ಠ 2 ಗ್ರಾಂ ಮತ್ತು ಗರಿಷ್ಠ 500 ಗ್ರಾಂವರೆಗೂ ಖರೀದಿಸಬಹುದು.
ಶೇ.0.999ರಷ್ಟು ಶುದ್ಧ ಚಿನ್ನ ಕಳೆದ ವಾರ ಮುಕ್ತಾಯ ದರದ ಆಧಾರದ ಮೇರೆಗೆ ದರ ನಿಗದಿಪಡಿಸಲಾಗಿದೆ. ಬಾಂಡ್‍ಗಳನ್ನು ಆಯ್ದ ಬ್ಯಾಂಕ್‍ಗಳು ಮತ್ತು ಅಂಚೆ ಕಚೇರಿಗಳ ಮೂಲಕ ನವೆಂಬರ್ 26ರಿಂದ ವಿತರಿಸಲಾಗುವುದು. ಇದು ಬಾಂಡ್‍ಗಳ ಮೊದಲ ಕಂತಾಗಿದೆ.
ಮುಂದೆ ಬಿಡುಗಡೆ ಮಾಡುವ ಕುರಿತು ತಿಳಿಸಲಾಗುವುದು ಎಂದು ಆರ್ ಬಿಐ ಹೇಳಿದೆ. ಬಾಂಡ್ ಗಳ ಅವಧಿ 8 ವರ್ಷಗಳಾಗಿದ್ದು ಐದು ವರ್ಷಗಳ ನಂತರ ಯಾವಾಗ ಬೇಕಾದರೂ ಹಿಂತಿರುಗಿಸಿ ಹಣ ಪಡೆಯಬಹುದು. ಬಾಂಡ್‍ಗಳ ಮೇಲಿನ ಗಳಿಕೆ ತೆರಿಗೆ ವ್ಯಾಪ್ತಿಗೆ ಬರಲಿದೆ. ಭೌತಿಕ ಚಿನ್ನಕ್ಕೆ ವಿಧಿಸುವಂತೆ ಬಂಡವಾಳ ಗಳಿಕೆ ತೆರಿಗೆಯೂ ಅನ್ವಯವಾಗಲಿದೆ.