ನವದೆಹಲಿ: ಕಾಂಗ್ರೆಸ್ ಉಪಾಧ್ಯಕ್ಷ ರಾಹುಲ್ ಗಾಂಧಿ ಅವರಲ್ಲಿ `ಬಹುದೊಡ್ಡ ಬದಲಾವಣೆ' ಕಾಣುತ್ತಿದೆ ಎಂದು ಮಾಜಿ ಪ್ರಧಾನಿ ಜವಾಹರ್ ಲಾಲ್ ನೆಹರೂ ಅವರ ಮೊಮ್ಮಗಳು ಹಾಗೂ ಖ್ಯಾತ ಲೇಖಕಿ ನಯನತಾರಾ ಸೆಹಗಲ್ ಹೇಳಿದ್ದಾರೆ.
``ಕೆಲ ವರ್ಷಗಳ ಹಿಂದೆ ಎಲ್ಲರಂ ತೆಯೇ ನಾನು ಕೂಡ, ರಾಹುಲ್ ರಾಜಕೀಯದಲ್ಲಿರಲು ಬಯಸಲಿಕ್ಕಿಲ್ಲ ಎಂದೇ ಭಾವಿಸಿದ್ದೆ. ಅಲ್ಲದೆ, ಅವರು ಬೇರೆ ಯಾವುದಾದರೂ ಕ್ಷೇತ್ರದತ್ತ ಮುಖ ಮಾಡುವುದು ಒಳಿತು ಎಂದೇ ಯೋಚಿಸಿದ್ದೆ. ಆದರೆ, ಈಗ ಅವರಲ್ಲಿ ಬಹಳಷ್ಟು ಬದಲಾವಣೆಯಾಗಿದೆ. ಇತ್ತೀಚೆಗೆ, ಬಿಹಾರ ಚುನಾವಣೆಗೆ ಸಂಬಂಧಿಸಿ ರಾಹುಲ್ ಮಾತನಾಡಿದ್ದನ್ನು ನೋಡಿದೆ. ಅವರ ಮಾತು ತುಂಬಾ ಪ್ರಭಾವಶಾಲಿಯಾಗಿತ್ತು ಹಾಗೂ ತಮ್ಮ ಅಂಕಿ ಅಂಶಗಳಲ್ಲೂ ಅವರು ಪಕ್ಕಾ ಆಗಿದ್ದರು.
ಈ ಮೊದಲು ಅವರು ತೆರೆಯ ಹಿಂದೆ ಯುವ ಕಾಂಗ್ರೆಸ್ ಅನ್ನು ಸಂಘಟಿತಗೊಳಿಸುವ ಕಾರ್ಯದಲ್ಲಿ ನಿರತರಾಗಿದ್ದರು. ಈಗ ಅವರಲ್ಲಿ ಭಾರಿ ಬದಲಾವಣೆ ಆಗಿರುವುದು ಸರಿಯಾಗಿ ಗೋಚರಿಸುತ್ತಿದೆ. ಇದು ಸಕಾರಾತ್ಮಕ ಬೆಳವಣಿಗೆಯೂ ಹೌದು ಎಂದಿದ್ದಾರೆ ಸೆಹಗಲ್. ಇದೇ ವೇಳೆ, ನಿಮಗೆಂದಾದರೂ ರಾಜಕೀಯ ಸೇರುವ ಆಸಕ್ತಿಯಿತ್ತೇ ಎಂಬ ಪ್ರಶ್ನೆಗೆ ಉತ್ತರಿಸಿದ ಸೆಹಗಲ್ ಖಂಡಿತಾ ಇಲ್ಲ ಎಂದಿದ್ದಾರೆ.