ಪಾಟ್ನಾ; ದೇಶದೆಲ್ಲೆಡೆ ದಸರಾ ಹಬ್ಬ ಆಚರಿಸಲು ಸಿದ್ದತೆ ನಡೆಸಲಾಗುತ್ತಿದೆ. ಆದರೆ ಬಿಹಾರದಲ್ಲಿ ಚುನಾವಣೆ ಕಾವು ಏರುತ್ತಿದೆ. ರಾಜಕೀಯ ನಾಯಕರುಗಳು ಪರಸ್ಪರ ಕೆಸರೆರೆಚಾಟ ಮುಂದುವರಿಸಿದ್ದಾರೆ.

ಅದೇ ವೇಳೆ ಬಿಹಾರ ಆರ್ ಜೆಡಿ ಅಧ್ಯಕ್ಷ ಲಾಲೂ ಪ್ರಸಾದ್ ಯಾದವ್ ಬಿಜೆಪಿ ವಿರುದ್ದ ಎಂದಿನಂತೆ ವಾಗ್ದಾಳಿ ನಡೆಸಿದ್ದಾರೆ. ನಮ್ಮ ದಸರಾದಿಂದ ಬಿಜೆಪಿಗೆ ರಾಜಕೀಯ ಸಾವು ಖಚಿತ ಎಂದು ಹೇಳಿದ್ದಾರೆ. ದುಷ್ಟರನ್ನು ಕೊಂದು ಸಂಭ್ರಮ ಆಚರಿಸಲು ದಸರಾ ಹಬ್ಬ ಆಚರಿಸಲಾಗುತ್ತದೆ, ಹಬ್ಬದ ಪ್ರಯುಕ್ತವಾಗಿ ಬಿಹಾರ ವಿಧಾನ ಸಭೆ ಚುನಾವಣೆಯಲ್ಲಿ ಬಿಜೆಪಿಗೆ ರಾಜಕೀಯ ಸಾವು ಕೊಡಲಾಗುತ್ತದೆ ಎಂದು ಲಾಲು ಹೇಳಿದ್ದಾರೆ.

ಇನ್ನು ಬೀಫ್ ಪಾರ್ಟಿ ಸಂಬಂಧ ಜಮ್ಮು ಕಾಶ್ಮೀರ ಶಾಸಕನಿಗೆ ಮಸಿ ಬಳಿದ ಪ್ರಕರಣಕ್ಕೆ ಸಂಬಂಧಿಸಿದಂತೆ ಪ್ರತಿಕ್ರಿಯೆ ನೀಡಿದ ಲಾಲೂ ಇದು ಬಿಜೆಪಿ ಮತ್ತು ಆರ್ ಎಸ್ ಎಸ್ ಅಜೆಂಡಾ ಎಂದು ಹೇಳಿದ್ದಾರೆ.