ಪಾಟ್ನಾ: ಬಿಹಾರ ಮುಖ್ಯಮಂತ್ರಿ ನಿತೀಶ್ ಕುಮಾರ್ ಬಗ್ಗೆ ಪ್ರಧಾನಿ ನರೇಂದ್ರ ಮೋದಿ ನೀಡಿದ್ದ ವಿವಾದಾತ್ಮಕ ಡಿಎನ್ ಎ ಹೇಳಿಕೆ ವಿರುದ್ಧ ಜೆಡಿಯು ತೊಡೆ ತಟ್ಟಿ ನಿಂತಿದೆ. ಪ್ರತಿ ದಿನ ಪ್ರಧಾನ ಮಂತ್ರಿಗಳ ಕಚೇರಿಗೆ ಬಿಹಾರ ನಾಗರಿಕರ 1ಲಕ್ಷ ಕೂದಲು ಹಾಗೂ ಉಗುರುಗಳ ಮಾದರಿಯನ್ನು ಕಳುಹಿಸಲಾಗಿದೆ.

ಬಿಹಾರದಲ್ಲಿರು ಜೆಡಿಯು ಕಾರ್ಯಕರ್ತರು, ಮುಖಂಡರು ಹಾಗೂ ಬೆಂಬಲಿಗರ ಡಿಎನ್ ಎ ಪರೀಕ್ಷೆಗಾಗಿ ಇನ್ಮುಂದೆ ಪ್ರತಿದಿನ ಕೂದಲು ಹಾಗೂ ಉಗುರುಗಳ ಸ್ಯಾಂಪಲ್ ಗಳನ್ನು ಪ್ರಧಾನಿ ಕಚೇರಿಗೆ ಕಳುಹಿಸಲಾಗುತ್ತದೆ ಎಂದು ಜೆಡಿಯು ಮುಖಂಡ ಎನ್ ಕೆ ಆರ್ಯ ತಿಳಿಸಿದ್ದಾರೆ.

ಇದುವರೆಗೂ ಸುಮಾರು ಒಂದು ಮಿಲಿಯನ್ ಕೂದಲು ಹಾಗೂ ಉಗುರುಗಳ ಮಾದರಿ ಸಂಗ್ರಹಿಸಿದ್ದು, ಅಕ್ಟೋಬರ್ 15ರೊಳಗೆ  ಪ್ರಧಾನಿ ಕಚೇರಿಗೆ ಐದು ಮಿಲಿಯನ್ ಸ್ಯಾಂಪಲ್ಸ್ ಕಳುಹಿಸುವುದಾಗಿ ಜೆಡಿಯು ತಿಳಿಸಿದೆ.

ಪಕ್ಷದ ಪ್ರಮುಖ ನಾಯಕರಿಗೆ, ಶಾಸಕರಿಗೆ ಹಾಗೂ ಸಂಸದರಿಗೆ ಅವರು ಸ್ಪರ್ಧಿಸುವ ಕ್ಷೇತ್ರಗಳ ಜನತೆಯಿಂದ ಉಗುರು ಹಾಗೂ ಕೂದಲಿನ ಮಾದರಿ ಸಂಗ್ರಹಿಸಲು ತಿಳಿಸಿರುವುದಾಗಿ ಎನ್.ಕೆ ಆರ್ಯ ತಿಳಿಸಿದ್ದಾರೆ.

ಪ್ರಧಾನಿ ನರೇಂದ್ರ ಮೋದಿ ತಾವು ನೀಡಿರುವ ಹೇಳಿಕೆಯನ್ನು ವಾಪಸ್ ಪಡೆಯುವಂತೆ ಆಗ್ರಹಿಸಿ ಜೆಡಿಯು ಶಬ್ದವಾಪಸಿ ಚಳುವಳಿ ಆರಂಭಿಸಿರುವುದಾಗಿ ಅವರು ಹೇಳಿದ್ದಾರೆ.