ವಿಲ್ಲಾಪುರಂ: ನನಗೆ 100 ವರ್ಷ ವಯಸ್ಸಾದರೂ ನಾನು ಇಲ್ಲಿಗೆ ಬಂದು ನಿಮ್ಮನ್ನು ಭೇಟಿ ಮಾಡಿ ಹೋಗುತ್ತೇನೆ ಎಂದು ತಮಿಳುನಾಡು ಮಾಜಿ ಮುಖ್ಯಮಂತ್ರಿ ಹಾಗೂ ಡಿಎಂಕೆ ಅಧ್ಯಕ್ಷ ಎಂ. ಕರುಣಾನಿಧಿ ಹೇಳಿದ್ದಾರೆ.

ಮುಂಬರುವ ತಮಿಳುನಾಡು ವಿಧಾನಸಭೆ ಚುನಾವಣೆ ಹಿನ್ನೆಲೆಯಲ್ಲಿ ರಾಜ್ಯಾದ್ಯಂತ ಪ್ರವಾಸ ಕೈಗೊಂಡಿರುವ 92 ವರ್ಷದ ಕರುಣಾನಿಧಿ ಎಷ್ಟೇ ವಯಸ್ಸಾದರೂ ತಮ್ಮ ಜನಸೇವೆ ನಿಲ್ಲುವುದಿಲ್ಲ, ಅವರಿಗಾಗಿ ಕೆಲಸ ಮಾಡಲು ತಮ್ಮ ಮನಸ್ಸು ಸದಾ ತುಡಿಯುತ್ತಿರುತ್ತದೆ ಎಂದು ಹೇಳಿದರು.

ವಿಲ್ಲಾಪುರಂನ ನಗರಸಭೆ ಮೈದಾನದಲ್ಲಿ  ಸುಮಾರು 5 ಸಾವಿರ ಮಂದಿ ಕಾರ್ಯಕರ್ತರನ್ನು ಉದ್ದೇಶಿಸಿ ಮಾತನಾಡಿದ ಅವರು ಸಿಎಂ ಜಯಲಲಿತಾ ವಿರುದ್ಧ ವಾಗ್ದಾಳಿ ನಡೆಸಿದರು.

ಪ್ರವಾಹದ ವೇಳೆ ಮನುಷ್ಯತ್ವ ಮರೆತ ಸಿಎಂ ಜಯಲಲಿತಾ ಜನ ಸಾಮಾನ್ಯರ ಬಗ್ಗೆ ಕಿಂಚಿತ್ತು ಯೋಚನೇ ಮಾಡಲಿಲ್ಲ. ಹೀಗಾಗಿ ಹಲವರು ತಮ್ಮ ಜೀವನವನ್ನೇ ತ್ಯಜಿಸಬೇಕಾಯಿತು ಎಂದು ಆರೋಪಿಸಿದರು.

ಜನರ ಅಭಿವೃದ್ಧಿಗಾಗಿ ತಮ್ಮ ಮೇಲೆ ಮಹತ್ತರ ಜವಾಬ್ದಾರಿಯಿದೆ, ಯುವಕರ ಮೇಲೆ ಗುರುತರವಾದ ಹೊಣೆಗಾರಿಕೆಯಿದೆ, ಅವರೇ ಈ ದೇಶದ ಭವಿಷ್ಯದ ಪಿಲ್ಲರ್ ಗಳಾಗಿದ್ದಾರೆ ಎಂದರು.

ದೇಶದ ರಕ್ಷಣೆಯಲ್ಲಿ ಮಹಿಳೆಯರು ಹಾಗೂ ಬಡವರ ಕೊಡುಗೆ ಅಪಾರವಿದೆ ಎಂದ ಅವರು, ದೇಶದ ಅಭಿವೃದ್ಧಿಯಲ್ಲಿ ಮುಖ್ಯ ಪಾತ್ರ ವಹಿಸುತ್ತಾರೆ ಎಂದು ಹೇಳಿದರು.