ಚೆನ್ನೈ: ಟೆಕಿ ಸ್ವಾತಿ ಕೊಲೆ ಪ್ರಕರಣ ಹಸಿರಾಗಿರುವಾಗಲೇ ಭಗ್ನ ಪ್ರೇಮಿಯೋರ್ವ ಬೆಂಕಿ ಹಚ್ಚಿಕೊಂಡು ಬಳಿಕ ತನ್ನ  ಪ್ರಿಯತಮೆಯನ್ನು ತಬ್ಬಿಕೊಂಡು ಆತ್ಮಹತ್ಯೆಗೆ ಯತ್ನಿಸಿದ ಧಾರುಣ ಘಟನೆ ಸಂಭವಿಸಿದೆ.

ತಮಿಳುನಾಡಿನ ವಿಳ್ಳುಪುರಂನಲ್ಲಿ ಈ ಘಟನೆ ನಡೆದಿದ್ದು, ಸೆಂಥಿಲ್ ಎಂಬ 30 ವರ್ಷದ ವ್ಯಕ್ತಿ ನವೀನಾ ಎಂಬ ಅಪ್ರಾಪ್ತ ಬಾಲಕಿಯನ್ನು ಪ್ರೀತಿಸಿದ್ದ. ಆದರೆ ಬಾಲಕಿ ತನ್ನ ಪ್ರೀತಿಯನ್ನು ಒಪ್ಪಲ್ಲಿಲ್ಲ  ಎಂಬ ಕಾರಣಕ್ಕೆ ಆಕೆಯ ಮನೆಗೇ ನುಗ್ಗಿ ಮೈಮೇಲೆ ಪೆಟ್ರೋಲ್ ಸುರಿದುಕೊಂಡು ಬೆಂಕಿ ಹಚ್ಚಿಕೊಂಡಿದ್ದಾನೆ. ಅಲ್ಲದೆ ಬಳಿಕ ಬಾಲಕಿಯನ್ನು ತಬ್ಬಿ ಹಿಡಿಯುವ ಮೂಲಕ ಆಕೆಯನ್ನೂ ಕೊಲ್ಲಲು  ಯತ್ನಿಸಿದ್ದಾನೆ. ಘಟನೆಯಲ್ಲಿ ಭಗ್ನ ಪ್ರೇಮಿ ಸೆಂಥಿಲ್ ಸಾವನ್ನಪ್ಪಿದ್ದು, ಬಾಲಕಿ ನವೀನಾ ಮಾತ್ರ ಶೇ.80ರಷ್ಟು ಸುಟ್ಟ ಗಾಯಗಳೊಂದಿಗೆ ಖಾಸಗಿ ಆಸ್ಪತ್ರೆಯಲ್ಲಿ ಸಾವು-ಬದುಕಿನ ನಡುವೆ  ಹೋರಾಡುತ್ತಿದ್ದಾಳೆ.

ಪ್ರಕರಣ ದಾಖಲಿಸಿಕೊಂಡಿರುವ ವಿಳ್ಳುಪುರಂ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.

ಘಟನೆ ವಿವರ:
ಸುಮಾರು 32 ವರ್ಷದ ಸೆಂಥಿಲ್ ವೃತ್ತಿಯಲ್ಲಿ ಚಾಲಕನಾಗಿದ್ದು, ನವೀನಾ ಎಂಬ ಅಪ್ರಾಪ್ತ ಬಾಲಕಿಯನ್ನು ಒಂದು ವರ್ಷದಿಂದ ಪ್ರೀತಿಸುತ್ತಿದ್ದ. ಈ ನಡುವೆ ಸೆಂಥಿಲ್ ರೈಲು ಅಪಘಾತವೊಂದರಲ್ಲಿ  ತನ್ನ ಬಲಗೈ ಹಾಗೂ ಬಲಗಾಲು ಕಳೆದುಕೊಂಡಿದ್ದ. ಇದಾಗ್ಯೂ ಬಾಲಕಿಯ ಬಳಿ ತನ್ನ ಪ್ರೇಮ ನಿವೇದನೆ ಮಾಡಿಕೊಂಡಿದ್ದ. ಆದರೆ ಸೆಂಥಿಲ್ ಪ್ರೀತಿಯನ್ನು ಬಾಲಕಿ ತಿರಸ್ಕರಿಸಿದ್ದಳು. ಇದರಿಂದ  ತೀವ್ರ ಕುಪಿತಗೊಂಡಿದ್ದ ಸೆಂಥಿಲ್, ತನ್ನ ಅಂಗವೈಕಲ್ಯದಿಂದಾಗಿ ಪ್ರೀತಿ ನಿರಾಕರಿಸುತ್ತಿದ್ದಾಳೆ ಎಂದು ಆರೋಪಿಸಿದ್ದ. ಅಲ್ಲದೆ ಕಳೆದ ಜುಲೈ 30ರಂದು ಬಾಲಕಿ ಮನೆ ಹತ್ತಿರ ಬಂದಿದ್ದ ಸೆಂಥಿಲ್  ಆಕೆಯ ಪೋಷಕರು ಹೊರಗೆ ಹೋಗುತ್ತಿದ್ದಂತೆಯೇ ಮನೆ ಪ್ರವೇಶ ಮಾಡಿದ್ದ. ಈ ವೇಳೆ ಬಾಲಕಿ ಸಹೋದರ ಸಂಬಂಧಿಗಳು ಮನೆಯಲ್ಲಿ ಇದ್ದರು.

ಅವರನ್ನು ಕತ್ತಿಯಿಂದ ಬೆದರಿಸಿ ಬಾಲಕಿ ನವೀನಾ ಮೇಲೆ ಪೆಟ್ರೋಲ್ ಸುರಿದು ಬೆಂಕಿ ಹಚ್ಚಲು ಯತ್ನಿಸಿದ್ದಾನೆ. ಅದರೆ ಅದು ಸಾಧ್ಯವಾಗಲಿಲ್ಲ. ಹೀಗಾಗಿ ತನ್ನ ಮೇಲೆಯೇ ಪೆಟ್ರೋಲ್  ಸುರಿದುಕೊಂಡು ಬಳಿಕ ಬಾಲಕಿ ನವೀನಾಳನ್ನು ಗಟ್ಟಿಯಾಗಿ ತಬ್ಬಿ ಹಿಡಿದಿದ್ದಾನೆ. ಘಟನೆಯಲ್ಲಿ ಭಗ್ನ ಪ್ರೇಮಿ ಸೆಂಥಿಲ್ ಸಾವನ್ನಪ್ಪಿದ್ದು, ಬಾಲಕಿ ಸಾವು-ಬದುಕಿನ ನಡುವೆ ಹೋರಾಡುತ್ತಿದ್ದಾಳೆ.