ಲಖನೌ: ಉತ್ತರ ಪ್ರದೇಶದಲ್ಲಿ ಮತ್ತೊಂದು ಹೀನ ಕೃತ್ಯ ನಡೆದಿದ್ದು, ಮಹಿಳೆಯರ ಮೇಲಿನ ದೌರ್ಜನ್ಯಕ್ಕೆ ಕೊನೆಯೇ ಇಲ್ಲದಂತಾಗಿದೆ.

ಲಖನೌನಿಂದ 20 ಕಿ.ಮೀ.ದೂರದಲ್ಲಿರುವ ಬಂಥರದಲ್ಲಿರುವ ಹೋಟೆಲ್ ವೊಂದರಲ್ಲಿ ನಾಲ್ವರು ವ್ಯವಸ್ಥಾಪಕರು 25 ವರ್ಷದ ಡ್ಯಾನ್ಸರ್ ಗೆ ಗನ್ ತೋರಿಸಿ ಸಾಮೂಹಿಕ ಅತ್ಯಾಚಾರ ಎಸಗಿದ ಘಟನೆ ಭಾನುವಾರ ಬೆಳಗಿನ ಜಾವ ನಡೆದಿದೆ.

ಪ್ರತಿಷ್ಠಿತ ಆರ್ಯುವೇದಿಕ ಡ್ರಗ್ ಕಂಪನಿಯ ವ್ಯವಸ್ಥಾಪಕರಾಗಿದ್ದ ನಾಲ್ವರು ಕಾಮುಕರು ಕಚೇರಿಯ ಪಾರ್ಟಿಯ ನಂತರ ಕುಡಿದ ಮತ್ತಿನಲಿ ಹೋಟೆಲ್ ನ ರೂಮ್ ನಲ್ಲಿ ಡ್ಯಾನ್ಸರ್ ಮೇಲೆ ಸಾಮೂಹಿಕ ಅತ್ಯಾಚಾರ ಎಸಗಿರುವುದಾಗಿ ಮಹಿಳೆ ಆರೋಪಿಸಿದ್ದಾರೆ.

ಅತ್ಯಾಚಾರಕ್ಕೆ ಒಳಗಾದ ಡ್ಯಾನ್ಸರ್ ಹಾಗೂ ಇತರೆ ಇಬ್ಬರು ಮಹಿಳೆಯರು ಕಂಪನಿ ಆಯೋಜಿಸಿದ್ದ ಪ್ರತಿನಿಧಿಗಳ ಪಾರ್ಟಿಯಲ್ಲಿ ನೃತ್ಯ ಪ್ರದರ್ಶನ ನೀಡಲು ಬಂದಿದ್ದರು. ಹೋಟೆಲ್ ಬ್ಯಾಂಕ್ವೆಟ್ ಹಾಲ್ ನಲ್ಲಿ ನಡೆದ ಪ್ರದರ್ಶನದ ನಂತರ ಬೆಳಗಿನ ಜಾವ 1.30ರ ಸುಮಾರಿಗೆ ತುಂಬಾ ಕುಡಿದಿದ್ದ ವ್ಯವಸ್ಥಾಪಕರು ನಮ್ಮೊಂದಿಗೆ ಅಸಭ್ಯವಾಗಿ ನಡೆದುಕೊಂಡರು ಎಂದು ಸಹ ನೃತ್ಯಗಾರ್ತಿ ಆರೋಪಿಸಿದ್ದಾರೆ.

ಇತರೆ ಡ್ಯಾನ್ಸರ್ ಗಳು ತೆರಳಿದ ನಂತರ ವೇತನದ ಬಗ್ಗೆ ಮಾತನಾಡಬೇಕು ಎಂದು ರೂಮಿಗೆ ಕರೆಸಿಕೊಂಡ ನಾಲ್ವರು ವ್ಯವಸ್ಥಾಪಕರು ತನಗೆ ಗನ್ ತೋರಿಸಿ ಸಾಮೂಹಿಕಿ ಅತ್ಯಾಚಾರ ಎಸಗಿರುವುದಾಗಿ ಮಹಿಳೆ ಪೊಲೀಸರಿಗೆ ದೂರು ನೀಡಿದ್ದಾರೆ.

ಪ್ರಕರಣ ದಾಖಲಿಸಿಕೊಂಡ ಬಂಥರ ಪೊಲೀಸರು, ಆರೋಪಿಗಳಾದ ಸತ್ಯವೀರ್ ಸಿಂಗ್, ದೇವರಾಜ್ ಸಿಂಗ್, ರಾಷ್ಟ್ರೀಯ ಭೂಷಣ್ ಭಾರ್ತಿ ಹಾಗೂ ಪರೇಶ್ ತೋಮರ್ ಅವರನ್ನು ಬಂಧಿಸಿದ್ದಾರೆ.