ಲುಧಿಯಾನಾ: ದೆಹಲಿ ಮುಖ್ಯಮಂತ್ರಿ ಅರವಿಂದ್ ಕೇಜ್ರಿವಾಲ್ ಅವರ ಕಾರಿನ ಮೇಲಾದ ದಾಳಿ ಪ್ರಕರಣವನ್ನು ತನಿಖೆ ನಡೆಸುವಂತೆ ಅಧಿಕಾರಿಗಳಿಗೆ ಪಂಜಾಬ್ ಉಪ ಮುಖ್ಯಮಂತ್ರಿ ಸುಖ್ಬೀರ್ ಸಿಂಗ್ ಬಾದಲ್ ಅವರು ಆದೇಶಿಸಿದ್ದಾರೆಂದು ತಿಳಿದುಬಂದಿದೆ.
ಮುಖ್ಯಮಂತ್ರಿ ಕೇಜ್ರಿವಾರ್ ಅವರ ಕಾರು ಲುಧಿಯಾನ-ಫಿರೋಜ್ ಪುರ್ ಹೆದ್ದಾರಿಯಲ್ಲಿ ತೆರಳುತ್ತಿದ್ದ ವೇಳೆ ದುಷ್ಕರ್ಮಿಗಳ ಗುಂಪೊಂದು ಇದ್ದಕ್ಕಿದ್ದಂತೆ ಕಲ್ಲು ಹಾಗೂ ದೊಣ್ಣೆಗಳ ಮುಖಾಂತರ ದಾಳಿ ನಡೆಸಿತ್ತು. ದಾಳಿಯಲ್ಲಿ ಕೇಜ್ರಿವಾಲ್ ಅವರ ಕಾರು ಪುಡಿಪುಡಿಯಾಗಿತ್ತು.
ಘಟನೆ ಕುರಿತಂತೆ ಬಾದಲ್ ಅವರಿಗೆ ಅಲ್ಲಿನ ಪೊಲೀಸರು ಮಾಹಿತಿ ನೀಡಿದ್ದರು. ಝೆಡ್ ಪ್ಲಸ್ ಭದ್ರತೆ ಇದ್ದರೆ, ಯಾವುದೇ ತೊಂದರೆಯಾಗುವುದಿಲ್ಲ. ಘಟನೆಯಲ್ಲಿ 30-40 ಮಂದಿ ಭಾಗಿಯಾಗಿದ್ದು, 3-4 ನಿಮಿಷಗಳ ಕಾಲ ದಾಳಿ ನಡೆದಿದೆ. ದಾಳಿ ವೇಳೆ ಕೇಜ್ರಿವಾಲ್ ಅವರು ಕಾರು ಚಾಲಕನ ಪಕ್ಕದ ಆಸನದಲ್ಲಿ ಕುಳಿತುಕೊಂಡಿದ್ದರು. ದಾಳಿಯಾಗುತ್ತಿದ್ದ ಕೆಲವೆ ನಿಮಿಷಗಳಲ್ಲಿ ಮತ್ತೊಂದು ಕಾರಿನ ಮೂಲಕ ಕೇಜ್ರಿವಾಲ್ ಅವರನ್ನು ಕಳುಹಿಸಿಕೊಡಲಾಗಿತ್ತು ಎಂದು ಹೇಳಿದ್ದಾರೆ.
ಇದರಂತೆ ಘಟನೆಯನ್ನು ಖಂಡಿಸಿರುವ ಆಮ್ ಪಕ್ಷದ ನಾಯಕ ಸಂಜಯ್ ಸಿಂಗ್ ಅವರು, ಘಟನೆ ಪೂರ್ವನಿಯೋಜಿತವಾಗಿದ್ದು, ಕೇಜ್ರಿವಾಲ್ ಅವರನ್ನು ಸಾಯಿಸುವ ಹುನ್ನಾರ ಹೊಂದಿದ್ದಾಗಿದೆ. ಕೂಡಲೇ ಪ್ರಕರಣವನ್ನು ಹೈಕೋರ್ಟ್ ನ್ಯಾಯಾಮೂರ್ತಿಯವರ ನೇತೃತ್ವದಲ್ಲಿ ತನಿಖೆ ನಡೆಸಬೇಕು ಎಂದು ಆಗ್ರಹಿಸಿದ್ದರು. ಅಲ್ಲದೆ, ಘಟನೆ ಹಿಂದೆ ಸುಖ್ಬೀರ್ ಬಾದಲ್ ಅವರಿದ್ದಾರೆಂದು ಆರೋಪಿಸಿದ್ದರು.
ಘಟನೆ ವೇಳೆ ಲುಧಿಯಾನ ಶಾಸಕ ಮನ್ಪ್ರೀತ್ ಸಿಂಗ್ ಆಯಾಲಿ ಅವರ ತಮ್ಮ ಹರ್ಕಿಂದರ್ ಸಿಂಗ್, ಯುವ ಅಕಾಲಿ ನಾಯಕ ಅಮಂದೀಪ್ ಸಿಂಗ್ ಔಲುಖ್ ಮತ್ತು ಪ್ರದೀಪ್ ಸಿಂಗ್ ಮಂಗತ್ ಅವರು ಇದ್ದರು. ಇದನ್ನು ಗಮನಿಸಿದರೆ ಕೇಜ್ರಿವಾಲ್ ಅವರನ್ನು ಕೊಲ್ಲುವ ಹುನ್ನಾರ ಈ ದಾಳಿಯದ್ದಾಗಿತ್ತು ಎಂಬುದು ಸ್ಪಷ್ಟವಾಗುತ್ತದೆ. ಘಟನೆಯಲ್ಲಿ ಪಂಜಾಬ್ ಪೊಲೀಸರ ಕೈಕೂಡ ಇದ್ದು, ಪರೋಕ್ಷವಾಗಿ ದಾಳಿ ಮಾಡಿದ ಗುಂಪಿಗೆ ಬೆಂಬಲವನ್ನು ನೀಡಿದ್ದಾರೆ ಎಂದು ಆರೋಪಿಸಿದ್ದಾರೆ.
ಇದರಂತೆ ಘಟನೆ ಕುರಿತಂತೆ ಟ್ವಿಟರ್ ನಲ್ಲಿ ಪ್ರತಿಕ್ರಿಯೆ ನೀಡಿರುವ ಕೇಜ್ರಿವಾಲ್ ಅವರು, ಬಾದಲ್ ಮತ್ತು ಕಾಂಗ್ರೆಸ್ ಅವರು ವಿಫಲವಾದರು. ನನ್ನ ಉತ್ಸಾಹವನ್ನು ಮುರಿಯಲು ಸಾಧ್ಯವಾಗಿಲ್ಲ ಎಂದು ಹೇಳಿದ್ದಾರೆ.
2017 ರಲ್ಲಿ ಪಂಜಾಬ್ನಲ್ಲಿ ವಿಧಾನಸಭಾ ಚುನಾವಣೆಗಳು ನಡೆಯಲಿದ್ದು, ದೆಹಲಿ ಮುಖ್ಯಮಂತ್ರಿ ಕೇಜ್ರಿವಾಲ್ ಅವರು ಆಮ್ ಆದ್ಮಿ ಪಕ್ಷದ ಸಂಘಟನೆ ನಡೆಸುವ ಸಲುವಾಗಿ 5 ದಿನಗಳ ಪ್ರವಾಸದಲ್ಲಿದ್ದಾರೆ.