ಪಣಜಿ: ಮಹಾರಾಷ್ಟ್ರ ಹಾಗೂ ಗೋವಾದಲ್ಲಿ ನಡೆಯುತ್ತಿದ್ದ ಹೈಪ್ರೊಫೈಲ್ ವೇಶ್ಯಾವಾಟಿಕೆಯಲ್ಲಿ ನಟಿಯರು ಹಾಗೂ ಮಾಡೆಲ್ ಗಳು ಭಾಗಿಯಾಗಿದ್ದು, ಈ ಸಂಬಂಧ ಪ್ರಮುಖ ಪಿಂಪ್ ಒಬ್ಬನನ್ನು ಬಂಧಿಸಲಾಗಿದೆ ಎಂದು ಗೋವಾ ಪೊಲೀಸರು ಗುರುವಾರ ತಿಳಿಸಿದ್ದಾರೆ.
ಹೈಪ್ರೊಫೈಲ್ ವೇಶ್ಯಾವಾಟಿಕೆಯಲ್ಲಿ ಖ್ಯಾತ ರಾಜಕಾರಣಿಗಳು, ನಟಿಯರು ಹಾಗೂ ಮಾಡೆಲ್ ಗಳು ಭಾಗಿಯಾಗಿರುವ ಬಗ್ಗೆ ಬಲವಾದ ಸಾಕ್ಷ್ಯಗಳು ಮತ್ತು ಇತರೆ ಮಾಹಿತಿಗಳನ್ನು ಪಿಂಪ್ ನಿಂದ ವಶಪಡಿಸಿಕೊಳ್ಳಲಾಗಿದೆ ಎಂದು ಅಪರಾಧ ವಿಭಾಗದ ಪೊಲೀಸ್ ವರಿಷ್ಠಾಧಿಕಾರಿ ಕಾರ್ತಿಕ್ ಕಶ್ಯಪ್ ಅವರು ಹೇಳಿದ್ದಾರೆ.
ಪಿಂಪ್ ಆನಂದ್ ಕುಮಾರ್ ಅಲಿಯಾಸ್ ಆಂಡಿಯನ್ನು ಇಂದು ಪಣಜಿಯ ಹೊರವಲಯದಲ್ಲಿರುವ ಟೋನಿ ಹೌಸಿಂಗ್ ಕಾಲೋನಿಯ ಆತನ ಮನೆಯಲ್ಲಿ ಬಂಧಿಸಲಾಗಿದೆ.ಆತನಿಂದ ಹಲವು ಸಾಕ್ಷ್ಯಗಳು, ಹೈಪ್ರೊಫೈಲ್ ಗಿರಾಕಿಗಳ ಪಟ್ಟಿ ಹಾಗೂ ನಟಿಯರ ಮತ್ತು ಮಾಡೆಲ್ ಗಳ ಪಟ್ಟಿಯನ್ನು ಪಡೆದುಕೊಳ್ಳಲಾಗಿದೆ ಎಂದು ಅವರು ತಿಳಿಸಿದ್ದಾರೆ.
ಪಿಂಪ್ ನೀಡಿದ ಪಟ್ಟಿಯಲ್ಲಿ ಹಲವು ರಾಜಕಾರಣಿಗಳ, ಸೆಲೆಬ್ರಿಟಿಗಳ, ನಟಿಯರ ಹಾಗೂ ಮಾಡೆಲ್ ಗಳ ಹೆಸರುಗಳಿವೆ ಎಂದು ಪೊಲೀಸ್ ಮೂಲಗಳು ತಿಳಿಸಿವೆ.