ನವದೆಹಲಿ: ರಾಷ್ಟ್ರ ರಾಜಧಾನಿ ದೆಹಲಿಯಲ್ಲಿ ಮತ್ತೊಂದು ಹೀನ ಕೃತ್ಯ ನಡೆದಿದೆ. ದಕ್ಷಿಣ ದೆಹಲಿಯ ವಸಂತ್‌ ವಿಹಾರ್‌ ಪ್ರದೇಶದಲ್ಲಿ 25 ವರ್ಷದ ಮಹಿಳೆಯೊಬ್ಬರನ್ನು ಅಪಹರಿಸಿ ಚಲಿಸುವ ಕಾರಿನಲ್ಲೇ ಸಾಮೂಹಿಕ ಅತ್ಯಾಚಾರ ಎಸಗಿದಿ ಘಟನೆ ಬುಧವಾರ ರಾತ್ರಿ ನಡೆದಿದೆ.

ನಿನ್ನೆ ರಾತ್ರಿ ಪಿವಿಆರ್‌ ಚಿತ್ರಮಂದಿರದಲ್ಲಿ ಸಿನಿಮಾ ನೋಡಿ ಬೆಳಗಿನ ಜಾವ 3.15ರ ಸುಮಾರಿಗೆ ರಸ್ತೆಯಲ್ಲಿ ನಡೆದುಕೊಂಡು ಮನೆಗೆ ಮರಳುತ್ತಿದ್ದ ಇಬ್ಬರು ಗೆಳತಿಯರ ಪೈಕಿ ಓರ್ವ ಮಹಿಳೆಯನ್ನು ಅಪಹರಿಸಿದ ದುಷ್ಕರ್ಮಿಗಳು, ಚಲಿಸುವ ಕಾರಿನಲ್ಲೇ ಅತ್ಯಾಚಾರ ಎಸಗಿ ಬಿಟ್ಟು ಹೋಗಿದ್ದಾರೆ.

ಮಹಿಳೆಯರು ನಡೆದುಕೊಂಡು ಹೋಗುತ್ತಿದ್ದಾಗ ಕಾರೊಂದು ಇದ್ದಕ್ಕಿದ್ದಂತೆಯೇ ಅವರ ಬಳಿ ಬಂದು ನಿಂತಿದೆ. ಕಾರಲ್ಲಿದ್ದ ಮೂವರು ಯುವಕರಲ್ಲಿ ಒಬ್ಟಾತ ಹೊರಗೆ ನಡೆದುಕೊಂಡು ಹೋಗುತ್ತಿದ್ದ ಇಬ್ಬರಲ್ಲಿ ಒಬ್ಬಳನ್ನು ಆಚೆಗೆ ದೂಡಿ ಇನ್ನೊಬ್ಬಳನ್ನು ಕಾರಿನೊಳಗೆ ಎಳೆದುಕೊಂಡಿದ್ದಾನೆ. ನೋಡಿ ನೋಡುತ್ತಿದ್ದಂತೆಯೇ ಕಾರು ಮುಂದಕ್ಕೆ ಚಲಿಸಿ ಅದೃಶ್ಯವಾಗಿದೆ.

ಕಾರಿನಲ್ಲಿದ್ದ ಮೂವರು ಕಾಮಾಂಧ ಯುವಕರು ತಾವು ಕಾರಿನೊಳಗೆ ಎಳೆದುಕೊಂಡಿದ್ದ ಮಹಿಳೆಗೆ ಲೈಂಗಿಕ ಕಿರುಕುಳ ನೀಡಿದ್ದಾರೆ. ಆಕೆಯ ಪ್ರತಿರೋಧದ ಸದ್ದನ್ನು ಅಡಗಿಸಿ ಸರದಿ ಪ್ರಕಾರ ಆಕೆಯ ಮೇಲೆ ಅತ್ಯಾಚಾರ ಎಸಗಿದ್ದು, ತಮ್ಮ ಕೆಲಸ ಮುಗಿದ ಬಳಿಕ ಆ ಕಾಮಾಂಧರು ಮಹಿಳೆಯನ್ನು ಪೂರ್ವಿ ಮಾರ್ಗದ ರಸ್ತೆ ಬದಿ ಎಸೆದು ಪರಾರಿಯಾಗಿದ್ದಾರೆ.

ಇತ್ತ ತನ್ನ ಗೆಳತಿಯ ಅಪಹರಣ ತಪ್ಪಿಸಲು ಯತ್ನಿಸಿ ರಸ್ತೆಯಂಚಿಗೆ ದೂಡಲ್ಪಟ್ಟಿದ್ದ ಯುವತಿಯು ಹೇಗೋ ಕಾಮಾಂಧರ ಕಾರಿನ ನಂಬರ್‌ ನೋಟ್‌ ಮಾಡಿಕೊಂಡು ಕೂಡಲೇ ಪೊಲೀಸರಿಗೆ ಕಾರಿನ ನಂಬರ್‌ ಕೊಟ್ಟು ತನ್ನ ಗೆಳತಿ ಅಪಹರಣಗೊಂಡ ವಿಷಯ ತಿಳಿಸಿದ್ದಾರೆ.

ಕೂಡಲೇ ಕಾರ್ಯಾಚರಣೆಗಿಳಿದ ಪೊಲೀಸರು ಕೊನೆಗೂ ಆ ಕಾರನ್ನು ಪತ್ತೆ ಮಾಡಿದ್ದು, ಕಾರಿನ ಮಾಲೀಕ ದೆಹಲಿಯ ಗೀತಾ ಕಾಲನಿಯ ನಿವಾಸಿ ಎಂದು ತಿಳಿದು ಬಂದಿದೆ. ಅಲ್ಲದೆ ಮೂವರು ಅತ್ಯಾಚಾರಿಗಳನ್ನು ಪೊಲೀಸರು ಬಂಧಿಸಿದ್ದಾರೆ.

ಅತ್ಯಾಚಾರಕ್ಕೆ ಒಳಗಾದ ಮಹಿಳೆಯನ್ನು ವೈದ್ಯಕೀಯ ಪರೀಕ್ಷೆಗೆ ಒಳಪಡಿಸಲಾಗಿದ್ದು ಆಕೆಯ ಮೇಲೆ ಅತ್ಯಾಚಾರ ನಡೆದಿರುವುದು ದೃಢಪಟ್ಟಿದೆ. ಅಂತೆಯೇ ಮೂವರು ಆರೋಪಿ ತರುಣರ ವಿರುದ್ಧ ಅತ್ಯಾಚಾರ ಕೇಸನ್ನು ದಾಖಲಿಸಿಕೊಳ್ಳಲಾಗಿದೆ ಎಂದು ಹಿರಿಯ ಪೊಲೀಸ್‌ ಅಧಿಕಾರಿ ತಿಳಿಸಿದ್ದಾರೆ.