ನವದೆಹಲಿ: ದೇಶದ ಎಲ್ಲ ಸಮಸ್ಯೆಗಳಿಗೆ ಅಭಿವೃದ್ಧಿಯೊಂದೇ ಮಂತ್ರ. ಅದಕ್ಕಷ್ಟೇ ನಾವು ಹೆಚ್ಚಿನ ಆದ್ಯತೆ ನೀಡಬೇಕು ಎಂದು ಪ್ರಧಾನಿ ನರೇಂದ್ರ ಮೋದಿ ಹೇಳಿದ್ದಾರೆ.

'ನಮ್ಮ ಸುತ್ತಲಿನ ಶಕ್ತಿಗಳು ನಾವು ತುಳಿಯುತ್ತಿರುವ ದಾರಿಯ ದಿಕ್ಕು ತಪ್ಪಿಸಲು ಪ್ರಯತ್ನ ಮಾಡಬಹುದು. ಆದರೆ ನಮ್ಮವರು ಅದಾವುದಕ್ಕೂ ಎದೆಗುಂದಬಾರದು. ಅಭಿವೃದ್ಧಿಯೊಂದೇ ನಮ್ಮ ಮಂತ್ರ.ನಾವು ಅದಕ್ಕಷ್ಟೇ ಸೀಮಿತವಾಗಿರೋಣ ಎಂದು ಹೇಳಿದ್ದಾರೆ.

ನವದೆಹಲಿಯಲ್ಲಿ  ಎರಡು ದಿನಗಳಿಂದ ನಡೆದ ಬಿಜೆಪಿ ಕಾರ್ಯಕಾರಿಣಿಯ  ಸಮಾರೋಪದಲ್ಲಿ ಮಾತನಾಡಿದ ಅವರು ಅನಗತ್ಯವಾದ ವಿಷಯಗಳ ಬಗ್ಗೆ ತಲೆಕೆಡಿಸಿಕೊಳ್ಳದೇ ದೇಶದ ಅಭಿವೃದ್ಧಿಯ ಕಡೆ ಮಾತ್ರ ಗಮನ ಹರಿಸಬೇಕು ಎಂದರು.

ಹಿಂದಿನ ಯಾವುದೇ ಸರ್ಕಾರಗಳು 65 ವರ್ಷಗಳಲ್ಲಿ ಸಾಧಿಸದ ಯಶಸ್ಸು ನಮ್ಮ ಪಾಲಾಗಿದೆ. ಪ್ರತೀ ಗ್ರಾಮಗಳಿಗೂ ವಿದ್ಯುತ್ ಸಂಪರ್ಕ ನೀಡುವ ಮೂಲಕ ನಾವು ಸಾಧನೆಯ ಉತ್ತುಂಗಕ್ಕೇರಿದ್ದೇವೆ. ಕಳೆದ 22 ತಿಂಗಳ ನಮ್ಮ ಅಧಿಕಾರಾವಧಿಯಲ್ಲಿ ಯಾವುದೇ ಭ್ರಷ್ಟಾಚಾರ ಪ್ರಕರಣಗಳು ನಡೆದಿಲ್ಲ. ಆರೋಪ ಮುಕ್ತ ಸರ್ಕಾರ ನಮ್ಮದಾಗಬೇಕು. ಭೇಟಿ ಬಚಾವೊ, ಭೇಟಿ ಪಡಾವೊದಂತಹ ಯೋಜನೆಗಳ ಅಭಿಯಾನಕ್ಕೆ ಕಾರ್ಯಕರ್ತರು ಮುಂದಾಗಬೇಕು,'' ಎಂದು ಮೋದಿ ಪ್ರತಿಪಾದಿಸಿದರು.