ಮುಂಬೈ: ಮುಂಬಯಿ ಪೂರ್ವ ಡೆಯೋನರ್ ಕಸವಿಲೇವಾರಿ ಸ್ಥಳದಲ್ಲಿ ಶನಿವಾರ ಸಂಜೆ ಹೊತ್ತಿಕೊಂಡ ಬೆಂಕಿಯನ್ನು ನಂದಿಸಲು ಅಗ್ನಿಶಾಮಕ ದಳ ಇನ್ನೂ ಹರಸಾಹಸಪಡುತ್ತಿದೆ.

12ಕ್ಕೂ ಹೆಚ್ಚು ಅಗ್ನಿಶಾಮಕ ದಳ ವಾಹನ ಸ್ಥಳದಲ್ಲಿ ಕಾರ್ಯಾಚರಣೆ ಮುಂದುವರಿಸಿದೆ. ಇದರಿಂದಾಗಿ ಹುಟ್ಟಿಕೊಂಡ ಭಾರಿ ಪ್ರಮಾಣದ ಹೊಗೆ, ವಾಸನೆ ಸುತ್ತಲಿನ ನಿವಾಸಿಗಳ ಆರೋಗ್ಯದ ಮೇಲೆ ಪರಿಣಾಮ ಬೀರಲಾರಂಭಿಸಿದೆ.  ಭಾನುವಾರ ಮಧ್ಯಾಹ್ನ ಕೂಡ ಮತ್ತೆ ಬೆಂಕಿ ಹೊತ್ತಿಕೊಂಡಿದೆ. ಕಸದ ರಾಶಿಯಿಂದ ಹೊರಬರುತ್ತಿರುವ ಕೆಟ್ಟಹೊಗೆ ಇಲ್ಲಿನ ಜನರ ಮೇಲೆ ದುಷ್ಪರಿಣಾಮ ಬೀರಲಿದೆ,

ಬೆಂಕಿ ಹೊತ್ತಿಕೊಂಡಿರುವ ಸ್ಥಳದಲ್ಲೇ ಶಾಲಾ ಕಾಲೇಜುಗಳಿದ್ದು ವಿದ್ಯಾರ್ಥಿಗಳ ಮೇಲೆ ಹೊಗೆ ಕೆಟ್ಟ ಪರಿಣಾಮ ಬೀರಲಿದೆ ಎಂಬ ಹಿನ್ನೆಲೆಯಲ್ಲಿ ಶಾಲಾ ಕಾಲೇಜುಗಳಿಗೆ ರಜೆ ಘೋಷಿಸಲಾಗಿದೆ.

ಮುಂಬೈ ನಗರದಲ್ಲಿರುವ ಬೃಹತ್ ಕಸವಿಲೇವಾರಿ ಕೇಂದ್ರ ಇದಾಗಿದ್ದು, ಹೆಚ್ಚೂಕಡಿಮೆ 326 ಎಕರೆ ಜಾಗದಲ್ಲಿದೆ. ಸಾಕಷ್ಟು ಪ್ಲಾಸ್ಟಿಕ್ ತ್ಯಾಜ್ಯಗಳು ಇರುವ ಕಾರಣ ಬೆಂಕಿ ವಿಸ್ತರಿಸುತ್ತಲೇ ಇದ್ದು, ನಂದಿಸಲು ಸಿಬ್ಬಂದಿ ಹರಸಾಹಸ ಪಡುತ್ತಿದ್ದಾರೆ.