ನವದೆಹಲಿ: ಶೇ.100 ಸಂಸದರ ವೇತನ ಹೆಚ್ಚಳ ಕುರಿತ ಪ್ರಸ್ತಾಪಕ್ಕೆ ಪ್ರಧಾನಿ ನರೇಂದ್ರ ಮೋದಿ ಅವರು ತಣ್ಣೀರು ಎರೆಚಿದ್ದಾರೆ.

ಸಂಸದರ ವೇತನವನ್ನು 50 ಸಾವಿರದಿಂದ 1 ಲಕ್ಷ ರುಪಾಯಿವರೆಗೆ, ಕ್ಷೇತ್ರ ಭತ್ಯೆಯನ್ನು 45 ರಿಂದ 90 ಸಾವಿರ ರುಪಾಯಿವರೆಗೆ ಹೆಚ್ಚಳ ಸೇರಿದಂತೆ 60ಕ್ಕೂ ಹೆಚ್ಚು ಬೇಡಿಕೆಗಳಿಗೆ ಪ್ರಧಾನಿ ಅಸಮ್ಮತಿ ಸೂಚಿಸಿದ್ದಾರೆ ಎಂದು ಸುದ್ದಿ ಮೂಲಗಳಿಂದ ತಿಳಿದುಬಂದಿದೆ.

ಬಿಜೆಪಿ ಸಂಸದ ಯೋಗಿ ಆದಿತ್ಯನಾಥ್ ನೇತೃತ್ವದ ಸಂಸದರ ವೇತನ ಮತ್ತು ಸವಲತ್ತುಗಳ ಜಂಟಿ ಸಲಹಾ ಸಮಿತಿ ಸಂಸತ್ ಸದಸ್ಯರಿಗೆ ಶೇ. 100ರಷ್ಟು ವೇತನ ಹೆಚ್ಚಳ ಶಿಫಾರಸು ಮಾಡಿತ್ತು. ಈ ಪ್ರಸ್ತಾಪಗಳು ಪೂರ್ತಿಯಾಗಿ ಅಂಗೀಕಾರವಾದರೆ ಸಂಸದರಿಗೆ ನೀಡಲಾಗುವ ವೇತನ ಭತ್ಯೆಗಳ ಮೊತ್ತ 1,40,000 ರುಪಾಯಿಗಳಿಂದ 2,80,00 ರುಪಾಯಿಗಳಿಗೆ ಏರಿಕೆಯಾಗಲಿದೆ.

ಸಂಸದರ ವೇತನ ಮತ್ತು ಸವಲತ್ತುಗಳ ಜಂಟಿ ಸಲಹಾ ಸಮಿತಿ ನೀಡಿರುವ ಶಿಫಾರಸ್ಸಿನ ಪೈಕಿ ಪೈಕಿ ಶೇ. 75ರಷ್ಟನ್ನು ಸಂಸದೀಯ ವ್ಯವಹಾರಗಳ ಸಚಿವಾಲಯವು ನಿರಾಕರಿಸಿದೆ ಎಂದು ಮೂಲಗಳು ಹೇಳಿವೆ. ಇನ್ನು 5 ರಾಜ್ಯಗಳ ಚುನಾವಣಾ ಪ್ರಕ್ರಿಯೆ ಚಾಲನೆ ಇರುವಾಗ ಸಂಸದರ ವೇತನ ಪರಿಷ್ಕರಣೆ ಪ್ರಕ್ರಿಯೆಗೆ ಅಂಗೀಕಾರ ನೀಡಿದರೆ ಎಡಪಕ್ಷಗಳ ತೀವ್ರ ಟೀಕೆಗೆ ಗುರಿಯಾಗಲಿರುವ ಸಾಧ್ಯತೆಗಳಿವೆ ಎಂದೂ ಹೇಳಲಾಗಿದೆ.