ಮುಂಬೈ: ಅಮೀರ್ ಖಾನ್ ಮತ್ತು ಅವರ ಪತ್ನಿ ಕಿರಣ್ ರಾವ್ ಅವರ ಮುಂಬೈಯ ಬಾಂದ್ರಾದಲ್ಲಿರುವ ಮನೆಯಿಂದ ಸುಮಾರು 80 ಲಕ್ಷ ರೂಪಾಯಿ ಬೆಲೆ ಬಾಳುವ ಚಿನ್ನಾಭರಣ ಕಳವಾಗಿದ್ದು ಈ ಸಂಬಂಧ ಖಾರ್ ಠಾಣೆ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ ಎಂದು ಮಾಧ್ಯಮದಲ್ಲಿ ವರದಿಯಾಗಿದೆ.

ಕಿರಣ್ ರಾವ್ ಅವರ ಸಂಬಂಧಿಕರು ದೂರು ದಾಖಲಿಸಿದ್ದು, ಸೆಕ್ಷನ್ 453ರಡಿ ಪೊಲೀಸರು ಎಫ್ ಐಆರ್ ದಾಖಲಿಸಿಕೊಂಡಿದ್ದಾರೆ.

ಕಳೆದ ವಾರ ತಮ್ಮ ಬೆಡ್ ರೂಂನ ತಿಜೋರಿಯಿಂದ ಉಂಗುರ ಮತ್ತು ವಜ್ರದ ನೆಕ್ಲೆಸ್ ಕಾಣೆಯಾಗಿರುವುದು ಕಿರಣ್ ರಾವ್ ಗಮನಕ್ಕೆ ಬಂದಿತ್ತು. ಆಗ ಕಿರಣ್ ರಾವ್ ಸಂಬಂಧಿಕರು ಪೊಲೀಸ್ ಠಾಣೆಯಲ್ಲಿ ದೂರು ನೀಡಿದರು.

ಈ ಬಗ್ಗೆ ಪ್ರತಿಕ್ರಿಯೆ ಕೇಳೋಣವೆಂದು ಮಾಧ್ಯಮದವರು ಸಂಪರ್ಕಿಸಿದರೆ ಕಿರಣ್ ರಾವ್ ಸಿಗಲಿಲ್ಲ. ಖಾರ್ ಪೊಲೀಸ್ ಠಾಣೆ ಅಧಿಕಾರಿಗಳು ಪ್ರತಿಕ್ರಿಯೆ ನೀಡಲು ನಿರಾಕರಿಸಿದ್ದಾರೆ.

ಆದರೆ ಹಿರಿಯ ಪೊಲೀಸ್ ಅಧಿಕಾರಿಯೊಬ್ಬರು ಸುದ್ದಿಯನ್ನು ಖಚಿತಪಡಿಸಿದ್ದಾರೆ. 

ಮನೆ ಕೆಲಸದವರ ಮೇಲೆ ಶಂಕೆ: ಈ ಪ್ರಕರಣ ಹಿಂದೆ ಮನೆಕೆಲಸದವರನ್ನು ಆರೋಪಿಗಳೆಂದು ಶಂಕಿಸಲಾಗಿದ್ದು, ಮೂವರನ್ನು ಕಳೆದ 5 ದಿನಗಳಿಂದ ಪೊಲೀಸರು ದಿನಪೂರ್ತಿ ವಿಚಾರಣೆ ನಡೆಸುತ್ತಿದ್ದಾರೆ. ಅವರ ಮನೆಗಳಲ್ಲಿ ಆಭರಣ ಇಟ್ಟಿರಬಹುದೇ ಎಂದು ಕೂಡ ಹುಡುಕಿದ್ದಾರೆ. ಆದರೆ ಇದುವರೆಗೆ ತನಿಖೆಯಲ್ಲಿ ಯಾವುದೇ ಬೆಳವಣಿಗೆ ಕಂಡುಬಂದಿಲ್ಲ ಎಂದು ಪೊಲೀಸರು ಹೇಳಿದ್ದಾರೆ.