ಹೋಶಿರ್ಪುರ: ಪಂಜಾಬ್ ನ ಶಾಸ್ತ್ರಿ ನಗರದ ಗುಡಿಸಲೊಂದರಲ್ಲಿ ಗ್ರನೇಡ್ ಸ್ಫೋಟಗೊಂಡು ಓರ್ವ ಮಹಿಳೆ ಸೇರಿದಂತೆ ರದ್ದಿ ಸಂಗ್ರಹಿಸುವ ಇಬ್ಬರು ಸ್ಥಳದಲ್ಲೇ ಮೃತಪಟ್ಟಿರುವ ಹಾಗೂ ನಾಲ್ವರು ಗಂಭೀರವಾಗಿ ಗಾಯಗೊಂಡಿರುವ ಘಟನೆ ಭಾನುವಾರ ನಡೆದಿದೆ.

ಘಟನೆಯಲ್ಲಿ ಮೃತಪಟ್ಟ ವ್ಯಕ್ತಿಗಳು ಗ್ರನೇಡ್ ನ ಹಿತ್ತಾಳೆಯನ್ನು ತೆಗೆದುಹಾಕಲು ಯತ್ನಿಸುತ್ತಿದ್ದ ವೇಳೆ ಅದು ಸ್ಫೋಟಗೊಂಡಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಮೃತಪಟ್ಟವರನ್ನು ಶಾಸ್ತ್ರಿನಗರದ ನಿವಾಸಿ ಫಕೀರಾ ಅವರ ಪತ್ನಿ ಮಾಮೋ(60) ಹಾಗೂ ಮೋಹಲ್ಲಾ ಕಮಲಾಪುರದ ನಿವಾಸಿ ಕಲ್ಲಿ ರಾಮ್ ಅವರ ಪುತ್ರ ಮೋಹನ್ ಲಾಲ್(20) ಎಂದು ಗುರುತಿಸಲಾಗಿದೆ. ಇನ್ನು ಘಟನೆಯಲ್ಲಿ ಗಾಯಗೊಂಡವರನ್ನು ಸ್ಥಳೀಯ ಆಸ್ಪತ್ರೆಗೆ ದಾಖಲಿಸಲಾಗಿದೆ. 

ಹೋಶಿರ್ಪುರ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಕುಲ್ವಂತ್ ಸಿಂಗ್ ಅವರು ಸ್ಥಳಕ್ಕೆ ಆಗಮಿಸಿದ್ದು, ಪರಿಶೀಲನೆ ನಡೆಸುತ್ತಿದ್ದಾರೆ.