ಕೊಲ್ಕೊತಾ: ಕೊಲ್ಕೋತಾ ಸೆಷನ್ ಕೋರ್ಟ್ ಶಿಕ್ಷೆ ವಿಧಿಸಿದ 9 ತಿಂಗಳ ನಂತರ ಪಾರ್ಕ್ ಸ್ಟ್ರೀಟ್ ಅತ್ಯಾಚಾರ ಮತ್ತು ಕೊಲೆ ಪ್ರಕರಣದ ಪ್ರಮುಖ ಆರೋಪಿಯನ್ನು ಪೊಲೀಸರು ಬಂಧಿಸಿದ್ದಾರೆ.

ಖಾದರ್ ಖಾನ್ ಮತ್ತು ಆತನ ಸಹಚರನನ್ನು ಗ್ರೇಟರ್ ನೋಯ್ಡಾದ ಎನ್ ಸಿಆರ್ ನಲ್ಲಿ ಗುರುವಾರ ರಾತ್ರಿ ಬಂಧಿಸಲಾಗಿದೆ.  ಸಂಬಂಧಿಕರ ಫೋನ್ ಗಳನ್ನು ಟ್ರಾಪ್ ಮಾಡಿದಾಗ ಇಬ್ಬರು ಆರೋಪಿಗಳ ವಿಳಾಸ ಪತ್ತೆಯಾಗಿದೆ. ಗಾಜಿಯಾಬಾದ್ ನ ಮನೆಯೊಂದರಲ್ಲಿ ನಕಲಿ ಹೆಸರುಗಳನ್ನಿಟ್ಟುಕೊಂಡು ಕಳೆದ ನಾಲ್ಕೂವರೆ ವರ್ಷಗಳಿಂದ ವಾಸವಾಗಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ.

ತಮ್ಮ ಸಂಬಂಧಿಕರೊಬ್ಬರ ನೆರವಿನಿಂದ ಗಾಜಿಯಾಬಾದ್ ನಲ್ಲಿ ಮನೆ ಬಾಡಿಗೆ ಪಡೆದಿದ್ದರು. ಕಳೆದ 10 ದಿನಗಳಿಂದ ಪೊಲೀಸರು ಇವರ ಚಲನವಲನಗಳ ಮೇಲೆ ನಿಗಾ ಇರಿಸಿದ್ದರು.ಗುರುವಾರ ಇಬ್ಬರು ಆರೋಪಿಗಳು ತಮ್ಮ ಸಂಬಂಧ ಹುಟ್ಟುಹಬ್ಬ ಸಮಾರಂಭಕ್ಕೆ ದೆಹಲಿಗೆ ತೆರಳಿ ವಾಪಸ್ ಬರುವಾಗ  ಗಾಜಿಯಾಬಾದ್ ನಲ್ಲಿ ಪೊಲೀಸರು ಬಂಧಿಸಿದ್ದಾರೆ.

ತಮ್ಮ ಗುರುತು ಸಿಗದಂತೆ ಅವರು ತಮ್ಮ ವೇಷ ಮರೆ ಮಾಚಿಕೊಂಡಿದ್ದರು ಎನ್ನಲಾಗಿದೆ, ಇಂದು ಅವರನ್ನು ಕೊಲ್ಕೋತಾ ಸೆಷನ್ಸ್ ಕೋರ್ಟ್ ಗೆ ಹಾಜರು ಪಡಿಸಲಾಗಿದೆ.

ಪಾರ್ಕ್ ಸ್ಟ್ರೀಟ್ ಪ್ರಕರಣದ ಎಲ್ಲಾ ಆರೋಪಿಗಳಿಗೂ ನ್ಯಾಯಾಲಯ ಶಿಕ್ಷೆ ವಿಧಿಸಿದೆ. ಸುಮಿತ್ ಬಜಾಜ್, ಖಾದರ್ ಖಾನ್ ಸಹೋದರ ರುಮಾನ್ ಖಾನ್ ಮತ್ತು ನಾಸೀರ್ ಖಾನ್ ಡಿಸೆಂಬರ್ 11 , 2015 ರಿಂದ ಜೈಲು ಶಿಕ್ಷೆ ಅನುಭವಿಸುತ್ತಿದ್ದಾರೆ.

2012 ಫೆಬ್ರವರಿ 2 ರಂಜು ಸುಜೆಟ್ ಜೋರ್ಡಾನ್ ಎಂಬ ಎರಡು ಮಕ್ಕಳ ತಾಯಿಯ ಮೇಲೆ ಐವರು ಪಾರ್ಕ್ ಸ್ಟ್ರೀಟ್ ನ ಚಲಿಸುತ್ತಿದ್ದ ಕಾರಿನಲ್ಲಿ ಸಾಮೂಹಿಕ ಅತ್ಯಾಚಾರ ನಡೆಸಿದ್ದರು. ಮಾರ್ಚ್ 13, 2015 ರಂದು ಬಹು ಅಂಗಾಂಗ ವೈಫಲ್ಯದಿಂದ ಆಕೆ ಸಾವನ್ನಪ್ಪಿದ್ದರು.