ಲಕ್ನೋ: ಉತ್ತರ ಪ್ರದೇಶದ 21 ಸರ್ಕಾರಿ ಸಕ್ಕರೆ ಕಾರ್ಖಾನೆಗಳನ್ನು ಅಗ್ಗದ ದರಕ್ಕೆ ಮಾರಾಟ ಮಾಡಿರುವ ಮಾಜಿ ಮುಖ್ಯಮಂತ್ರಿ ಮಾಯಾವತಿ ವಿರುದ್ಧ ಸಿಎಂ ಯೋಗಿ ಆದಿತ್ಯನಾಥ್ ತನಿಖೆಗೆ ಆದೇಶಿಸಿದ್ದಾರೆ.

ಮಾಯಾವತಿ ಉತ್ತರ ಪ್ರದೇಶದ ಮುಖ್ಯಮಂತ್ರಿ ಆಗಿದ್ದ ವೇಳೆ ಸಕ್ಕರೆ ಕಾರ್ಖಾನೆಗಳಿಂದ ಹೆಚ್ಚೆಚ್ಚು ಲಾಭ ಗಳಿಸಿ ನಂತರ ಅವುಗಳನ್ನು ಅತಿ ಕಡಿಮೆ ಬೆಲೆ ಮಾರಾಟ ಮಾಡಿದ್ದರು. ಈ ಸಂಬಂಧ ತನಿಖೆ ನಡೆಸುವಂತೆ ಕಬ್ಬು ಅಭಿವೃದ್ಧಿ ಮತ್ತು ಸಕ್ಕರೆ ಕಾರ್ಖಾನೆ ಇಲಾಖೆಗೆ ಶುಕ್ರವಾರ  ಸೂಚಿಸಿದ್ದಾರೆ.

ಸರ್ಕಾರಿ ಆಸ್ತಿಗಳನ್ನು ಅಷ್ಟೊಂದು ಅಗ್ಗವಾದ ಕಡಿಮೆ ಬೆಲೆ ಮಾರಾಟ ಮಾಡಲು ಯಾರಿಗೂ ಹಕ್ಕಿಲ್ಲ, ಅದು ಜನರ ಆಸ್ತಿ ಎಂದು ಹೇಳಿರುವ ಅವರು, ಪ್ರಕರಣವನ್ನು ಸಿಬಿಐ ತನಿಖೆಗೆ ವಹಿಸಲು ನನಗೆ ಮುಜುಗರವಿಲ್ಲ ಎಂದು ತಿಳಿಸಿದ್ದಾರೆ. 

1,180 ಕೋಟಿ ರೂಗೆ ಮಾಯಾವತಿ ಸಕ್ಕರೆ ಕಾರ್ಖಾನೆಗಳನ್ನ ಮಾರಾಟ ಮಾಡಿದ್ದರು. ಆದರೆ ಮಾಜಿ ಮುಖ್ಯಮಂತ್ರಿ ಅಖಿಲೇಶ್ ಯಾದವ್ ಸರ್ಕಾರ ಬಹಜನ ಸಮಾಜವಾದಿ ಪಕ್ಷದೊಡನೆ ರಾಜಕೀಯ ವೈರತ್ವ ಬೆಳೆಸಿಕೊಳ್ಳುವುದು ಬೇಡ ಎಂಬ ಹಿನ್ನೆಲೆಯಲ್ಲಿ ಈ ಪ್ರಕರಣದ ಬಗ್ಗೆ ತಲೆಕೆಡಿಸಿಕೊಳ್ಳದೇ ಕೋಲ್ಡ್ ಸ್ಟೋರೇಜ್ ನಲ್ಲಿಟ್ಟಿತ್ತು.

ಮಾಯಾವತಿ ಮಾರಾಟ ಮಾಡಿರುವ 21 ಸಕ್ಕರೆ ಕಾರ್ಖಾನೆಗಳು ಕಬ್ಬು ಅಭಿವೃದ್ಧಿ ನಿಗಮ ಮತ್ತು ಸಕ್ಕರೆ ನಿಗಮ ಗಳಿಗೆ ಸೇರಿದವುಗಳಾಗಿವೆ.