ಭುವನೇಶ್ವರ: ಈ ಹಿಂದೆ ಪತ್ನಿ ಶವ ಸಾಗಾಟಕ್ಕೆ ಹಣವಿಲ್ಲದೇ ತನ್ನ ಹೆಗಲ ಮೇಲೆ ಶವ ಹೊತ್ತು ಸಾಗುವ ಮೂಲಕ ದೇಶವ್ಯಾಪಿ ವ್ಯಾಪಕ ಸುದ್ದಿಗೆ ಗ್ರಾಸವಾಗಿದ್ದ ಒಡಿಶಾ ಮೂಲದ ಬುಡಕಟ್ಟು ಜನಾಂಗದ ಧನಮಾಜ್ಹಿ ಆರ್ಥಿಕವಾಗಿ  ಸುಧಾರಣೆ ಕಂಡಿದೆ.

ಮಾಧ್ಯಮಗಳಲ್ಲಿ ಸುದ್ದಿ ವೈರಲ್ ಆದ ಕಾರಣವೋ ಅಥವಾ ಸರ್ಕಾರದ ನೆರವಿನಿಂದಲೋ ಇದೀಗ ಮಾಜ್ಹಿ ಆರ್ಥಿಕವಾಗಿ ಸಾಕಷ್ಟು ಸುಧಾರಣೆ ಕಂಡಿದ್ದಾನೆ. ಪ್ರಸ್ತುತ ಮಾಜ್ಹಿ ಒಡಿಶಾದ ಕಲಾಹಂಡಿಯಲ್ಲಿ ಒಂದು ಸ್ವಂತ ಮನೆಯನ್ನು  ಹೊಂದಿದ್ದು, ಪ್ರಧಾನ ಮಂತ್ರಿ ಆವಾಸ್ ಯೋಜನೆಯಡಿಯಲ್ಲಿ ಮನೆಯನ್ನು ನಿರ್ಮಾಣ ಮಾಡಲಾಗುತ್ತಿದೆ. ಓಡಾಡಲು ಒಂದು ಸ್ವಂತ ಬೈಕ್ ಅನ್ನು ಕೂಡ ಖರೀದಿ ಮಾಡಿದ್ದು, ಇನ್ನು ಪ್ರಮುಖ ವಿತಾರವೆಂದರೆ ಮಾಜ್ಹಿ ಇದೀಗ  ಎರಡನೇ ವಿವಾಹವಾಗಿದ್ದು, ಪತ್ನಿಯೊಂದಿಗೆ ಸುಖ ಜೀವನ ನಡೆಸುತ್ತಿದ್ದು, ಆತನ ಮೂವರು ಹೆಣ್ಣುಮಕ್ಕಳು ಭುವನೇಶ್ವರದಲ್ಲಿ ಹಾಸ್ಟೆಲ್ ಇದ್ದುಕೊಂಡು ವಿದ್ಯಾಭ್ಯಾಸ ನಡೆಸುತ್ತಿದ್ದಾರೆ.

ಅಂದು ಧನಮಾಜ್ಹಿ ಕುರಿತ ಸುದ್ದಿ ಮಾಧ್ಯಮಗಳಲ್ಲಿ ವೈರಲ್ ಆಗುತ್ತಿದ್ದಂತೆಯೇ ಆತನ ಕರುಣಾಜನಕ ಕಥೆ ಕೇಳಿ ಹಲವರು ಆತನಿಗೆ ಆರ್ಥಿಕ ನೆರವು ನೀಡಿದ್ದಾರೆ, ಈ ರೀತಿ ನೆರವು ನೀಡಿದ ಹಣದ ಪ್ರಮಾಣ ಸುಮಾರು 9 ಲಕ್ಷ  ರೂಗಳಾಗಿದ್ದು, ಈ ಹಣವನ್ನು ಧನಮಾಜ್ಹಿ ಬ್ಯಾಂಕ್ ನಲ್ಲಿ ಠೇವಣಿ ಇಟ್ಟಿದ್ದಾನೆ. 

ಅಂದು ಯಾವ ರಸ್ತೆಯಲ್ಲಿ ಹಣವಿಲ್ಲದೇ ಪತ್ನಿ ಶವವನ್ನು ಹೆಗಲ ಮೇಲೆ ಹೊತ್ತು ಸಾಗಿದ್ದನೋ ಇಂದು ಅದೇ ರಸ್ತೆಯಲ್ಲಿ ಧನಮಾಜ್ಹಿ ಬೈಕ್ ನಲ್ಲಿ ತನ್ನ ಎರಡನೇ ಪತ್ನಿಯೊಂದಿಗೆ ಓಡಾಡುತ್ತಿದ್ದಾನೆ.