ನವದೆಹಲಿ: ಮಕ್ಕಳಲ್ಲಿ ಅಶ್ಲೀಲ ವಿಷಯಗಳನ್ನು ತುಂಬುವುದನ್ನು ತಡೆಯಲು ಎಲ್ಲಾ ರೀತಿಯ ಕ್ರಮಗಳನ್ನು ಕೈಗೊಳ್ಳಲಾಗುತ್ತಿದ್ದು, ಈ ನಿಟ್ಟಿನಲ್ಲಿ  ಅಂತಹ ವಿಷಯಗಳನ್ನು ನೀಡುವ ಸುಮಾರು ಮೂರೂವರೆ ಸಾವಿರ ವೆಬ್ ಸೈಟ್ ಗಳನ್ನು ಕಳೆದ ತಿಂಗಳು ಬ್ಲಾಕ್ ಮಾಡಲಾಗಿದೆ ಎಂದು ಸುಪ್ರೀಂ ಕೋರ್ಟ್ ಗೆ ತಿಳಿಸಿದೆ.

ನ್ಯಾಯಮೂರ್ತಿ ದೀಪಕ್ ಮಿಶ್ರಾ ಅವರನ್ನೊಳಗೊಂಡ ತ್ರಿಸದಸ್ಯ ಪೀಠಕ್ಕೆ ತಿಳಿಸಿದ ಕೇಂದ್ರ ಸರ್ಕಾರ, ಮಕ್ಕಳ ಪೊರ್ನೊಗ್ರಫಿ ವಿಷಯಗಳು ಮಕ್ಕಳಿಗೆ ಸಿಗುವುದನ್ನು ತಡೆಯಲು ಶಾಲೆಗಳಲ್ಲಿ ಜ್ಯಾಮರ್ ಗಳನ್ನು ಸ್ಥಾಪಿಸಲು ಕೇಂದ್ರ ಪ್ರೌಢ ಶಿಕ್ಷಣ ಮಂಡಳಿ(ಸಿಬಿಎಸ್ಇ)ಗೆ ಹೇಳಲಾಗಿದೆ ಎಂದು ತಿಳಿಸಿದೆ.

ಹೆಚ್ಚುವರಿ ಸಾಲಿಸಿಟರ್ ಜನರಲ್ ಪಿಂಕಿ ಆನಂದ್, ನ್ಯಾಯಮೂರ್ತಿಗಳಾದ ಎ.ಎಂ.ಖಾನ್ವಿಲ್ಕರ್ ಮತ್ತು ಎಂ.ಎಂ.ಶಾಂತನಗೌಡರ್ ನ್ಯಾಯಪೀಠಕ್ಕೆ ಉತ್ತರಿಸಿ, ಶಾಲಾ ಬಸ್ಸುಗಳಲ್ಲಿ ಜ್ಯಾಮರ್ ಗಳನ್ನು ಸ್ಥಾಪಿಸಲು ಸಾಧ್ಯವಿಲ್ಲ ಎಂದು ಹೇಳಿದ್ದಾರೆ.

ಶಾಲೆಗಳಲ್ಲಿ ಜ್ಯಾಮರ್ ಗಳ ಸ್ಥಾಪನೆ ಸಾಧ್ಯವಿಲ್ಲ. ಅಶ್ಲೀಲ ಚಿತ್ರಗಳು ಮತ್ತು ವಿಷಯಗಳನ್ನು ತೋರಿಸುವ ವೆಬ್ ಸೈಟ್ ಗಳಿಗೆ ಕಡಿವಾಣ ಹಾಕಲು ಸಾಧ್ಯತೆಯನ್ನು ಪರಿಶೀಲಿಸುವಂತೆ ಸಿಬಿಎಸ್ ಇಯನ್ನು ಸರ್ಕಾರ ಕೋರಿದೆ. ಮಕ್ಕಳ ಪೊರ್ನೊಗ್ರಫಿಗೆ ಕಡಿವಾಣ ಹಾಕಲು ತೆಗೆದುಕೊಂಡಿರುವ ಕ್ರಮಗಳ ಕುರಿತು ಸ್ಥಿತಿ ವರದಿಯನ್ನು ಸಲ್ಲಿಸಲಾಗುವುದು ಎಂದು ಪಿಂಕಿ ಆನಂದ್ ನ್ಯಾಯಾಲಯಕ್ಕೆ ತಿಳಿಸಿದರು.

ಸ್ಥಿತಿ ವರದಿಯನ್ನು ಎರಡು ದಿನಗಳೊಳಗೆ ಸಲ್ಲಿಸುವಂತೆ ಇದೇ ಸಂದರ್ಭದಲ್ಲಿ ನ್ಯಾಯಾಲಯ ಸರ್ಕಾರಕ್ಕೆ ಹೇಳಿದೆ.