ನವದೆಹಲಿ: ವೈದ್ಯಕೀಯ ಕಾರಣಕ್ಕಾಗಿ ಪಾಕಿಸ್ತಾನ ಪ್ರಜೆಗಳಿಗೆ ಭಾರತ ನೀಡುತ್ತಿರುವ ವೀಸಾ ವ್ಯವಸ್ಥೆ ಮುಂದುವರೆದಿದ್ದು, ಇದೀಗ ಕೇಂದ್ರ ವಿದೇಶಾಂಗ ಸಚಿವೆ ಸುಷ್ಮಾ ಸ್ವರಾಜ್ ಅವರು ಮತ್ತೆ ಇಬ್ಬರು ಪಾಕ್ ಪ್ರಜೆಗಳಿಗೆ ವೈದ್ಯಕೀಯ ವೀಸಾ ಮಂಜೂರು ಮಾಡಿದ್ದಾರೆ.

ಈ ಸ್ವತಃ ಸುಷ್ಮಾ ಸ್ವರಾಜ್ ಅವರು ತಮ್ಮ ಟ್ವಿಟರ್ ಖಾತೆಯಲ್ಲಿ ಬರೆದುಕೊಂಡಿದ್ದು, ಪುಟ್ಟ ಮಗಳ ಹೃದಯ ಶಸ್ತ್ರಚಿಕಿತ್ಸೆಗಾಗಿ ಮನವಿ ಮಾಡಿದ್ದ ಪಾಕಿಸ್ತಾನದ ಮಹಿಳೆಯೊಬ್ಬರಿಗೆ ಸುಷ್ಮಾ ಸ್ವರಾಜ್ ನೆರವಾಗಿದ್ದಾರೆ. ಆ ಮೂಲಕ  ಸಾಮಾಜಿಕ ಜಾಲತಾಣಗಳ ಮೂಲಕ ತಮ್ಮಲ್ಲಿ ಸಹಾಯ ಯಾಚಿಸಿದ ಇಬ್ಬರು ಪಾಕಿಸ್ತಾನಿ ನಾಗರಿಕರಿಗೆ ಆಪತ್ಬಾಂಧವರಾಗಿದ್ದಾರೆ. ಪಾಕ್ ಪ್ರಜೆಗಳು ಮನವಿ ಮಾಡಿದ ಕೆಲವೇ ಗಂಟೆಗಳಲ್ಲಿ ಅದಕ್ಕೆ ಸ್ಪಂದಿಸಿರುವ ಸುಷ್ಮಾ ಸ್ವರಾಜ್  ಅವರು ವೈದ್ಯಕೀಯ ಕಾರಣಗಳಿಗಾಗಿ ವೀಸಾ ನೀಡುವುದಾಗಿ ಭರವಸೆ ನೀಡಿದ್ದಾರೆ.

‘‘ನಿಮ್ಮ ಮೂರು ವರ್ಷದ ಮಗಳ ತೆರೆದ ಹೃದಯ ಶಸ್ತ್ರಚಿಕಿತ್ಸೆಗಾಗಿ ವೀಸಾ ನೀಡುತ್ತೇವೆ. ಆಕೆ ಶೀಘ್ರ ಗುಣಮುಖಳಾಗಲಿ ಎಂದು ನಾವು ಪ್ರಾರ್ಥಿಸುತ್ತೇವೆ’’ ಎಂದು ಲಾಹೋರ್ ನಿವಾಸಿ ಉಜೈರ್ ಹುಮಾಯುನ್ ಅವರಿಗೆ ಸುಷ್ಮಾ  ಟ್ವೀಟ್ ಮಾಡಿದ್ದಾರೆ. ಹೃದ್ರೋಗಿಯಾಗಿರುವ ತನ್ನ ಪುತ್ರಿಯ ಚಿಕಿತ್ಸೆಗೆ ಭಾರತಕ್ಕೆ ಬರಲು ಹುಮಾಯುನ್ ಸಚಿವೆ ಸುಷ್ಮಾ ಸ್ವರಾಜ್ ಅವರ ನೆರವು ಕೋರಿದ್ದರು.

ಇದಾದ ಕೆಲವೇ ನಿಮಿಷಗಳಲ್ಲಿ ಸುಷ್ಮಾ ಅವರು ಪಾಕಿಸ್ತಾನಿ ಮಹಿಳೆ ನೂರ್ಮಾ ಹಬೀಬ್ ಗೆ ಆಕೆಯ ತಂದೆಯ ಲಿವರ್ ಕಸಿಗಾಗಿ ಭಾರತಕ್ಕೆ ಬರಲು ವೀಸಾ ನೀಡುವ ಭರವಸೆ ನೀಡಿದ್ದಾರೆ. ‘‘ನಿಮ್ಮ ತಂದೆಯ ಶಸ್ತ್ರಕ್ರಿಯೆ  ಯಶಸ್ವಿಯಾಗಿ ಅವರು ದೀರ್ಘಕಾಲ ಬಾಳಲಿ’’ ಎಂದು ನೂರ್ಮಾಗೆ ಮಾಡಿದ ಟ್ವೀಟ್ ನಲ್ಲಿ ಸಚಿವೆ ಹೇಳಿದ್ದಾರೆ.  ತಮ್ಮ ತಂದೆ ದೀರ್ಘಕಾಲದ ಲಿವರ್ ಸಂಬಂಧಿತ ಸಮಸ್ಯೆಯಿಂದ ಬಳಲುತ್ತಿದ್ದು, ಇದೀಗ ಅವರ ಸ್ಥಿತಿ  ಚಿಂತಾಜನಕವಾಗಿದೆ. ದಯಮಾಡಿ ನೆರವು ನೀಡಿ ಎಂದು ನೂರ್ಮಾ ಹಬೀಬ್ ಟ್ವೀಟ್ ಮಾಡಿದ್ದರು.