ಮುಂಬೈ: ಎನ್ ಡಿಎ ಮಿತ್ರ ಪಕ್ಷ ಶಿವಸೇನೆ ಬಿಜೆಪಿ ವಿರುದ್ಧ ಮತ್ತೊಮ್ಮೆ ಹರಿಹಾಯ್ದಿದ್ದು, ದೇಶದ ಆರ್ಥಿಕತೆ ಬಗ್ಗೆ ಯಶ್ವಂತ್ ಸಿನ್ಹಾ ಮಾಡಿರುವ ಆರೋಪವನ್ನು ತಪ್ಪು ಎಂದು ಸಾಬೀತುಪಡಿಸುವಂತೆ ಬಿಜೆಪಿಗೆ ಸವಾಲು ಹಾಕಿದೆ. 

ಮುಖವಾಣಿ ಸಾಮ್ನಾದಲ್ಲಿ ಲೇಖನ ಪ್ರಕಟಿಸಿರುವ ಶಿವಸೇನೆ ಮಾಜಿ ಪ್ರಧಾನಿ ಮನಮೋಹನ್ ಸಿಂಗ್, ಚಿದಂಬರಂ ನಂತಹ ಹಿರಿಯ ಆರ್ಥಿಕ ತಜ್ಞರು ನೋಟು ನಿಷೇಧದ ಬಗ್ಗೆ ನಕಾರಾತ್ಮಕ ಅಭಿಪ್ರಾಯ ವ್ಯಕ್ತಪಡಿಸಿದಾಗ ಅವರನ್ನು ನಿರ್ಲಕ್ಷಿಸಲಾಯಿತು. ಶಿವಸೇನೆ ಸೇರಿದಂತೆ ಹಲವು ಮಿತ್ರಪಕ್ಷಗಳು ನೋಟು ನಿಷೇಧವನ್ನು ಪ್ರಶ್ನಿಸಿದಾಗ ಅವರನ್ನು ದೇಶವಿರೋಧಿಗಳೆಂಬ ಹಣೆಪಟ್ಟಿ ಕಟ್ಟಲಾಯಿತು ಎಂದು ಶಿವಸೇನೆ ಆರೋಪಿಸಿದೆ.

ಬಿಜೆಪಿಯ ತಪ್ಪು ನಿರ್ಧಾರ, ಅಭಿಪ್ರಾಯಗಳನ್ನು ಈಗ ಅವರ ಪಕ್ಷದ ಹಿರಿಯರೇ ಆಗಿರುವ ಮಾಜಿ ಹಣಕಾಸು ಸಚಿವ ಯಶ್ವಂತ್ ಸಿನ್ಹಾ ಬಯಲು ಮಾಡಿದ್ದಾರೆ. ಈಗ ಬಿಜೆಪಿ ಯಶ್ವಂತ್ ಸಿನ್ಹಾ ಅವರ ಹೇಳಿಕೆಗಳನ್ನೂ ತಪ್ಪು ಎಂದು ಸಾಬೀತುಪಡಿಸಲಿ ಎಂದು ಶಿವಸೇನೆ ಸವಾಲು ಹಾಕಿದೆ.