ಬರ್ವಾನಿ(ಮಧ್ಯ ಪ್ರದೇಶ): ಮತ್ತೊಂದು ಜಾತಿಯ ವ್ಯಕ್ತಿಯನ್ನು ಮದುವೆಯಾದ 24 ವರ್ಷದ ಮಹಿಳೆಯನ್ನು ಹತ್ಯೆ ಮಾಡಿದ ಆರೋಪದ ಮೇಲೆ ಮಹಿಳೆ ತಂದೆಯನ್ನು ಬಂಧಿಸಿರುವುದಾಗಿ ಗುರುವಾರ ಪೊಲೀಸರು ತಿಳಿಸಿದ್ದಾರೆ.

ಅನ್ಯಜಾತಿಯ ಯುವಕನನ್ನು ಮದುವೆಯಾಗಿದ್ದರಿಂದ ಆಕ್ರೋಶಗೊಂಡ  ಪೋಷಕರ ಮಗಳನ್ನು ಹತ್ಯೆ ಮಾಡಿದ್ದು, ಈ ಪ್ರಕರಣ ಸಂಬಂಧ ತಂದೆಯನ್ನು ಬಂಧಿಸಲಾಗಿದೆ. ತಾಯಿ ಮತ್ತು ಮಹಿಳೆ ಸಹೋದರ ತಪ್ಪಿಸಿಕೊಂಡಿದ್ದಾರೆ ಎಂದು ಪೊಲೀಸರು ಹೇಳಿದ್ದಾರೆ.

ಹತ್ಯೆಯಾದ ಮಹಿಳೆ ಸರ್ಲಾ ಮಲಿ ಎಂದು ಗುರುತಿಸಲಾಗಿದ್ದು, ಒಂದು ವರ್ಷಗಳ ಹಿಂದೆ ಅನ್ಯಜಾತಿಯ ಪಂಕಜ್ ಮಲಿ ಎಂಬುವವರನ್ನು ಮದುವೆಯಾಗಿದ್ದಳು. ಅಂದಿನಿಂದ ಮಗಳ ಮೇಲೆ ಪೋಷಕರು ಸಿಟ್ಟಾಗಿದ್ದರು ಎಂದು ಖೆಟಿಯಾ ಪೊಲೀಸ್ ಠಾಣೆಯ ಸಬ್ ಇನ್ಸ್ ಪೆಕ್ಟರ್ ರಾಜೇಂದ್ರ ಇಂಗಳ್ ಅವರು ತಿಳಿಸಿದ್ದಾರೆ.

ನಿನ್ನೆ ತಾಯಿ ಅನಾರೋಗ್ಯಕ್ಕಿಡಾಗಿದ್ದಾಳೆ ಎಂದು ಹೇಳಿ ಸರ್ಲಾ ಸಹೋದರ ಆಕೆಯನ್ನು ಖೆಟಿಯಾ ಪಟ್ಟಣದಲ್ಲಿರುವ ತಮ್ಮ ಮನೆಗೆ ಕರೆ ತಂದಿದ್ದ, ಇಂದು ಬೆಳಗ್ಗೆ ಕುಟುಂಬ ಸದಸ್ಯರು ಕಬ್ಬು ಕತ್ತರಿಸುವ ಕತ್ತಿಯಿಂದ ಆಕೆಯನ್ನು ಕೊಲೆ ಮಾಡಿದ್ದಾರೆ ಎಂದು ಇಂಗಳ್ ಹೇಳಿದ್ದಾರೆ.

ಪ್ರಕರಣಕ್ಕೆ ಸಂಬಂಧಿಸಿದಂತೆ ಮಹಿಳೆ ತಂದೆ ದೇವಿದಾಸ್ ಕೊಲಿ(55)ಯನ್ನು ಬಂಧಿಸಲಾಗಿತ್ತು, ಆಕೆಯ ತಾಯಿ ತುಲಸಿಬಾಯಿ ಮತ್ತು ಸಹೋದರ ಹಿರಾಲಾಲ್ ನನ್ನು ಶೀಘ್ರ ಬಂಧಿಸುವುದಾಗಿ ಪೊಲೀಸರು ತಿಳಿಸಿದ್ದಾರೆ.