ಅಮೆರಿಕ ಪ್ರಸ್ತಾವನೆಗೆ ಪ್ರಾರಂಭದಲ್ಲಿ ಚೀನಾ, ಟರ್ಕಿ, ಸೌದಿ, ಗಲ್ಫ್ ದೇಶಗಳು ವಿರೋಧ ವ್ಯಕ್ತಪಡಿಸಿದ್ದವು. ಆದರೆ ಕೊನೆ ಕ್ಷಣದಲ್ಲಿ ತನ್ನ ಪರಮಾಪ್ತ ರಾಷ್ಟ್ರ ಪಾಕಿಸ್ತಾನಕ್ಕೆ ಚೀನಾ ಕೈಕೊಟ್ಟಿತ್ತು. ಚೀನಾ ಪಾಕಿಸ್ತಾನವನ್ನು ಬೆಂಬಲಿಸದೇ ಇರುವುದರ ಹಿಂದಿನ ಕಾರಣ ಈಗ ಬಹಿರಂಗಗೊಂಡಿದ್ದು, ಪಾಕಿಸ್ತಾನವನ್ನು ಬೆಂಬಲಿಸುವ ಮೂಲಕ ಚೀನಾ ಮುಖಭಂಗ ಎದುರಿಸಲು ಸಿದ್ಧವಿರಲಿಲ್ಲ ಎಂಬ ಅಂಶವನ್ನು ಪಾಕಿಸ್ತಾನದ ಪತ್ರಿಕೆಯೇ ವಿಶ್ಲೇಷಿಸಿದೆ. 

ಪ್ರಾರಂಭದಲ್ಲಿ ಪಾಕಿಸ್ತಾನ ಚೀನಾದ ಬೆಂಬಲ ಸಿಗುತ್ತದೆ ಎಂಬ ಭರವಸೆ ಹೊಂದಿತ್ತು. ಅಮೆರಿಕಾಗೆ ವಿರುದ್ಧ ನಿಲ್ಲಲು ಚೀನಾದ ಬೆಂಬಲ ಅತ್ಯಂತ ಸಹಕಾರಿಯಾಗಿತ್ತು, ಚೀನಾ ಬೆಂಬಲದ ವಿಶ್ವಾಸದಿಂದಲೇ ಪಾಕ್ ವಿದೇಶಾಂಗ ಸಚಿವರೂ ಸಹ ಟ್ವೀಟ್ ಮೂಲಕ ಮಿತ್ರ ರಾಷ್ಟ್ರಗಳಿಗೆ ಧನ್ಯವಾದ ತಿಳಿಸಿದ್ದರು. ಆದರೆ ನಿರ್ಣಾಯಕ ಘಟ್ಟದಲ್ಲಿ ಚೀನಾ ಪಾಕ್ ಗೆ ಕೈಕೊಟ್ಟಿದ್ದು, ಭಯೋತ್ಪಾದಕರಿಗೆ ಆರ್ಥಿಕ ನೆರವು ಕಲ್ಪಿಸುತ್ತಿರುವ ರಾಷ್ಟ್ರಗಳ ಪಟ್ಟಿಗೆ ಪಾಕ್ ಸೇರ್ಪಡೆಗೊಂಡಿದೆ.