ಲಂಡನ್: ಭಾರತದಂತೆಯೇ ಬ್ರಿಟನ್ ಸಹ ಬುಲೆಟ್ ರೈಲಿನ ಕನಸು ಹೊಂದಿದೆ. ಆದರೆ ಜನರಿಂದ ಮಾತ್ರ ಬುಲೆಟ್ ರೈಲಿಗೆ ವಿರೋಧ ವ್ಯಕ್ತವಾಗುತ್ತಿದೆ. 

ಜಪಾನ್ ಗೆ ಸ್ಪರ್ಧೆ ನೀಡುವ ನಿಟ್ಟಿನಲ್ಲಿ ಬ್ರಿಟನ್ ಬುಲೆಟ್ ರೈಲಿನ ಮೊದಲ ಹಂತವನ್ನು 2026 ರ ವೇಳೆಗೆ ಲೋಕಾರ್ಪಣೆಗೊಳಿಸಬೇಕೆಂಬ ಯೋಜನೆ ಹೊಂದಿದೆ. ಹೈಸ್ಪೀಡ್ 2 ನೆಟ್ವರ್ಕ್ ರೈಲಿಗೆ ಬ್ರಿಟನ್ ಹೆಚ್ಚಿನ ಪ್ರಾಶಸ್ತ್ಯ ನೀಡುತ್ತಿದ್ದು, ಮೊದಲ ಹಂತದಲ್ಲಿ ಲಂಡನ್ ನಿಂದ ಬರ್ಮಿಂಗ್ಹ್ಯಾಮ್  ಗೆ ಸಂಪರ್ಕ ಕಲ್ಪಿಸುವ ಉದ್ದೇಶ ಹೊಂದಿದೆ. ಇನ್ನು ಎರಡನೇ ಹಂತದ ಬುಲೆಟ್ ರೈಲು ಯೋಜನೆಯಡಿಯಲ್ಲಿ   ಮ್ಯಾಂಚೆಸ್ಟರ್ -ಷೆಫೀಲ್ಡ್ ನಡುವೆ ಸಂಪರ್ಕ ಕಲ್ಪಿಸುವ ಉದ್ದೇಶ ಹೊಂದಲಾಗಿದೆ. 

ಬುಲೆಟ್ ರೈಲಿನಿಂದ ಒಂದಷ್ಟು ಉದ್ಯೋಗ ಸೃಷ್ಟಿಯಾಗುತ್ತದೆ ಎಂದು ಹೇಳಲಾಗುತ್ತಿದೆಯಾದರೂ, ಸುಮಾರು 56 ಬಿಲಿಯನ್ ಪೌಂಡ್ಸ್ ಅಂದಾಜು ವೆಚ್ಚದಲ್ಲಿ ಯೋಜನೆ ನಿರ್ಮಾಣ ಮಾಡುವುದಕ್ಕೆ ಒಂದಷ್ಟು ಜನರು ವಿರೋಧ ವ್ಯಕ್ತಪಡಿಸುತ್ತಿದ್ದಾರೆ. 

ಬ್ರಿಟನ್ ನ ಹೆಚ್ಚಿನ ಜನತೆ ವಿಮಾನದ ಮೂಲಕ ಹೆಚ್ಚು ಪ್ರಯಾಣ ಮಾಡುತ್ತಿರುವಾಗ ಬ್ರಿಟನ್ ರೈಲಿನ ಅಗತ್ಯವೇನು ಎಂದು ಜನತೆ ಪ್ರಶ್ನಿಸುತ್ತಿದ್ದು, ಬುಲೆಟ್ ರೈಲಿನಿಂದ ಆಗುವ ಉಪಯೋಗಕ್ಕಿಂತ ಹೊರೆಯೇ ಜಾಸ್ತಿಯಾಗಿದ್ದು, "ಬಿಳಿ ಆನೆ" ಯೋಜನೆ ಎಂಬ ಅಭಿಪ್ರಾಯ ವ್ಯಕ್ತವಾಗುತ್ತಿರುವುದನ್ನು ಅಲ್ಲಿನ ಪತ್ರಿಕೆಗಳು ವರದಿ ಪ್ರಕಟಿಸಿವೆ.