ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿ ಅವರನ್ನು ಭೇಟಿ ಮಾಡಬೇಕೆ? ಮನ್ ಕೀ ಬಾತ್ ನ್ನು ಖುದ್ದಾಗಿ ಪ್ರಧಾನಿ ಬಳಿ ಕುಳಿತು ಕೇಳಬೇಕೆ? ಹಾಗಾದರೆ 5 ರೂಪಾಯಿ ಖರ್ಚು ಮಾಡಿ ಸಾಕು! ಹೌದು ಬಿಜೆಪಿ ಇಂತಹದ್ದೊಂದು ವಿಶೇಷ ಸೌಲಭ್ಯ ನೀಡುತ್ತಿದೆ. 

ಏನು ಕೇವಲ 5 ರೂಪಾಯಿಗಳಿಗೆ ಪ್ರಧಾನಿಯನ್ನು ಎಲ್ಲಾದರೂ ಭೇಟಿ ಮಾಡಲು ಸಾಧ್ಯವೇ ಎಂದು ಹುಬ್ಬೇರಿಸಬೇಡಿ, 5  ರೂಪಾಯಿಗಳಿಗೆ ಅದೃಷ್ಟವೂ ವರ್ಕ್ ಔಟ್ ಆದರೆ ಮಾತ್ರ ಪ್ರಧಾನಿಯನ್ನು ಭೇಟಿ ಮಾಡಬಹುದಾಗಿದೆ. ಬಿಜೆಪಿ 2019 ರ ಚುನಾವಣೆಗೂ ಮುನ್ನ ಪಕ್ಷದ ಖಜಾನೆ ತುಂಬಿಸುವುದಕ್ಕೆ ಪ್ರಧಾನಿ ನರೇಂದ್ರ ಮೋದಿ ಜನಪ್ರಿಯತೆಯನ್ನು ಬಳಕೆ ಮಾಡಿಕೊಳ್ಳಲು ಯತ್ನಿಸುತ್ತಿದೆ.  ಪಕ್ಷಕ್ಕೆ 5 ರೂಪಾಯಿಂದ ಮೊದಲುಗೊಂಡು 1,000 ರೂಪಾಯಿ ವರೆಗೆ ದೇಣಿಗೆ ನೀಡುವವರು ನರೇಂದ್ರ ಮೋದಿ ಆಪ್ ಮೂಲಕ ಪ್ರಧಾನಿ ಭೇಟಿಯ ಅದೃಷ್ಟ ಪರೀಕ್ಷೆ ಮಾಡಬಹುದಾಗಿದೆ. 

ದೇಣಿಗೆ ನೀಡುವವರಿಗೆ ರೆಫರಲ್ ಕೋಡ್ ನ್ನು ಕಳಿಸಲಾಗುತ್ತದೆ, ಆ ಕೋಡ್ ನ್ನು ಇತರರಿಗೆ ಎಸ್ಎಂಎಸ್ ಅಥವಾ ವಾಟ್ಸ್ ಆಪ್ ಮೂಲಕ ಕಳಿಸಬೇಕಾಗುತ್ತದೆ. ಹೀಗೆ ಕಳಿಸಿದ ರೆಫರಲ್ ಕೋಡ್ ನ್ನು 100 ಜನರು ಬಳಕೆ ಮಾಡಿ ಆ ನೂರು ಜನರು ದೇಣಿಗೆ ನೀಡಿದರೆ ಮೂಲತಃ ರೆಫರಲ್ ಕೋಡ್ ಕಳಿಸಿದ್ದ ವ್ಯಕ್ತಿ ಪ್ರಧಾನಿ ಮೋದಿ ಅವರನ್ನು ಭೇಟಿ ಮಾಡಬಹುದಾಗಿದೆ. 

ಅವಕಾಶ ವಂಚಿತರಿಗೆ ಟಿ-ಶರ್ಟ್, ಕಾಫಿ ಮಗ್ ಗಳನ್ನು ಉಡುಗೊರೆಯಾಗಿ  ನೀಡಲಾಗುತ್ತದೆ.