ನವದೆಹಲಿ: ಮಾರಣಾಂತಿಕ ಮೋಮೊ ಚಾಲೆಂಜ್ ಗೆ ಈಗಾಗಲೇ ಹಲವು ಜೀವಗಳು ಬಲಿಯಾಗಿದ್ದು, ಮಕ್ಕಳ ಆನ್ ಲೈನ್ ಚಟುವಟಿಕೆಗಳ ಮೇಲೆ ನಿಗಾ ಇರಿಸುವಂತೆ ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಇಲಾಖೆ ಪೋಷಕರಿಗೆ ಸಲಹೆ ನೀಡಿದೆ.
ಸಾಮಾಜಿಕ ಜಾಲತಾಣಗಳಲ್ಲಿ ಮೋಮೊ ಚಾಲೆಂಜ್ ವೈರಲ್ ಆಗುತ್ತಿದ್ದಂತೆಯೇ ಎಚ್ಚರಿಕೆ ವಹಿಸಿರುವ ಮಹಿಳಾ ಮತ್ತು ಮಕ್ಕಳ ಇಲಾಖೆ "ತಮ್ಮ ಮಕ್ಕಳು ಮೋಮೊ ಚಾಲೆಂಜ್ ನ್ನು ಸ್ವೀಕರಿಸದಂತೆ ಎಚ್ಚರ ವಹಿಸಿ" ಎಂದು ಪೋಷಕರಿಗೆ ಹೇಳಿದೆ.
ಮಕ್ಕಳಿಗೆ ಮೋಮೊ ಚಾಲೆಂಜ್ ಬಗ್ಗೆ ಈಗಾಗಲೇ ಏನು ತಿಳಿದಿಲ್ಲವಾದರೆ ಪೋಷಕರು ಸಹ ಮೋಮೊ ಚಾಲೆಂಜ್ ಕುರಿತಾಗಿ ಏನನ್ನೂ ಹೇಳಬಾರದು ಎಂದು ಇಲಾಖೆ ತಿಳಿಸಿದೆ. ಮೋಮೊ ಚಾಲೆಂಜ್ ಬಲೆಗೆ ಬಿದ್ದಿರುವ ಮಕ್ಕಳ ಲಕ್ಷಣಗಳ ಬಗ್ಗೆಯೂ ಮಾಹಿತಿ ನೀಡಿರುವ ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಇಲಾಖೆ, ಮೋಮೊ ಚಾಲೆಂಜ್ ಬಲೆಗೆ ಬಿದ್ದಿರುವ ಮಕ್ಕಳು ಸ್ನೇಹಿತರು ಹಾಗೂ ಪೋಷಕರಿಂದ ಅಂತರ ಕಾಯ್ದುಕೊಳ್ಳುತ್ತದೆ. ಚಾಲೆಂಜ್ ನ ಭಾಗವಾಗಿ ದೇಹದ ಮೇಲೆ ಯಾವುದಾದರೂ ಗಾಯಗಳಾಗಿರುತ್ತವೆ ಈ ಬಗ್ಗೆ ಪೋಷಕರು ಎಚ್ಚರ ವಹಿಸಬೇಕೆಂದು ಹೇಳಿದೆ.