ನವದೆಹಲಿ: ಕಣಿವೆ ರಾಜ್ಯ ಜಮ್ಮು ಮತ್ತು ಕಾಶ್ಮೀರದ ಉರಿ ಸೇನಾ ನೆಲೆ ಮೇಲೆ ಉಗ್ರರು ನಡೆಸಿದ ದಾಳಿಗೆ ಪ್ರತಿಯಾಗಿ ಭಾರತೀಯ ಸೇನೆ ಪಾಕ್ ಆಕ್ರಮಿತ ಕಾಶ್ಮೀರದೊಳಕ್ಕೆ ನುಗ್ಗಿ ಉಗ್ರ ಶಿಬಿರಗಳನ್ನು ಧ್ವಂಸ ಮಾಡಿದ್ದ ಸರ್ಜಿಕಲ್ ದಾಳಿಯ ಎರಡನೇ ವರ್ಷಾಚರಣೆಗೂ ಮುನ್ನವೇ ಕೇಂದ್ರ ಸರ್ಕಾರ ರೋಚಕ ಸಾಹಸದ ಮತ್ತೆರಡು ವಿಡಿಯೋಗಳನ್ನು ಬಿಡುಗಡೆ ಮಾಡಿದೆ.
ಭಾರತೀಯ ಯೋಧರ ಸರ್ಜಿಕಲ್ ದಾಳಿಯನ್ನೇ ಅನುಮಾನಿಸಿಕೊಂಡು ಬಂದಿದ್ದ ರಾಜಕೀಯ ಪಕ್ಷಗಳಿಗೆ ಕೇಂದ್ರ ಸರ್ಕಾರ ಮತ್ತೊಮ್ಮೆ ಉತ್ತರ ಕೊಟ್ಟಿದೆ. ಭಾರತೀಯ ಯೋಧರು ಥರ್ಮಲ್ ಇಮೇಜಿಂಗ್ ಮತ್ತು ಡ್ರೋನ್ ಗಳಿಗೆ ಅಳವಡಿಸಿದ್ದ ಕ್ಯಾಮೆರಾಗಳಲ್ಲಿ ಸೆರೆಹಿಡಿದ ದೃಶ್ಯಾವಳಿಗಳು ಇದರಲ್ಲಿವೆ.
ಭಾರತೀಯ ಸೇನೆಯ ಕಮಾಂಡೋಗಳು ಕಗ್ಗತ್ತಲ ರಾತ್ರಿಯಲ್ಲಿ ದುರ್ಗಮ ಹಾದಿಯಲ್ಲಿ ಸಾಗಿ ಜೀವ ಪಣಕ್ಕಿಟ್ಟು 2016ರ ಸೆಪ್ಟೆಂಬರ್ 28-29ರಂದು ವೀರಾವೇಷದ ಕಾರ್ಯಾಚರಣೆ ಕೈಗೊಂಡು 38 ಉಗ್ರರನ್ನು ಹತ್ಯೆ ಮಾಡಿ ಟೆರರ್ ಕ್ಯಾಂಪ್ ಗಳನ್ನು ಧ್ವಂಸಗೊಳಿಸಿದ ಸಾಹಸ ವಿಡಿಯೋದಲ್ಲಿವೆ.