ನವದೆಹಲಿ: ಅಗಸ್ಟಾ ಹಗರಣದ ಮಧ್ಯವರ್ಥಿ ಕ್ರಿಶ್ಚಿಯನ್ ಮೈಕೆಲ್ ಇಡಿ ವಿಚಾರಣೆ ವೇಳೆ ಎಐಸಿಸಿ ಮಾಜಿ ಅಧ್ಯಕ್ಷೆ ಸೋನಿಯಾ ಗಾಂಧಿ ಅವರ ಹೆಸರು ಉಲ್ಲೇಖಿಸಿದ್ದು ಬಿಜೆಪಿಯ ಸಂಸದ ಅನುರಾಗ್ ಠಾಕೂರ್ ಜಗತ್ತಿಗೆ ಆಕೆ ಇನ್ನೂ ಇಟಾಲಿಯ ಮಹಿಳೆಯಾಗಿದ್ದಾರೆ ಎಂದು ಹೇಳಿದ್ದಾರೆ.
ಭಾರತದ ಸಂಸತ್ ಸದಸ್ಯರಾಗಿ ಆಯ್ಕೆಯಾಗಿದ್ದರೂ ಆಕೆ ಜಗತ್ತಿಗೆ ಇನ್ನೂ ಇಟಾಲಿಯ ಮಹಿಳೆಯಾಗಿದ್ದಾರೆ. ಕ್ರಿಶ್ಚಿಯನ್ ಮೈಕೆಲ್ ಹೇಳುತ್ತಾರೋ ಇಲ್ಲವೊ ಅದು ವಿಷಯವಲ್ಲ. ಆದರೆ ಅವರಿಗೆ ಇಟಾಲಿ ಮಹಿಳೆಯಾರು, ಆ ಇಟಾಲಿ ಮಹಿಳೆಯ ಪುತ್ರ ಯಾರು? ಶ್ರೀಮಂತಿ ಗಾಂಧಿ ಯಾರು? ಎಂಬುದು ತಿಳಿದಿದೆ. ಭಾರತ ಹಲವು ಬಾರಿ ಆಕೆಯನ್ನು ಸಂಸದೆಯನ್ನಾಗಿ ಆಯ್ಕೆ ಮಾಡಿದ್ದರೂ ಆಕೆ ಮಾತ್ರ ಜಗತ್ತಿನ ಕಣ್ಣಿಗೆ ಇಟಾಲಿಯ ಮಹಿಳೆ ಎಂದು ಅನುರಾಗ್ ಠಾಕೂರ್ ಹೇಳಿದ್ದಾರೆ.
ಶ್ರೀಮಂತಿ ಗಾಂಧಿ ಕುರಿತಾದ ಪ್ರಶ್ನೆಗಳನ್ನು ಹೇಗೆ ನಿರ್ವಹಿಸಬೇಕೆಂಬ ಬಗ್ಗೆ ಚೀಟಿ ಬರೆದು ಅಡ್ವೊಕೇಟ್ ಗಳ ಬಳಿ ಕೇಳುತ್ತಾ ವಕೀಲರ ಭೇಟಿ ಅವಕಾಶವನ್ನು ದುರ್ಬಳಕೆ ಮಾಡಿಕೊಳ್ಳುತ್ತಿದ್ದ ಹಿನ್ನೆಲೆಯಲ್ಲಿ ದೆಹಲಿ ಕೋರ್ಟ್ ಕ್ರಿಶ್ಚಿಯನ್ ಮೈಕೆಲ್ ತನ್ನ ವಕೀಲರನ್ನು ಭೇಟಿ ಮಾಡುವುದಕ್ಕೆ ನಿರ್ಬಂಧ ವಿಧಿಸಿತ್ತು.