ನವದೆಹಲಿ: ಅಕ್ರಮ ಮರಳು ಮತ್ತು ಗಣಿಗಾರಿಕೆ ಹಗರಣದಲ್ಲಿ ಉತ್ತರ ಪ್ರದೇಶ ಮಾಜಿ ಮುಖ್ಯಮಂತ್ರಿ ಅಖಿಲೇಶ್ ಯಾದವ್ ಅವರ ಪಾತ್ರದ ಕುರಿತು ತನಿಖೆ ನಡೆಸುತ್ತಿರುವ ಸಿಬಿಐ ಅಧಿಕಾರಿ ಡಿಐಜಿ ಗಗನ್ ದೀಪ್ ಗಂಭೀರ್ ಅವರನ್ನು ವರ್ಗಾವಣೆ ಮಾಡಲಾಗಿದೆ ಎಂದು ಮೂಲಗಳು ತಿಳಿಸಿವೆ.

ಅಕ್ರಮ ಮರಳು ಮತ್ತು ಗಣಿಗಾರಿಕೆ ಹಗರಣದಲ್ಲಿ ಅಖಿಲೇಶ್ ಯಾದವ್ ಮತ್ತು ಇತರ ಅಧಿಕಾರಿಗಳ ಪಾತ್ರದ ಕುರಿತು ತನಿಖೆ ನಡೆಸುತ್ತಿರುವ ಸಿಬಿಐ ಅಧಿಕಾರಿ ಗಂಭೀರ್ ಅವರನ್ನು ವಿಶೇಷ ಅಪರಾಧ ಘಟಕದಿಂದ ಭ್ರಷ್ಟಾಚಾರ ವಿರೋಧಿ ಘಟಕಕ್ಕೆ ವರ್ಗಾಯಿಸಲಾಗಿದೆ ಎಂದು ತಿಳಿದುಬಂದಿದೆ.

ಸಿಬಿಐಯ ಉಪ ನಿರ್ದೇಶಕರಾಗಿದ್ದ ಅನೀಶ್ ಪ್ರಸಾದ್ ಇನ್ನು ಮುಂದೆ ಅಕ್ರಮ ಗಣಿಗಾರಿಕೆ ಕೇಸಿನ ವಿಚಾರಣೆ ನಡೆಸಲಿದ್ದಾರೆ. ಗಗನ್ ದೀಪ್ ಗಂಭೀರ್ ಅವರು ವರ್ಗಾವಣೆಯಾಗಿರುವ ಭ್ರಷ್ಟಾಚಾರ ನಿಗ್ರಹ ಘಟಕ ಬಿಹಾರದ ಸೃಜನ್ ಹಗರಣ ಮತ್ತು ಪತ್ರಕರ್ತ ಉಪೇಂದ್ರ ರೈಯವರ ಕೇಸಿನ ವಿಚಾರಣೆ ನಡೆಸುತ್ತಿದ್ದಾರೆ.

ಹಮಿರ್ ಪುರದ ಅಕ್ರಮ ಗಣಿಗಾರಿಕೆಗೆ ಸಂಬಂಧಪಟ್ಟಂತೆ ನಿನ್ನೆ ಉತ್ತರ ಪ್ರದೇಶ ಮತ್ತು ದೆಹಲಿಯ 12 ಕಡೆಗಳಲ್ಲಿ ಸಿಬಿಐ ಶೋಧಕಾರ್ಯ ನಡೆಸಿದೆ.