ನವದೆಹಲಿ: 2014-19 ನೇ ಅವಧಿಯಲ್ಲಿ 326 ಮಂದಿ ವಿರುದ್ಧ ದೇಶದ್ರೋಹ ಪ್ರಕರಣ ದಾಖಲಿಸಲಾಗಿದೆ ಎಂದು ಕೇಂದ್ರ ಗೃಹ ಸಚಿವಾಲಯ ಮಾಹಿತಿ ನೀಡಿದೆ. 

2019 ರಲ್ಲಿ ಅತಿ ಹೆಚ್ಚು ಅಂದರೆ 93 ಪ್ರಕರಣಗಳು ದಾಖಲಾಗಿದ್ದು, 2018 ರಲ್ಲಿ 70 ಪ್ರಕರಣಗಳು 2017 ರಲ್ಲಿ 51, 2014 ರಲ್ಲಿ 47 ಪ್ರಕರಣಗಳು, 2016 ರಲ್ಲಿ 35 ಪ್ರಕರಣ, 2015 ರಲ್ಲಿ 30 ದೇಶದ್ರೋಹದ ಪ್ರಕರಣಗಳು ದಾಖಲಾಗಿದೆ ಎಂದು ಗೃಹ ಸಚಿವಾಲಯ ಮಾಹಿತಿ ನೀಡಿದೆ. 

2014-19 ರ ಅವಧಿಯಲ್ಲಿ 326 ಪ್ರಕರಣಗಳು ದಾಖಲಾಗಿತ್ತಾದರೂ ಈ ಪೈಕಿ ಶಿಕ್ಷೆಯಾಗಿದ್ದು ಮಾತ್ರ 6 ಮಂದಿಗೆ ಎಂಬುದು ಗಮನಾರ್ಹ ವಿಷಯ. ಕಳೆದ ವಾರ ದೇಶದ್ರೋಹದ ಕಾನೂನಿನ ಬಗ್ಗೆ ಪ್ರಶ್ನಿಸಿದ್ದ ಸುಪ್ರೀಂ ಕೋರ್ಟ್, ಸ್ವಾತಂತ್ರ್ಯ ಬಂದು 75 ವರ್ಷಗಳೇ ಕಳೆದರೂ ವಸಾಹತುಶಾಹಿಯ ದೇಶದ್ರೋಹದ ಕಾನೂನು ಏಕೆ ಇನ್ನೂ ಅಸ್ತಿತ್ವದಲ್ಲಿದೆ ಎಂದು ಕೋರ್ಟ್ ಪ್ರಶ್ನಿಸಿತ್ತು.  

ಅಷ್ಟೇ ಅಲ್ಲದೇ ಹಳೆಯ ಕಾನೂನುಗಳನ್ನು ರದ್ದುಗೊಳಿಸುತ್ತಿರುವ ಕೇಂದ್ರ ಸರ್ಕಾರ ಈ ಕಾನೂನನ್ನು ಏಕೆ ರದ್ದುಗೊಳಿಸಲು ಮುಂದಾಗುತ್ತಿಲ್ಲ ಎಂದು ಪ್ರಶ್ನಿಸಿತ್ತು. ಕೇಂದ್ರ ಗೃಹಸಚಿವಾಲಯ ಬಿಡುಗಡೆ ಮಾಡಿರುವ ಅಂಕಿ-ಅಂಶಗಳ ಪ್ರಕಾರ ಅಸ್ಸಾಂ ನಲ್ಲಿ ಅತಿ ಹೆಚ್ಚು ಅಂದರೆ 54 ದೇಶದ್ರೋಹದ ಪ್ರಕರಣಗಳನ್ನು ದಾಖಲಿಸಲಾಗಿದೆ.

ಒಟ್ಟು ದಾಖಲಾದ ಪ್ರಕರಣಗಳಲ್ಲಿ 141 ರಲ್ಲಿ ಮಾತ್ರ ಆರೋಪಪಟ್ಟಿ ಸಲ್ಲಿಸಲಾಗಿದ್ದು, 6 ಮಂದಿಗೆ ತಲಾ 6 ವರ್ಷಗಳಂತೆ ಶಿಕ್ಷೆಯನ್ನು ವಿಧಿಸಲಾಗಿದೆ. 2020 ರ ಅಂಕಿ-ಅಂಶಗಳನ್ನು ಇನ್ನಷ್ಟೇ ಗೃಹ ಸಚಿವಾಲಯ ಬಿಡುಗಡೆ ಮಾಡಬೇಕಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.