ಮಜುಲಿ: ಅಸ್ಸಾಂನ ಮಜುಲಿ ಬಳಿ ಬುಧವಾರ ಭಯಾನಕ ಘಟನೆಯೊಂದು ನಡೆದಿದೆ. 100 ಪ್ರಯಾಣಿಕರಿದ್ದ ಎರಡು ಬೋಟ್ ಗಳು ಬ್ರಹ್ಮಾಪುತ್ರ ನದಿಯಲ್ಲಿ ಪರಸ್ಪರ ಡಿಕ್ಕಿಯಾಗಿ ಅನೇಕ ಮಂದಿ ನಾಪತ್ತೆಯಾಗಿದ್ದಾರೆ. ಮುಳುಗುತ್ತಿರುವ ಬೋಟ್ ನಿಂದ ಪ್ರಯಾಣಿಕರು ಪ್ರಾಣ ಭಯದಿಂದ ನದಿಗೆ ಹಾರುತ್ತಿರುವ ದೃಶ್ಯ ವಿಡಿಯೋದಲ್ಲಿದೆ.
ದೋಣಿಯ ಮೇಲಿದ್ದ ಕೆಲ ಪ್ರಯಾಣಿಕರು ಅತ್ತಿಂದತ್ತಾ ಕಿರುಚಾಡುತ್ತಾ, ಓಡಾಡುತ್ತಾ, ಅಲ್ಲಿಂದ ತೆರಳಲು ಪ್ರಯತ್ನಿಸುತ್ತಿದ್ದರೆ, ಮತ್ತೆ ಕೆಲವರು ಒಂದು ಕಡೆಗೆ ಓರೆಯಾದ ಬೋಟ್ ಮೇಲಿನಿಂದ ನದಿಗೆ ಹಾರಿ ಮತ್ತೊಂದು ದೋಣಿಯತ್ತ ಬರುವ ದೃಶ್ಯವಿದೆ. ಮಹಿಳೆಯರು ಕೂಡಾ ಪ್ರಾಣ ಭಯದಿಂದ ನೀರಿಗೆ ಹಾರಿದ್ದಾರೆ.
ಅಸ್ಸಾಂ ವಿಪತ್ತು ನಿರ್ವಹಣಾ ಪ್ರಾಧಿಕಾರದ ಪ್ರಕಾರ, ಈ ದುರಂತದಿಂದ 82 ಜನರನ್ನು ರಕ್ಷಿಸುವಲ್ಲಿ ಯಶಸ್ವಿಯಾಗಿದ್ದು, ಒಬ್ಬರು ಮೃತಪಟ್ಟಿದ್ದಾರೆ. ಈಗಲೂ ಕೂಡಾ ಭಾರತೀಯ ಸೈನಿಕರು ಹಾಗೂ ವಾಯುಪಡೆ ರಕ್ಷಣಾ ಕಾರ್ಯಾಚರಣೆಯಲ್ಲಿ ಕೈ ಜೋಡಿಸಿದ್ದು, ನಾಪತ್ತೆಯಾದವರ ಹುಡುಕಾಟ ನಡೆಸಲಾಗುತ್ತಿದೆ.