ಮುಂಬೈ: ಮಧುರೈನಿಂದ ಮುಂಬೈಗೆ ತೆರಳುತ್ತಿದ್ದ ಇಂಡಿಗೋ ವಿಮಾನದಲ್ಲಿ ಮಂಗಳವಾರ ಲ್ಯಾಂಡಿಂಗ್ಗೂ ಮುನ್ನ ತಾಂತ್ರಿಕ ದೋಷ ಕಾಣಿಸಿಕೊಂಡಿದ್ದು, ಒಂದು ಎಂಜಿನ್ ಆಫ್ ಆಗಿದೆ. ಆದರೂ ಪೈಲಟ್ ವಿಮಾನವನ್ನು ಮುಂಬೈನಲ್ಲಿ ಸುರಕ್ಷಿತವಾಗಿ ಲ್ಯಾಂಡ್ ಮಾಡಿದ್ದಾರೆ.
ಪೈಲಟ್ ವಿಮಾನವನ್ನು ಮುಂಬೈನಲ್ಲಿ ಆದ್ಯತೆ ಮೇಲೆ ಲ್ಯಾಂಡಿಂಗ್ ಮಾಡಿದ್ದು, ವಿಮಾನವು ಸುರಕ್ಷಿತವಾಗಿ ತನ್ನ ಗಮ್ಯಸ್ಥಾನವನ್ನು ತಲುಪಿದೆ ಎಂದು ಇಂಡಿಗೋ ವಿಮಾನಯಾನ ಸಂಸ್ಥೆ ಪ್ರಕಟಣೆಯಲ್ಲಿ ತಿಳಿಸಿದೆ.
ಅವಳಿ-ಎಂಜಿನ್ ನ ಏರ್ಬಸ್ A321 (VT-IUJ)ದಲ್ಲಿ ತಾಂತ್ರಿಕ ದೋಷ ಕಾಣಿಸಿಕೊಂಡಿದ್ದು, ಪೈಲಟ್ ಒಂದು ಎಂಜಿನ್ ಅನ್ನು ಆಫ್ ಮಾಡಿದ್ದಾರೆ. ಅದರ ಇನ್ನೊಂದು ಎಂಜಿನ್ ನ ಕಾರ್ಯಾಚರಣೆಯೊಂದಿಗೆ ಸುರಕ್ಷಿತವಾಗಿ ಲ್ಯಾಂಡ್ ಮಾಡಲಾಗಿದೆ.
ಇಲ್ಲಿಯವರೆಗೆ ಲಭ್ಯವಿರುವ ಮಾಹಿತಿ ಪ್ರಕಾರ, ವಿಮಾನವು ಪ್ರಸ್ತುತ ಮುಂಬೈನಲ್ಲಿದ್ದು, ಅಗತ್ಯ ನಿರ್ವಹಣೆಯ ನಂತರ ಮತ್ತೆ ಕಾರ್ಯಾಚರಣೆಗೆ ಬರಲಿದೆ.