ನವದೆಹಲಿ: ಮ್ಯಾನ್ಮಾರ್ ನಲ್ಲಿ ಭಾರತೀಯ ಯುವಕರಿಗೆ ಚಿತ್ರಹಿಂಸೆ ನೀಡಲಾಗುತ್ತಿರುವ ಅಂಶ ಈಗ ಬೆಳಕಿಗೆ ಬಂದಿದೆ. 8 ತಿಂಗಳ ಹಿಂದೆ 22 ವರ್ಷದ, ಲಖನೌ ಮೂಲದ ಅಜಯ್ ಗೆ ಮಲೇಷ್ಯಾದಲ್ಲಿ ಕಾಲ್ ಸೆಂಟರ್ ಉದ್ಯೋಗದ ಆಫರ್ ಬಂದಿತ್ತು. ಆದರೆ ಅದನ್ನು ನಂಬಿ ಹೊರಟವನು ತಲುಪಿದ್ದು ಮ್ಯಾನ್ಮಾರ್ ಗೆ ಹಾಗೂ ಎದುರಿಸಿದ್ದು, ಸೈಬರ್ ಫ್ರಾಡ್ ಕೇಂದ್ರದ ಚಿತ್ರ ಹಿಂಸೆ.

ಆತನ ಇಬ್ಬರು ಸ್ನೇಹಿತರು ಭಾರತಕ್ಕೆ ಆಗಮಿಸಿದ್ದು, ಆತ ಮಾತ್ರ ಮ್ಯಾನ್ಮಾರ್ ನಲ್ಲೇ ಸಿಲುಕಿಕೊಂಡಿದ್ದು, ಚಿತ್ರಹಿಂಸೆ ಎದುರಿಸುತ್ತಿದ್ದಾರೆ. ಕಾಲ್ ಸೆಂಟರ್ ಅನ್ನು ಮೇಘಲಾಹ್ಪೋದಲ್ಲಿ ಜೆಪಾರ್ಕ್ ಎಂದು ಕರೆಯಲಾಗುತ್ತದೆ ಮತ್ತು ಥೈಲ್ಯಾಂಡ್ ಗಡಿಗೆ (ಸುಮಾರು 2 ಕಿಮೀ) ಹತ್ತಿರದಲ್ಲಿದೆ ಎಂದು ಹೇಳಲಾಗುತ್ತದೆ.

"ಆ ಕೇಂದ್ರದಲ್ಲಿ ಪ್ರಸ್ತುತ 6 ಭಾರತೀಯ ಹುಡುಗರಿದ್ದಾರೆ, ಆದರೆ ಡಾಂಗ್ಮೇ ಎಂಬ ಮತ್ತೊಂದು ಕೇಂದ್ರಕ್ಕೆ ಸ್ಥಳಾಂತರಿಸಲ್ಪಟ್ಟ ನಮ್ಮಲ್ಲಿ 72 ಮಂದಿ ಭಾರತಕ್ಕೆ ಮರಳುವಲ್ಲಿ ಯಶಸ್ವಿಯಾಗಿದ್ದೇವೆ. ಅಜಯ್ ಅವರನ್ನು ಚಿತ್ರಹಿಂಸೆ ಮತ್ತು ಕತ್ತಲೆಯ ಕೋಣೆಯಲ್ಲಿ ದಿನಗಟ್ಟಲೆ ಇರಿಸಿರುವ ಬಗ್ಗೆ ನಾನು ಕೇಳಿದ್ದೇನೆ. ಕೊನೆಗೆ ವಿದ್ಯುತ್ ಶಾಕ್ ನೀಡಲಾಯಿತು ಮತ್ತು ಆಹಾರವಿಲ್ಲದೆ ಇದ್ದರು, ನಾವು ಒಟ್ಟಿಗೆ ಹೋದಂತೆಯೇ ಅವನು ಸುರಕ್ಷಿತವಾಗಿ ಮನೆಗೆ ಮರಳಬೇಕೆಂದು ನಾನು ಬಯಸುತ್ತೇನೆ”ಎಂದು ಸೆಪ್ಟೆಂಬರ್‌ನಲ್ಲಿ ಹಿಂತಿರುಗುವಲ್ಲಿ ಯಶಸ್ವಿಯಾದ 25 ವರ್ಷದ ರಾಹುಲ್ ತಾವು ಎದುರಿಸಿದ ಹಿಂಸೆಯನ್ನು ನೆನಪಿಸಿಕೊಂಡಿದ್ದಾರೆ.

ರಾಹುಲ್ ವಾಪಸಾದಾಗ ಡೆಂಗ್ಯೂ ಜ್ವರದಿಂದ ಬಳಲಿ ಚಿಕಿತ್ಸೆ ಪಡೆದು ಬದುಕುಳಿದಿದ್ದರು. TNIE ಈ ವರ್ಷ ಜುಲೈ 14 ರಂದು ಈ ಮೂವರು ಹುಡುಗರ ಬಗ್ಗೆ ವರದಿ ಪ್ರಕಟಿಸಿತ್ತು.

ಅಜಯ್ ಕುಟುಂಬವು ಬಡತನ ಎದುರಿಸುತ್ತಿದ್ದು, ಅವರ ಬಿಡುಗಡೆಗೆ ಬೇಡಿಕೆಯಿರುವ ಹಣವನ್ನು ಪಾವತಿಸಲು ಸಾಧ್ಯವಿಲ್ಲ. ಅದೇ ಸಮಯದಲ್ಲಿ ಅವರು ಅವರ ಆರೋಗ್ಯ ಮತ್ತು ಸುರಕ್ಷತೆಯ ಬಗ್ಗೆ ಚಿಂತಿತರಾಗಿದ್ದಾರೆ.

"ಅಜಯ್ ನ್ನು ನಿರ್ದಯವಾಗಿ ಥಳಿಸಲಾಯಿತು, ಕತ್ತಲೆಯ ಕೋಣೆಯಲ್ಲಿ ಇರಿಸಲಾಯಿತು ಮತ್ತು ವಿದ್ಯುತ್ ಶಾಕ್ ನೀಡಲಾಯಿತು. ಅವರು ಹೇಗೆ ಸಿಕ್ಕಿಬಿದ್ದಿದ್ದಾರೆ ಎಂದು ನಮಗೆ ತಿಳಿದಾಗಿನಿಂದ ನಾವು ನಿರಂತರವಾಗಿ ಸಂಬಂಧಿಸಿದ ಎಲ್ಲಾ ಅಧಿಕಾರಿಗಳಿಗೆ ಪತ್ರ ಬರೆದಿದ್ದೇವೆ. ಆದರೆ ಅದು ಇಲ್ಲಿಯವರೆಗೆ ವ್ಯರ್ಥವಾಗಿದೆ, ಅವರ ವೃದ್ಧ ಪೋಷಕರು ಕಾಯುತ್ತಿದ್ದಾರೆ ಎಂದು ಅಜಯ್ ಅವರ ಸೋದರ ಮಾವ ರಾಮ್ ಜನಮ್ ಈ ಪತ್ರಿಕೆಗೆ ತಿಳಿಸಿದ್ದಾರೆ.

ಈ ಕಾಲ್ ಸೆಂಟರ್‌ಗಳಿಂದ ಹಿಂದಿರುಗಿದ ಹುಡುಗರ ಪ್ರಕಾರ, ಈ ಕಾಲ್ ಸೆಂಟರ್ ಗಳನ್ನು ಚೀನಿಯರು ಅಕ್ರಮವಾಗಿ ನಡೆಸುತ್ತಿದ್ದಾರೆ ಆದರೆ ಸ್ಥಳೀಯ ಮ್ಯಾನ್ಮಾರ್ ಜನರು ಹುಡುಗರು ತಪ್ಪಿಸಿಕೊಳ್ಳದಂತೆ ನೋಡಿಕೊಳ್ಳಲು ಅವರಿಗೆ ಸಹಾಯ ಮಾಡುತ್ತಾರೆ. ವಿವಿಧ ರಾಷ್ಟ್ರಗಳ ಹುಡುಗರು ಮತ್ತು ಹುಡುಗಿಯರು ಸಹ ಇಂತಹ ಕಾಲ್ ಸೆಂಟರ್‌ಗಳಲ್ಲಿ ಕೆಲಸ ಮಾಡುತ್ತಿದ್ದಾರೆ.

ಸಿಕ್ಕಿಬಿದ್ದವರನ್ನು ಸುರಕ್ಷಿತವಾಗಿ ಹಿಂದಿರುಗಿಸಲು ಭಾರತೀಯ ಅಧಿಕಾರಿಗಳು ನಿರಂತರವಾಗಿ ಪ್ರಯತ್ನಿಸುತ್ತಿದ್ದಾರೆ. ಸೈಬರ್ ಕೇಂದ್ರಗಳಿಗೆ ಪ್ರವೇಶವು ಕೆಲವೊಮ್ಮೆ ಅಡಚಣೆಯಾಗುತ್ತದೆ, ಆದರೆ ಕೊನೆಯ ಭಾರತೀಯನು ತನ್ನ ತಾಯ್ನಾಡಿಗೆ ಹಿಂದಿರುಗುವವರೆಗೂ ಅವರು ಪಟ್ಟುಬಿಡದೆ ಕೆಲಸ ಮಾಡುತ್ತಾರೆ ಎಂದು ಅಧಿಕಾರಿಗಳು ಹೇಳಿದ್ದಾರೆ.