ನವದೆಹಲಿ: ಜೂನ್ 12, 2025 ರಂದು ಅಹಮದಾಬಾದ್‌ನಲ್ಲಿ 241 ಜೀವಗಳನ್ನು ಬಲಿ ಪಡೆದ ಏರ್ ಇಂಡಿಯಾ ವಿಮಾನ AI-171 ರ ದುರಂತ ಅಪಘಾತದ ನಂತರ, ವಿಮಾನಗಳ 11A ಸೀಟ್ ಗೆ ಬೇಡಿಕೆ ಹೆಚ್ಚಾಗಿದ್ದು, ಯಾವ ಮಟ್ಟಿಗೆ ಎಂದರೆ ಪ್ರಯಾಣಿಕರು ಬ್ಲಾಕ್ ನಲ್ಲಿ 11ಎ ಸೀಟ್ ಖರೀದಿಗೆ ಮುಂದಾಗುತ್ತಿದ್ದಾರೆ ಎನ್ನಲಾಗಿದೆ.

ಹೌದು.. ವಿಮಾನಗಳಲ್ಲಿನ 11 ಸೀಟ್ ನ ಸುರಕ್ಷತೆ ಕುರಿತು ಮಾಧ್ಯಮಗಳಲ್ಲಿ ವರದಿ ಪ್ರಸಾರವಾಗುತ್ತಲೇ ವಿಮಾನದ 11ಎ ಸೀಟ್ ಗೆ ಬೇಡಿಕೆ ಹೆಚ್ಚಾಗಿದೆ. ಇತ್ತೀಚೆಗೆ ಅಹಮದಾಬಾದ್‌ನಲ್ಲಿ 241 ಜೀವಗಳನ್ನು ಬಲಿ ಪಡೆದ ಏರ್ ಇಂಡಿಯಾ ವಿಮಾನ AI-171 ರ ದುರಂತದಲ್ಲಿ ಬದುಕುಳಿದ ಏಕೈಕ ಪ್ರಯಾಣಿಕ ವಿಶ್ವಶ್‌ಕುಮಾರ್ ರಮೇಶ್ ಕೂಡ ಇದೇ 11 ಎ ಸೀಟ್ ನಲ್ಲಿ ಕುಳಿತಿದ್ದರು.

ಈ ವಿಚಾರವೂ ಕೂಡ 11ಎ ಸೀಟ್ ಗೆ ಬೇಡಿಕೆ ಹೆಚ್ಚಾಗುವಂತೆ ಮಾಡಿದ್ದು, 11ಎ ಸೀಟ್ ನ ದರ ಕೂಡ ಸಾಮಾನ್ಯ ಸೀಟ್ ಗಳಿಗಿಂತ ದುಬಾರಿಯಾಗುವಂತೆ ಮಾಡಿದೆ. ಕೆಲವು ಪ್ರಯಾಣಿಕರು 11ಎ ಸೀಟ್ ಗಾಗಿ ಹೆಚ್ಚುವರಿ ಹಣವನ್ನು ಪಾವತಿಸಲು ಸಹ ಸಿದ್ಧರಿದ್ದಾರೆ ಎಂದು ಭಾರತೀಯ ಟ್ರಾವೆಲ್ ಏಜೆಂಟ್‌ಗಳು ವರದಿ ಮಾಡಿದ್ದಾರೆ.

ಪ್ರಯಾಣಿಕರು ಈಗ ವಿಮಾನಗಳಲ್ಲಿ ತುರ್ತು ನಿರ್ಗಮನದ ಸೀಟುಗಳನ್ನು ವಿಶೇಷವಾಗಿ 11A ಹುಡುಕುತ್ತಿರುವುದು ಉತ್ತಮ ಬದುಕುಳಿಯುವ ಸಾಧ್ಯತೆಗಳನ್ನು ನೀಡುತ್ತದೆ ಎಂದು ನಂಬಿದ್ದಾರೆ ಎಜೆಂಟ್ ಗಳು ಹೇಳಿದ್ದಾರೆ.

"ನನಗೆ ಸೀಟು 11A ಬೇಕು, ಅಥವಾ ತುರ್ತು ನಿರ್ಗಮನದ ಬಳಿ ಇರುವ ಯಾವುದೇ ಸೀಟು ಬೇಕು" ಎಂದು ಕೋಲ್ಕತ್ತಾದ ಆಗಾಗ್ಗೆ ಪ್ರಯಾಣಿಸುವ ರಾಜೇಶ್ ಭಗ್ನಾನಿ ಹೇಳಿದ್ದಾರೆ. "ವಿಶ್ವಾಶ್‌ಕುಮಾರ್ ಅವರ ಅದ್ಭುತ ಪಲಾಯನವನ್ನು ನೋಡಿದ ನಂತರ, ಆ ಸೀಟು ನನಗೆ ಬದುಕುಳಿಯಲು ಉತ್ತಮ ಅವಕಾಶ ನೀಡುತ್ತದೆ ಎಂದು ನನಗೆ ಅನಿಸುತ್ತದೆ ಎಂದು ರಾಜೇಶ್ ಭಗ್ನಾನಿ ಹೇಳಿದ್ದಾರೆ.

ಮತ್ತೊಬ್ಬ ಪ್ರಯಾಣಿಕ, ಉದ್ಯಮಿ ಜಿತೇಂದ್ರ ಸಿಂಗ್ ಬಗ್ಗಾ ಕೂಡ ಇದೇ ರೀತಿಯ ಭಾವನೆ ವ್ಯಕ್ತಪಡಿಸಿದ್ದು, "ನಾನು ಅದಕ್ಕಾಗಿ ಯಾವುದೇ ಹೆಚ್ಚುವರಿ ಮೊತ್ತವನ್ನು ನೀಡಲು ಸಿದ್ಧನಿದ್ದೇನೆ" ಎಂದು ಹೇಳಿದ್ದಾರೆ. ಅವರು ಯುಎಸ್‌ಗೆ ಮುಂಬರುವ ವಿಮಾನವನ್ನು ಉಲ್ಲೇಖಿಸುತ್ತಾ ಹೇಳಿದರು.

ಟ್ರಾವೆಲ್ ಏಜೆಂಟ್ಸ್ ಫೆಡರೇಶನ್ ಆಫ್ ಇಂಡಿಯಾದ ಅನಿಲ್ ಪಂಜಾಬಿ ಮಾತನಾಡಿ, '11A ತುರ್ತು ನಿರ್ಗಮನದ ಪಕ್ಕದಲ್ಲಿಲ್ಲದಿದ್ದರೂ ಸಹ, ಪ್ರಯಾಣಿಕರು ಅದನ್ನೇ ಕೇಳುತ್ತಿದ್ದಾರೆ. "ಇದು ನಂಬಿಕೆ, ಸೌಕರ್ಯ ಮತ್ತು ಮನಸ್ಸಿನ ಶಾಂತಿಯ ಕುರಿತಾದ್ದರಿಂದ ಆ ಸೀಟಿಗೆ ಬೇಡಿಕೆ ಹೆಚ್ಚಾಗುತ್ತಿದೆ ಎಂದು ಅಭಿಪ್ರಾಯಪಟ್ಟಿದ್ದಾರೆ.

ಇಷ್ಟಕ್ಕೂ 11A ಸೀಟ್ ಸುರಕ್ಷಿತವೇ?

ವಿಮಾನಗಳು ಆಸನ ಸಂರಚನೆಗಳಲ್ಲಿ ವ್ಯಾಪಕವಾಗಿ ಬದಲಾಗುವುದರಿಂದ, ಅಪಘಾತಗಳು ವಿಶಿಷ್ಟವಾಗಿರುತ್ತವೆ ಮತ್ತು ಬದುಕುಳಿಯುವಿಕೆಯು ಸಾಮಾನ್ಯವಾಗಿ ಅಂಶಗಳ ಸಂಕೀರ್ಣ ಪರಸ್ಪರ ಕ್ರಿಯೆಯನ್ನು ಅವಲಂಬಿಸಿರುತ್ತದೆ ಎಂದು ವಾಯುಯಾನ ತಜ್ಞರು ಹೇಳುತ್ತಾರೆ. "ಪ್ರತಿಯೊಂದು ಅಪಘಾತವು ವಿಭಿನ್ನವಾಗಿರುತ್ತದೆ ಮತ್ತು ಆಸನ ಸ್ಥಳವನ್ನು ಆಧರಿಸಿ ಬದುಕುಳಿಯುವಿಕೆಯನ್ನು ಊಹಿಸಲು ಅಸಾಧ್ಯ" ಎಂದು ಯುಎಸ್ ಮೂಲದ ಲಾಭರಹಿತ ಸಂಸ್ಥೆಯಾದ ಫ್ಲೈಟ್ ಸೇಫ್ಟಿ ಫೌಂಡೇಶನ್‌ನ ನಿರ್ದೇಶಕ ಮಿಚೆಲ್ ಫಾಕ್ಸ್ ಹೇಳಿದ್ದಾರೆ.

ಗುರುವಾರ ಅಹಮದಾಬಾದ್‌ನಲ್ಲಿ ಅಪಘಾತಕ್ಕೀಡಾದ ಲಂಡನ್‌ಗೆ ಹೊರಟಿದ್ದ ಏರ್ ಇಂಡಿಯಾ ಬೋಯಿಂಗ್ 787 ಡ್ರೀಮ್‌ಲೈನರ್‌ನಲ್ಲಿ ತಮ್ಮ 11A ಸೀಟು ತುರ್ತು ನಿರ್ಗಮನದ ಬಳಿ ಇತ್ತು. ವಿಮಾನ ಅಪಘಾತವಾದಾಗ ತುರ್ತು ನಿರ್ಗಮನದ ಡೋರ್ ಛಿದ್ರಗೊಂಡಿತ್ತು. ಅಲ್ಲಿಯೇ ಪಕ್ಕದಲ್ಲಿದ್ದ ಪ್ರಯಾಣಿಕ ಕ್ಷಣಮಾತ್ರದಲ್ಲಿ ವಿಮಾನದಿಂದ ಹೊರಬಂದ. ನಿರ್ಗಮನ ಬಾಗಿಲಿನ ಪಕ್ಕದಲ್ಲಿ ಕುಳಿತುಕೊಳ್ಳುವುದು ಅಪಘಾತದಿಂದ ಬದುಕುಳಿಯಲು ನಿಮಗೆ ಸಹಾಯ ಮಾಡಬಹುದು. ಆದರೆ ಅದು ಯಾವಾಗಲೂ 11A ಆಗಿರುವುದಿಲ್ಲ ಏಕೆಂದರೆ ವಿಮಾನವು ಡಜನ್ಗಟ್ಟಲೆ ವಿಭಿನ್ನ ಸಂರಚನೆಗಳನ್ನು ಹೊಂದಿರಬಹುದು ಎಂದು ಸಿಡ್ನಿ ಮೂಲದ ಅವ್ಲಾ ಏವಿಯೇಷನ್ ​​ಕನ್ಸಲ್ಟಿಂಗ್‌ನ ಅಧ್ಯಕ್ಷ ರಾನ್ ಬಾರ್ಟ್ಸ್ಚ್ ಹೇಳಿದರು.

ವಿಮಾನದ ಯಾವ ಭಾಗ ಹೆಚ್ಚು ಸುರಕ್ಷಿತ?

ಇನ್ನು 1971 ರಿಂದ ಅಪಘಾತಗಳ ಕುರಿತು 2007 ರ ಪಾಪ್ಯುಲರ್ ಮೆಕ್ಯಾನಿಕ್ಸ್ ಅಧ್ಯಯನವು ವಿಮಾನದ ಹಿಂಭಾಗದ ಕಡೆಗೆ ಪ್ರಯಾಣಿಕರು ಉತ್ತಮ ಬದುಕುಳಿಯುವ ಸಾಧ್ಯತೆಗಳನ್ನು ಹೊಂದಿದ್ದಾರೆಂದು ಕಂಡುಹಿಡಿದಿದೆ. ಕೆಲವು ತಜ್ಞರು ರೆಕ್ಕೆ ವಿಭಾಗವು ಹೆಚ್ಚಿನ ಸ್ಥಿರತೆಯನ್ನು ನೀಡುತ್ತದೆ ಎಂದು ಸೂಚಿಸುತ್ತಾರೆ. ವಿಶ್ವಶ್‌ಕುಮಾರ್‌ ಅವರಂತೆ ನಿರ್ಗಮನ ದ್ವಾರದ ಪಕ್ಕದಲ್ಲಿ ಕುಳಿತುಕೊಳ್ಳುವುದರಿಂದ ವಿಮಾನದಿಂದ ಹೊರಬರುವ ಮೊದಲಿಗರಲ್ಲಿ ಒಬ್ಬರಾಗಲು ನಿಮಗೆ ಅವಕಾಶ ಸಿಗುತ್ತದೆ. ಆದರೆ ಕೆಲವು ನಿರ್ಗಮನಗಳು ಅಪಘಾತದ ನಂತರ ಕಾರ್ಯನಿರ್ವಹಿಸುವುದಿಲ್ಲ ಎಂದು ಹೇಳಿದ್ದಾರೆ.