ಪಾಟ್ನಾ: ಆಘಾತಕಾರಿ ಬೆಳವಣಿಗೆಯಲ್ಲಿ ಭೋಜ್ಪುರಿ ಗಾಯಕನೋರ್ವ ಮಹಿಳಾ ಡ್ಯಾನ್ಸರ್ ಳನ್ನು ಹೊತ್ತು ಪ್ರೇಕ್ಷಕರತ್ತ ಎಸೆದಿರುವ ವಿಡಿಯೋವೊಂದು ಸಾಮಾಜಿಕ ಜಾಲತಾಣದಲ್ಲಿ ವ್ಯಾಪಕ ವೈರಲ್ ಆಗುತ್ತಿದೆ.
ಭೋಜ್ಪುರಿ ಗಾಯಕ ಧನಂಜಯ್ ಶರ್ಮಾ ಮಹಿಳಾ ನರ್ತಕಿಯನ್ನು ದೈಹಿಕವಾಗಿ ಎತ್ತಿ ಜನಜಂಗುಳಿಯತ್ತ ಎಸೆದಿರುವುದು ವಿಡಿಯೋದಲ್ಲಿ ದಾಖಲಾಗಿದೆ. ಈ ವಿಡಿಯೋ ಇದೀಗ ವ್ಯಾಪಕ ವೈರಲ್ ಆಗುತ್ತಿದ್ದು, ಗಾಯಕನ ಕೃತ್ಯಕ್ಕೆ ವ್ಯಾಪಕ ಆಕ್ರೋಶ ವ್ಯಕ್ತವಾಗುತ್ತಿದೆ.
ಕಾರ್ಯಕ್ರಮವೊಂದರಲ್ಲಿ ಭಾಗಿಯಾಗಿದ್ದ ಭೋಜ್ಪುರಿ ಗಾಯಕ ಧನಂಜಯ್ ಶರ್ಮಾ ಪ್ರದರ್ಶನ ನೀಡುತ್ತಿದ್ದಾಗ ವೇದಿಕೆಯ ಕೆಳಗಡೆ ಇದ್ದ ಜನ ಸಮೂಹ ಉತ್ಸಾಹದಿಂದ ಕೂಗುತ್ತಿದ್ದರು. ಒಂದೆಡೆ ಗಾಯಕ ಹಾಡು ಹಾಡುತ್ತಿದ್ದರೆ ಮತ್ತೊಂದೆಡೆ ಮಹಿಳಾ ನರ್ತಕಿ ಡ್ಯಾನ್ಸ್ ಮಾಡುತ್ತಿದ್ದರು.
ಈ ವೇಳೆ ನೋಡ ನೋಡುತ್ತಲೇ ಮಹಿಳಾ ಡ್ಯಾನ್ಸರ್ ರನ್ನು ಎತ್ತಿಕೊಂಡ ಗಾಯಕ ಧನಂಜಯ್ ಶರ್ಮಾ, ಆಕೆಯನ್ನು ವೇದಿಕೆಯ ಮುಂಭಾಗಕ್ಕೆ ಹೊತ್ತೊಯ್ದು ಕೆಳಗಿದ್ದ ಜನರ ಮೇಲೆ ಎಸೆಯುತ್ತಾರೆ.
ಈ ವೇಳೆ ಅಲ್ಲಿ ನೆರದಿದ್ದವರು ಆಕೆಯನ್ನು ಹಿಡಿದುಕೊಳ್ಳಲು ಮುಗಿಬೀಳುತ್ತಾರೆ. ಈ ವೇಳೆ ಕೆಳಗೆ ಬಿದ್ದ ಡ್ಯಾನ್ಸರ್ ಗೆ ಸಣ್ಣಪುಟ್ಟ ಗಾಯಗಳಾಗಿದ್ದು, ಘಟನೆಯಿಂದ ಡ್ಯಾನ್ಸರ್ ಆಘಾತಕ್ಕೊಳಗಾಗಿದ್ದಾರೆ.
ವ್ಯಾಪಕ ಆಕ್ರೋಶ
ಉತ್ತರ ಭಾರತದಲ್ಲಿ ಮಹಿಳಾ ನರ್ತಕಿಯರನ್ನು ಅಮಾನುಷವಾಗಿ ನಡೆಸಿಕೊಳ್ಳುವುದು ಸಾಮಾನ್ಯ.. ಸಾಕಷ್ಟು ಬಾರಿ ವೇದಿಕೆ ಮೇಲಿದ್ದ ನರ್ತಕಿಯನ್ನು ಎಳೆದುಕೊಂಡು ಪ್ರೇಕ್ಷಕರು ಕಿರುಕುಳ ನೀಡಿದ ಸಾಕಷ್ಟು ಉದಾಹರಣೆಗಳಿವೆ. ಆದರೆ ಹಾಲಿ ಪ್ರಕರಣದಲ್ಲಿ ಗಾಯಕನೇ ನರ್ತಕಿಯನ್ನು ಪ್ರೇಕ್ಷಕರತ್ತ ಎಸೆದಿರುವುದು ಆತನ ವಿಕೃತ ಮನಸ್ಥಿತಿ ತೋರುತ್ತದೆ ಎಂದು ನೆಟ್ಟಿಗರು ಕಿಡಿಕಾರಿದ್ದಾರೆ.
ಗಾಯಕಿಯ ಒಪ್ಪಿಗೆ ಇಲ್ಲದೇ ಅಕೆಯನ್ನು ಮುಟ್ಟುವುದೇ ತಪ್ಪು.. ಅಂತಹುದರಲ್ಲಿ ಆಕೆಯನ್ನು ಜನ ಸಮೂಹದತ್ತ ಎಸೆದಿರುವುದು ಅಕ್ಷಮ್ಯ.. ಇದು ದೈಹಿಕ ಹಲ್ಲೆಯ ಸ್ಪಷ್ಟ ಪ್ರದರ್ಶನ ಮತ್ತು ಮಹಿಳಾ ಸುರಕ್ಷತೆಯ ಸಂಪೂರ್ಣ ನಿರ್ಲಕ್ಷ್ಯ ಎಂದು ಮತ್ತೆ ಕೆಲವರು ಕಿಡಿಕಾರಿದ್ದಾರೆ.
ಪೊಲೀಸ್ ಕ್ರಮ
ಇನ್ನು ಈ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಲೇ ಬಿಹಾರ ಪೊಲೀಸರು ಅಧಿಕೃತವಾಗಿ ಮಧ್ಯಪ್ರವೇಶಿಸಿದ್ದಾರೆ. ವೈರಲ್ ಕ್ಲಿಪ್ ಅನ್ನು ಗಮನಿಸಿದ ಹಿರಿಯ ಅಧಿಕಾರಿಗಳು, ಈ ವಿಷಯದ ಬಗ್ಗೆ ತಕ್ಷಣದ ತನಿಖೆಯನ್ನು ಪ್ರಾರಂಭಿಸಲು ಮುಜಫರ್ಪುರ ಪೊಲೀಸರಿಗೆ ನಿರ್ದೇಶನ ನೀಡಿದ್ದಾರೆ.