ಗುವಾಹಟಿ: ಗುವಾಹಟಿಯ ಖಾನಾಪಾರಾ ಪ್ರದೇಶದಲ್ಲಿರುವ ನೈಟ್‌ಕ್ಲಬ್ ಒಂದರಲ್ಲಿ ಗುರುವಾರ ತಡರಾತ್ರಿ ಮಹಿಳೆಯೊಬ್ಬರ ಬಟ್ಟೆ ಬಿಚ್ಚಿಸಿ ಹಲ್ಲೆ ನಡೆಸಲಾಗಿದೆ ಎಂದು ಆರೋಪಿಸಲಾಗಿದೆ. ಖಾನಾಪಾರಾ ಪ್ರದೇಶದ 'ಲೋಕಲ್ಸ್' (Locals) ಕೆಫೆ ಮತ್ತು ಲೌಂಜ್‌ನಲ್ಲಿ ನಡೆದ ಈ ಆಘತಕಾರಿ ಘಟನೆಯಲ್ಲಿ ಬೌನ್ಸರ್‌ಗಳು ಭಾಗಿಯಾಗಿದ್ದರು ಎಂದು ಅಲ್ಲಿನವರು ಹೇಳಿದ್ದಾರೆ.
ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕವಾಗಿ ಹಂಚಿಕೊಳ್ಳಲಾಗುತ್ತಿರುವ ವಿಡಿಯೋವೊಂದರಲ್ಲಿ, ಮಹಿಳೆಯೊಬ್ಬರು ಬಟ್ಟೆಯಿಲ್ಲದೆ ನೆಲದ ಮೇಲೆ ಬಿದ್ದಿರುವುದು ಮತ್ತು ಇಬ್ಬರು ಮಹಿಳೆಯರು ಆಕೆಯನ್ನು ಒದೆಯುತ್ತಿರುವುದು ಕಂಡುಬರುತ್ತದೆ. ಅವರೊಂದಿಗೆ ಕೆಲವು ಪುರುಷರೂ ಕಾಣಿಸಿಕೊಳ್ಳುತ್ತಾರೆ. ಮತ್ತೊಂದು ವಿಡಿಯೋದಲ್ಲಿ, ಕಾರೊಂದು ಬಂದು ದೃಶ್ಯವನ್ನು ಮರೆಮಾಚುವ ಮೊದಲು, ಮಹಿಳೆಯೊಬ್ಬರು ಆಕೆಯನ್ನು ಎತ್ತಲು ಪ್ರಯತ್ನಿಸುತ್ತಿರುವುದು ಕಂಡುಬರುತ್ತದೆ.
ಆ ಮಹಿಳೆಯ ಗುರುತು ಇನ್ನೂ ಪತ್ತೆಯಾಗಿಲ್ಲ. ಕ್ಲಬ್‌ನಲ್ಲಿ ಆಕೆಯನ್ನು ನೆಲಕ್ಕೆ ತಳ್ಳಿ, ಬಟ್ಟೆ ಬಿಚ್ಚಿಸಿ ಹಲ್ಲೆ ನಡೆಸಲಾಗಿದೆ ಎಂದು ಮೂಲಗಳು ತಿಳಿಸಿವೆ. ಆಕೆಯ ಮೇಲೆ ಹಲ್ಲೆ ನಡೆಸಿದವರಲ್ಲಿ ಪುರುಷ ಮತ್ತು ಮಹಿಳಾ ಬೌನ್ಸರ್‌ಗಳೂ ಇದ್ದರು ಎಂದು ಅವರು ಸೇರಿಸಿದ್ದಾರೆ.
ನಂತರ ಆಕೆಯನ್ನು ಕ್ಲಬ್‌ನ ನಾಲ್ಕನೇ ಮಹಡಿಯಿಂದ ಕೆಳಗೆ, ವಾಹನ ನಿಲುಗಡೆ ಪ್ರದೇಶದಂತಿದ್ದ ಸ್ಥಳಕ್ಕೆ ಕರೆತರಲಾಯಿತು.
ಈ ಸಂಘರ್ಷಕ್ಕೆ ಕಾರಣವೇನು ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ. ಹಲ್ಲೆಗೂ ಮುನ್ನ ಏನಾಗಿತ್ತು ಎಂಬುದು ಕೂಡ ತಿಳಿದುಬಂದಿಲ್ಲ. ಮಾಧ್ಯಮ ಪ್ರತಿನಿಧಿಗಳು ನೈಟ್‌ಕ್ಲಬ್‌ಗೆ ತಲುಪಿದಾಗ, ಅಲ್ಲಿನ ದೀಪಗಳನ್ನು ಆರಿಸಿ ಕ್ಲಬ್ ಅನ್ನು ಮುಚ್ಚಲಾಗಿತ್ತು. ಕ್ಲಬ್ ಆಡಳಿತ ಮಂಡಳಿಯ ಯಾರೊಬ್ಬರೂ ಹೊರಬಂದು ಮಾತನಾಡಲಿಲ್ಲ.
ಈ ಘಟನೆಗೆ ಸಂಬಂಧಿಸಿದಂತೆ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ, ಆದರೆ ಕ್ಲಬ್‌ನ ಯಾರನ್ನಾದರೂ ವಿಚಾರಣೆಗೆ ಒಳಪಡಿಸಲಾಗಿದೆಯೇ ಎಂಬುದು ಸ್ಪಷ್ಟವಾಗಿಲ್ಲ.